Tavita

O se tupu o Isaraelu anamua i le Feagaiga Tuai.

O Tavita o se atalii o Iese i le ituaiga o Iuta. O se taulealea lototele na ia fasia se leona, ma se urosa, ma le Filisitia tinoese o Koliata (1 Samu. 17). Na filifilia ma faauuina Tavita e fai ma tupu o Isaraelu. E pei lava o Saulo, i lona olaga faatagatamatua sa agasala o ia i solitulafono mamafa, ae peitai, e le pei o Saulo, sa mafai e ia ona maua le loto salamo moni. O lea sa mafai ai e ia ona maua le faamagaloga, sei vagana ai le fasiotiga o Uria (MF&F 132:39). E mafai ona vaevaeina lona olaga i vaega e fa: (1) i Peteleema, i le mea na avea ai o ia o se leoleo mamoe (1 Samu. 16–17); (2) i le maota o le Tupu o Saulo (1 Samu. 18:1–19:18); (3) i le avea o se maumausolo (1 Samu. 19:18–31:13; 2 Samu. 1:1–27); (4) i le avea ma tupu ia Iuta i Heperona (2 Samu. 2–4); ma sa avea mulimuli ane ma tupu ia Isaraelu uma (2 Samu. 5–24; 1 Tu. 1:1–2:11).

O le agasala a Tavita i le mulilua ma Patesepa na sosoo mai ai le tele o puapuaga lea na faaleagaina ai le luasefulu tausaga mulimuli o lona olaga. O le atunuu i lona tulaga aoao sa manuia i le taimi o lana nofoaiga, a o Tavita lava ia na mafatia i taunuuga o ana agasala. Sa i ai i taimi uma lava le feitagai faaleaiga, e pei o le mea na tupu i le va o Apisaloma ma Atonia, lea na iu i se fouvalega faaaliali. O nei mea na tutupu o le faataunuuga lea o mea na fai atu ai Natano le perofeta ia Tavita ona o lana agasala (2 Samu. 12:7–13).

E ui lava i nei faalavelave, ae na silisili lava le maoae o le nofoaiga a Tavita i le talafaasolopito o Isaraelu, auā (1) na tuufaatasi e ia ituaiga uma i se malo e tasi, (2) na ia faamautuina le mauaina o le atunuu, (3) na ia faavaeina le malo i le tapuaiga moni ma sa avea ai le finagalo o le Atua ma tulafono o Isaraelu. Ona o nei mafuaaga, sa taʼua mulimuli ane ai le nofoaiga a Tavita o tausaga faaauro o le atunuu ma le faatusa o le vaitaimi sili ona mamalu pe a afio mai le Mesia (Isai. 16:5; Iere. 23:5; Eseki. 37:24–28).

O le olaga o Tavita ua faailoa mai ai e manaomia mo tagata uma le tumau i le amiotonu seia oo i le iuga. A o talavou, sa taʼua o ia o se tagata ua “tatau ma le finagalo” o le Alii (1 Samu. 13:14); a o avea o se tagata matua, sa tautala o ia e ala i le Agaga ma sa maua e ia faaaliga e tele. Ae peitai sa totogi e ia se sala mamafa i lona le usiusitai i poloaiga a le Atua (MF&F 132:39).