Numera

O le tusi lona fa i le Feagaiga Tuai. Na tusia e Mose le tusi o Numera. O le tusi o Numera ua faamatala mai ai le tala o le malaga a Isaraelu mai le Mauga o Sinai e oo atu i laufanua o Moapi i le tuaoi o Kanana. O se tasi o lesona taua ua aoao mai i lenei tusi e faapea o le nuu o le Atua e ao ona savavali i le faatuatua, i le faalagolago atu i ana folafolaga, pe afai latou te fia faaauau pea ma le manuia. Ua faamatala mai i lenei tusi le faasalaga a le Atua ia Isaraelu ona o le lē usiusitai ma ua tuuina mai ai foi faamatalaga e uiga i tulafono a Isaraelu. E pogai mai le igoa o lenei tusi i tusiga igoa na faia ia iloa ai le aofai o le fanau a Isaraelu (Numera 1–2, 26).

O le mataupu 1–10 ua faamatala ai le sauniuniga a Isaraelu mo le malaga ese mai Sinai. O le mataupu 11–14 ua faamatala mai ai le savaliga, le auina atu o tagata sipai i Kanana, ma le teena e Isaraelu o lo latou ulufale atu i le laueleele folafolaina. O le mataupu 15–19 ua iloa ai le tele o tulafono eseese ma mea na tutupu i le talafaasolopito. O le mataupu 20–36 o le tala lea i le tausaga mulimuli o le nuu i le vao.