Tasal 25
K’utb’esinb’il na’leb’ k’eeb’il rik’in xtz’uumal re laj Jose Smith li Profeet, sa’ Harmony, Pennsylvania, Julio 1830 (chi’ilmanq xtiklajik li tasal 24). Li k’utb’esinb’il na’leb’ a’in naxk’utb’esi li rajom li Qaawa’ choq’ re li xEmma Smith, rixaqil li Profeet.
1–6, Li xEmma Smith, jun Qana’ sik’b’il ru, nab’oqe’ re xtenq’ankil ut xk’ojob’ankil xch’ool lix b’eelom; 7–11, B’oqb’il ajwi’ chi tz’iib’ak, chixch’olob’ankileb’ li loq’laj hu, ut chixsik’b’aleb’ ru li b’ich; 12–14, Lix b’icheb’ li tiikeb’ xch’ool wan choq’ tij chiru li Qaawa’; 15–16, Li na’leb’ chirix ab’ink chiru li chaq’rab’ sa’ li k’utb’esinb’il na’leb’ a’in wan choq’ reheb’ chixjunil.
1 Chat-ab’inq chiru lix yaab’ xkux li Qaawa’ laa Dios, naq nakatwaatina laa’at, Emma Smith, lin rab’in; xb’aan naq chi yaal ninye aawe, chixjunileb’ li neke’k’uluk re lin evangelio a’aneb’ alalb’ej ut rab’inb’ej sa’ lin awa’b’ejihom.
2 Jun k’utb’esinb’il na’leb’ nink’e aawe chirix li rajom inch’ool; ut wi tiikat chi paab’ank ut nakatb’eek sa’ xb’ehil li saq ruhil na’leb’ chiwu, laa’in tinkol rix laa yu’am, ut taak’ul jun aaweechanihom sa’ Sion.
3 K’e reetal, kuyb’ileb’ laa maak, ut laa’at jun Qana’ sik’b’il ru, li b’oqb’il inb’aan.
4 Matwech’ink xb’aan li k’a’aq re ru ink’a’ xawil, xb’aan naq tz’apb’il chawu ut chiru li ruchich’och’, a’an xchaab’ilal inna’leb’ sa’ jun kutan toj chalel.
5 Ut li ropiis laa b’oqb’al a’anaq choq’ xk’ojob’ankil xch’ool lin moos laj Jose Smith, alalb’ej, laa b’eelom, sa’ lix ch’a’ajkilal, rik’in li aatin li nak’ojob’an ch’oolej, sa’ li musiq’ej re tuulanil.
6 Ut tatxik chirix sa’ xhoonal lix xikik, ut tatwanq chiru choq’ aj tz’iib’anel, naq maa’ani wan choq’ aj tz’iib’anel chiru, re taaruuq tintaqla lin moos, aj Oliver Cowdery, yalaq b’ar nawaj.
7 Ut tatk’ojob’aaq rub’el ruq’ a’an re xch’olob’ankileb’ li loq’laj hu, ut re xwaklesinkil xch’ool li iglees, jo’ chanru k’eeb’ilaq aawe xb’aan inMusiq’.
8 Xb’aan naq a’an tixk’e li ruq’ sa’ aab’een, ut taak’ul li Santil Musiq’ej, ut k’eeb’ilaq laa hoonal chi tz’iib’ak, ut chixtzolb’al naab’al.
9 Ut moko na’aje’ ta naq tatxuwaq, xb’aan naq laa b’eelom tixk’e li nak’anjelak aawe sa’ li iglees; xb’aan naq choq’ reheb’ a’an lix b’oqb’al a’an, re naq chixjunil li k’a’aq re ru taak’utb’esimanq chiruheb’, yalaq k’a’ru li nawaj, jo’ chanru lix paab’aaleb’.
10 Ut ninye chi yaal aawe naq taatz’eq chawix li k’a’aq re ru re li ruchich’och’ a’in, ut taasik’ li k’a’ru re jun q’axal chaab’il wi’chik.
11 Ut k’eeb’ilaq ajwi’ aawe xsik’b’aleb’ ru xkomon li loq’laj b’ich, jo’ chanru k’eeb’ilaq aawe, li nasaho’ wi’ sa’ inch’ool, re taawanq sa’ lin iglees.
12 Xb’aan naq nasaho’ li waam rik’in lix b’ichahom li aamej; relik chi yaal, lix b’icheb’ li tiikeb’ xch’ool a’an jun li tij chiwu, ut sumenb’ilaq rik’in jun osob’tesink sa’ xb’een lix jolomeb’.
13 Jo’kan ut, waklesi aawaam ut chisaho’q sa’ aach’ool, ut chatjiloq rik’ineb’ li sumwank li kak’uub’.
14 Chatkanaaq sa’ li musiq’ej re tuulanil, ut chawil aawib’ chiru li q’etq’etil. Chisaho’q laa waam rik’in laa b’eelom, ut li loq’alil li taachalq sa’ xb’een a’an.
15 Chapaab’eb’ lin taqlahom rajlal, ut jun koroon re tiikilal taak’ul. Ut wi ink’a’ nakab’aanu a’in, b’ar wankin wi’ moko tatruuq ta chi chalk.
16 Ut chi yaal, chi yaal, ninye aawe, naq a’in lix yaab’ inkux choq’ reheb’ chixjunil. Amen.