Taulaga

I ona po anamua, o le taulaga o lona uiga o le faia lea ia paia pe faapaiaina se mea po o se tagata. A o le uiga i ona po nei o le tuuina atu lea o se mea po o le mafatia i le faatoina o mea o le lalolagi mo le Alii ma lona malo. O tagata o le Ekalesia a le Alii e tatau ona lotomalilie e faataulagaina mea uma lava mo le Alii. Na aoao mai Iosefa Samita e faapea “o se lotu e lē manaomia ai le faataulagaina o mea uma, e lē lava le mana e faatupu ai le faatuatua lea e manaomia mo le ola ma le faaolataga.” I le vaaiga i le faavavau, o faamanuiaga e maua i taulaga e sili atu lava nai lo soo se mea ua tuuina atu po ua faatoina. O se meaalofa i le Alii. I le Feagaiga Tuai e masani ona faaaoga lea upu e faatatau i taulaga e osia po o taulaga mu. I le Ekalesia i ona po nei ua faaaoga ai taulaga anapogi ma isi taulaga e faia i le lotomalie (e aofia ai le taimi, taleni, ma mea ua maua) e fesoasoani ai i e matitiva ma isi faamoemoega aoga.

Ina ua uma ona tulieseina Atamu ma Eva mai le Faatoaga o Etena, sa tuuina atu e le Alii ia te i laua le tulafono o le taulaga. O lenei tulafono sa aofia ai le ofoina atu o ulumatua o a laua lafu. O nei taulaga sa faatusaina i le taulaga lea o le a faia e le Alo e Toatasi na Fanaua o le Atua (Mose 5:4–8). Sa faaauau pea le faia o nei taulaga seia oo i le maliu o Iesu Keriso, lea na faamuta ai le faia o taulaga i manu i le avea ai o se sauniga o le talalelei (Alema 34:13–14). I le Ekalesia i ona po nei ua taumamafa tagata i le faamanatuga o le areto ma le vai i le faamanatuina o le taulaga a Iesu Keriso. Ua talosagaina foi uso o le Ekalesia a Iesu Keriso i ona po nei e tuuina atu le taulaga ma le loto momomo ma le agaga salamo (3 Ni. 9:19–22). O le uiga o lenei mea ua latou faamaualalo, salamo, ma ua latou lotomalilie e usiusitai i poloaiga a le Atua.