Tasal 9
K’utb’esinb’il na’leb’ k’eeb’il rik’in xtz’uumal re laj Jose Smith li Profeet re laj Oliver Cowdery, sa’ Harmony, Pennsylvania, Abril 1829. Natije’ laj Oliver naq chiwanq xkuyum, ut nak’eeman xch’ool chi saho’k ka’ajwi’ rik’in xtz’iib’ankil, chiru li kutan a’an, li aatin yeeb’il xb’aan laj jaltesinel ru, ut ink’a’ tixyal a’an jaltesink ru aatin.
1–6, Jalaneb’ chik li najter tz’iib’anb’il hu toj te’jaltesimanq ru; 7–14, Lix Hu laj Mormon najaltesiik ru rik’in xk’oxlankil li aatin, ut chi xaqab’anb’il xyaalal xb’aan li Musiq’ej.
1 K’e reetal, ninye aawe, at walal, naq rik’in naq ink’a’ kajaltesi ru li aatin jo’ chanru li kawaj wik’in, ut katikib’ wi’chik tz’iib’ak choq’ re lin moos, aj Jose Smith, alalb’ej, jo’kan ajwi’ nawaj raj naq toj taab’aanu, toj reetal naq teechoy li tz’iib’anb’il esil a’in, li kink’e sa’ ruq’ a’an.
2 Ut chirix a’an, k’e reetal, jalaneb’ chik li tz’iib’anb’il esil wankeb’ wik’in, li tink’e aawe wankilal re taaruuq tattenq’anq chixjaltesinkil ru.
3 Aj kuyunelaqat, at walal, xb’aan naq a’in xchaab’ilal inna’leb’, ut moko aajel ta ru naq taajaltesi ru li aatin sa’ li kutan a’in.
4 K’e reetal, li k’anjel li b’oqb’ilat chixb’aanunkil a’an tz’iib’ak choq’ re lin moos aj Jose.
5 Ut k’e reetal, a’ sa’ xk’ab’a’ naq ink’a’ katkana jo’ kattikla naq kat-ok chi jaltesink ru aatin, naq kiwisi aawik’in li usilal a’in.
6 Maawech’i rix, at walal, xb’aan naq a’an xchaab’ilal inna’leb’ naq kinb’aanu aawe chi jo’ka’in.
7 K’e reetal, ink’a’ xataw xyaalal; xak’oxla naq tink’e aawe, naq maak’a’ chik kak’oxla xb’aanunkil, ka’ajwi’ patz’ok chiwu.
8 A’b’anan k’e reetal, ninye aawe, naq tento taak’oxla sa’ laa k’a’uxl; toja’ naq tento taapatz’ we ma us, ut wi us, tink’e chi xamnak lix sa’ aach’ool; chi jo’kan taaweek’a naq us.
9 Wi b’an moko us ta maak’a’ xkomon a’an taaweek’a; taawanq b’an xwarjik aak’a’uxl, ut rik’in a’an taasachq sa’ aach’ool li k’a’ru moko us ta; jo’kan ut, moko tatruuq ta chixtz’iib’ankil li k’a’ru loq’, ka’ajwi’ wi k’eeb’il aawe inb’aan.
10 Anajwan, wi ta kanaw a’in katru raj chi jaltesink ru li aatin; a’b’anan moko aajel ta ru naq taajaltesi ru li aatin anajwan.
11 K’e reetal, aajel chaq ru naq kattikla; a’b’an katxuwak, ut ak xnume’ li kutan, ut moko aajel ta chik ru anajwan;
12 Xb’aan naq, ma ink’a’ nakak’e reetal naq kink’e tz’aqal xmetz’ew lin moos aj Jose, li k’eeb’il wi’ xtz’aqob’? Ut maajun eere kink’e sa’ tojb’a-maak.
13 B’aanu a’in li b’arwan katintaqla wi’, ut tat-usaaq. Tiikaqat chi paab’ank, ut maajun aaleek taaq’axtesi wi’ aawib’.
14 Xaqxooqat chi kaw sa’ li k’anjel katinb’oq wi’, ut jun rismalaq aajolom ink’a’ taasachq, ut tatwaklesiiq sa’ roso’jik li kutan. Amen.