ព្រះគម្ពីរ
នីហ្វៃ ទី ២ 11


ជំពូក​ទី ១១

យ៉ាកុប​បាន​ឃើញ​ព្រះ​ដ៏​ប្រោស​លោះ​របស់​លោក — ក្រឹត្យវិន័យ​លោក​ម៉ូសេ​ជា​គំរូ​អំពី​ព្រះ​គ្រីស្ទ ហើយ​បញ្ជាក់​ថា ទ្រង់​នឹង​យាង​មក​មែន។ ប្រមាណ​ជា​ឆ្នាំ ៥៥៩–៥៤៥ ម.គ.ស.។

ហើយ​ឥឡូវ​នេះ យ៉ាកុប​បាន​និយាយ​ជាច្រើន​សេចក្ដី​ទៀត​ទៅ​ប្រជាជន​ខ្ញុំ​នៅ​ពេល​នោះ ទោះ​ជា​យ៉ាង​ណា​ក៏​ដោយ មាន​តែ​រឿង​ប៉ុន្មាន​នេះ​ទេ​ដែល​ខ្ញុំ​បាន​ឲ្យ​សរសេរ​ទុក ព្រោះ​រឿង​ទាំង​ឡាយ​ដែល​ខ្ញុំ​សរសេរ​ទុក ខ្ញុំ​ឃើញ​ថា​ល្មម​គ្រប់គ្រាន់​ហើយ។

ហើយ​ឥឡូវ​នេះ ខ្ញុំ នីហ្វៃ សរសេរ​ពាក្យ​ពេចន៍​របស់​លោក​អេសាយ​ថែម​ទៀត ព្រោះ​ព្រលឹង​ខ្ញុំ​ត្រេកអរ​ចំពោះ​ពាក្យ​ពេចន៍​របស់​លោក។ ត្បិត​ខ្ញុំ​នឹង​ប្រៀប​ពាក្យ​ទាំង​ឡាយ​របស់​លោក​ទៅ​លើ​ប្រជាជន​ខ្ញុំ ហើយ​ខ្ញុំ​នឹង​ផ្សាយ​ពាក្យ​ទាំង​ឡាយ​ដល់​កូន​ចៅ​ខ្ញុំ​ទាំង​អស់ ត្បិត​លោក​ពិតជា​បាន​ឃើញ​ព្រះ​ដ៏​ប្រោស​លោះ​របស់​ខ្ញុំ ដូច​ជា​ខ្ញុំ​បាន​ឃើញ​ទ្រង់​ដែរ។

ហើយ​យ៉ាកុប ដែល​ជា​ប្អូន​ខ្ញុំ ក៏​បាន​ឃើញ​ទ្រង់​ដូច​ខ្ញុំ​បាន​ឃើញ​ដែរ ហេតុ​ដូច្នោះ​ហើយ ខ្ញុំ​នឹង​ផ្សាយ​ពាក្យ​ទាំង​ឡាយ​របស់​ពួក​គេ​ដល់​កូន​ចៅ​របស់​ខ្ញុំ ដើម្បី​បញ្ជាក់​ដល់​កូន​ចៅ​ខ្ញុំ​ថា ពាក្យ​ទាំង​ឡាយ​របស់​ខ្ញុំ​ជា​ពាក្យ​ពិត។ ហេតុ​ដូច្នោះ​ហើយ ព្រះ​ទ្រង់​មាន​ព្រះ​បន្ទូល​ថា ដោយ​ពាក្យ​ពេចន៍​របស់​អ្នក​ទាំង​បី នោះ​យើង​នឹង​តាំង​ពាក្យ​របស់​យើង​ឡើង។ ទោះ​ជា​យ៉ាង​នេះ​ក៏​ដោយ គង់តែ​ព្រះ​ទ្រង់​បាន​បញ្ជូន​សាក្សី​ថែម​ទៀត ហើយ​ព្រះ​អង្គ​បាន​បញ្ជាក់​អស់​ទាំង​ពាក្យ​របស់​ព្រះ​អង្គ។

មើល​ចុះ ព្រលឹង​ខ្ញុំ​ត្រេកអរ​ក្នុង​ការ​បញ្ជាក់​ដល់​ប្រជាជន​ខ្ញុំ​នូវ​ការ​ពិត​អំពី​ការ​យាង​មក​នៃ​ព្រះ​គ្រីស្ទ ហើយ​ដោយ​គោលបំណង​នេះ ទើប​ក្រឹត្យវិន័យ​លោក​ម៉ូសេ​ត្រូវ​បាន​ប្រទាន​មក ហើយ​អស់​ទាំង​អ្វី​ដែល​ព្រះ​ទ្រង់​បាន​ប្រទាន​ដល់​មនុស្ស ចាប់​តាំង​ពី​កំណើត​លោកិយ​មក គឺជា​គំរូ​អំពី​ព្រះ​អង្គ។

ហើយ​ព្រលឹង​ខ្ញុំ​ក៏​ត្រេកអរ​ចំពោះ​សេចក្ដី​សញ្ញា​ទាំង​ឡាយ​នៃ​ព្រះ​អម្ចាស់ ដែល​ទ្រង់​បាន​ធ្វើ​ជាមួយ​នឹង​ពួក​អយ្យកោ​របស់​យើង​ដែរ មែន​ហើយ ព្រលឹង​ខ្ញុំ​ត្រេកអរ​ដល់​ព្រះ​គុណ​របស់​ទ្រង់ ហើយ​ដល់​សេចក្ដី​យុត្តិធម៌ និង​ព្រះ​ចេស្ដា និង​សេចក្ដី​មេត្តាករុណា​របស់​ទ្រង់ ក្នុង​ផែនការ​ដ៏​ធំ ហើយ​អស់​កល្ប​ជានិច្ច នៃ​ការ​រំដោះ​ពី​សេចក្ដី​ស្លាប់។

ហើយ​ព្រលឹង​ខ្ញុំ​ត្រេកអរ​ក្នុង​ការ​បញ្ជាក់​ដល់​ប្រជាជន​ខ្ញុំ​ថា លើក​លែង​តែ​ព្រះ​គ្រីស្ទ​នឹង​យាង​មក នោះ​មនុស្ស​លោក​ទាំង​អស់​នឹង​ត្រូវ​វិនាស។

ត្បិត​បើ​សិន​ជា​គ្មាន​ព្រះ​គ្រីស្ទ​ទេ នោះ​ក៏​គ្មាន​ព្រះ​ដែរ ហើយ​បើ​សិន​ជា​គ្មាន​ព្រះ​ទេ នោះ​ក៏​គ្មាន​យើង​រាល់​គ្នា​ដែរ ព្រោះ​មិន​អាច​មាន​ការ​បង្ក​បង្កើត​បាន​ឡើយ។ ប៉ុន្តែ​មាន​ព្រះ​មួយ​អង្គ ហើយ​ទ្រង់​ជា​ព្រះ​គ្រីស្ទ ហើយ​ទ្រង់​នឹង​យាង​មក​ក្នុង​ពេល​កំណត់​របស់​ទ្រង់។

ហើយ​ឥឡូវ​នេះ ខ្ញុំ​សរសេរ​ពាក្យ​របស់​លោក​អេសាយ​ខ្លះ​ថា បើ​សិន​ជា​ប្រជាជន​ខ្ញុំ​ណា​ម្នាក់​បាន​ឃើញ​ពាក្យ​ទាំង​នេះ​ហើយ នោះ​គេ​អាច​លើក​ចិត្ត​គេ​ឡើង ហើយ​អរ​សប្បាយ​សម្រាប់​មនុស្ស​លោក​ទាំង​អស់។ ឥឡូវ​នេះ នេះ​គឺជា​ពាក្យ​ទាំង​ឡាយ ហើយ​អ្នក​រាល់​គ្នា​អាច​ប្រៀប​ពាក្យ​ទាំង​ឡាយ​នេះ​ទៅ​លើ​ខ្លួន​អ្នក ហើយ​ទៅ​លើ​មនុស្ស​លោក​ទាំង​អស់៕