Hyrje te Letra e Tretë e Gjonit
Përse të studiohet ky libër?
Në këtë letër të shkurtër, Gjoni e lavdëroi Gajin, një anëtar të Kishës, i cili ishte besnik gjatë një kohe rebelimi kundrejt udhëheqësve të Kishës. Mësimet e Gjonit mund t’i ndihmojnë studentët ta kuptojnë më mirë braktisjen që ndodhi në Kishën e Dhiatës së Re dhe mund t’i frymëzojnë ata të qëndrojnë besnikë ndaj udhëheqësve të Kishës pavarësisht nga kundërshtimet.
Kush e shkroi këtë libër?
Autori e përcaktoi veten si “plaku” (3 Gjon 1:1) dhe tradicionalisht kuptohet të jetë Apostulli Gjon.
Kur dhe ku u shkrua ai?
Nuk dihet me saktësi se kur dhe ku u shkrua 3 Gjoni.
Në qoftë se tradita lidhur me banimin e Gjonit për një kohë të gjatë në Efes është e saktë, ai mund ta ketë shkruar letrën prej andej midis viteve 70 dhe 100 ps.K.
Për kë u shkrua ai dhe përse?
Letra e Tretë e Gjonit u shkrua për Gajin, një anëtar besnik i Kishës, të cilin Gjoni e lavdëroi ngaqë tregoi përkushtim vetëmohues ndaj kauzës së Krishtit, duke siguruar strehim për shërbëtorët udhëtues të Perëndisë (shih 3 Gjon 1:5–8).
Gjoni e paralajmëroi Gajin gjithashtu për dikë që quhej Diotrefi, i cili mund të ketë mbajtur pozicionin e një udhëheqësi vendor në Kishë. Diotrefi e kundërshtoi haptas Gjonin e zyrtarë të tjerë të Kishës dhe madje anëtarët vendorë të Kishës, të cilët donin t’i mirëpritnin ata, i ndaloi që të merrnin pjesë në mbledhjet e Kishës (shih 3 Gjon 1:9–10). Gjoni e nxiti Gajin që të vazhdonte të bënte mirë dhe tha se shpresonte që ta vizitonte Gajin së shpejti (shih 3 Gjon 1:11–14).
Cilat janë disa tipare dalluese të këtij libri?
Te 3 Gjoni ne shohim shqetësimin e Gjonit lidhur me ndikimet braktisëse në Kishë. Ne shohim gjithashtu dashurinë e Gjonit për të tjerët dhe gëzimin që ai ndjeu për ata, të cilët po zgjidhnin një jetë bindjeje (shih 3 Gjon 1:4).
Përmbledhje
3 Gjon 1 Gjoni e lavdëron Gajin për besnikërinë e tij dhe paralajmëron për një udhëheqës që e kundërshtoi Gjonin dhe udhëheqës të tjerë të Kishës.