Faaliliuga a Iosefa Samita (FIS)

O se teuteuga po o se faaliliuga o le Tusi Paia a le Tupu o Iakopo i le Faa-Peretania, lea na amata e le Perofeta o Iosefa Samita ia Iuni 1830. Na faatonuina o ia e le Atua e faia le faaliliuga ma na ia manatu i lea faaliliuga o se vaega o lona valaauga o se perofeta.

E ui lava ina faaiuina e Iosefa le tele o le faaliliuga ia Iulai 1833, ae sa faaāuāu pea lana galuega i le faia o teuteuga a o faia le sauniuniga o le tusi mo le lōmiga sei oo lava i lona maliu i le 1844. E ui lava ina lōmia e ia nisi vaega o le faaliliuga i le taimi a o soifua o ia, ae atonu e faia e ia nisi suiga faaopoopo pe ana ola pea o ia seia lomia le tusi atoa. Sa faasalalauina e Le Ekalesia Toefaatulagaina a Iesu Keriso o le Au Paia o Aso e Gata Ai le lomiga muamua o le faaliliuga musuia a Iosefa Samita i le 1867. E tele lomiga ua latou faia talu mai lenā taimi.

E tele mea na aoaoina e le Perofeta i le taimi o le faaliliuga. E tele vaega o le Mataupu Faavae ma Feagaiga na maua ona o lana galuega o le faaliliuga (e pei o le MF&F 76, 77, 91, ma le 132). Na tuuina atu foi e le Alii ia Iosefa ni faatonuga faapitoa mo le faaliliuga, na faamaumauina i le Mataupu Faavae ma Feagaiga (MF&F 37:1; 45:60–61; 76:15–18; 90:13; 91; 94:10; 104:58; 124:89). O le tusi a Mose ma le Iosefa Samita—Mataio, ua i ai nei i le Penina Tau Tele, na maua mai le Faaliliuga a Iosefa Samita.

O le Faaliliuga a Iosefa Samita na toefuatai mai ai nisi o mea manino ma le taua na aveesea mai le Tusi Paia (1 Ni. 13). E ui lava o lea tusi e le o le Tusi Paia aloaia a le Ekalesia, a o lenei faaliliuga ua tuuina mai ai ni vaaiga taua tele ma e aoga tele e malamalama ai i le Tusi Paia. O lea foi faaliliuga o se molimau i le valaauga paia ma le galuega a le Perofeta o Iosefa Samita.