Fesoasoaniga mo Suesuega
Atua


Atua

O loo i ai tagata mavaevae e toatolu i le Aigaatua: O le Atua, le Tamā Faavavau; lona Alo, o Iesu Keriso; ma le Agaga Paia. Tatou te talitonu ia te i latou uma (MFF 1:1). Mai faaaliga o aso e gata ai ua tatou iloa ai o le Tamā ma le Alo o loo i ai ni tino o aano ma ivi ma o le Agaga Paia o se peresona agaga, e leai se tino aano ma ivi (MF&F 130:22–23). O nei tagata e toatolu e atoatoa i le lotogatasi ma ua tasi i le faamoemoe ma le mataupu faavae (Ioane 17:21–23; 2 Ni. 31:21; 3 Ni. 11:27, 36).

O le Atua le Tamā

O le mea moni lava o le Tamā, po o Elohima, o ia lea e faatatau tonu i ai le suafa lea o le Atua. Ua taʼua o ia o le Tamā auā o ia o le tamā o o tatou agaga (Mala. 2:10; Numera 16:22; 27:16; Mata. 6:9; Efe. 4:6; Epe. 12:9). O le Atua le Tamā o le pule aoao o le iunivesi. E ia te ia le mana uma (Kene. 18:14; Alema 26:35; MF&F 19:1–3), e silafia mea uma (Mata. 6:8; 2 Ni. 2:24), ma e i ai o ia i mea uma lava e ala i lona Agaga (Sala. 139:7–12; MF&F 88:7–13, 41). E i ai i le tagata se sootaga faapitoa ma le Atua ua tulaga ese ai o ia mai isi mea uma na faia e le Atua: o alii ma tamaitai o fanau agaga a le Atua (Sala. 82:6; 1 Ioa. 3:1–3; MF&F 20:17–18).

E itiiti ni talafaamaumau e uiga i le faaali mai po o le fetalai mai o le Tamā i tagata. Ua fai mai tusitusiga paia na fetalai atu o ia ia Atamu ma Eva (Mose 4:14–31) ma sa ia faailoa atu Iesu Keriso i le tele o taimi (Mata. 3:17; 17:5; Ioane 12:28–29; 3 Ni. 11:3–7). Na faaali atu o ia ia Setefano (Galu. 7:55–56) ma Iosefa Samita (IS—T 1:17). Mulimuli ane sa faaali atu o ia ia Iosefa Samita ma Sini Rikitone (MF&F 76:20, 23). O i latou o e e alolofa i le Atua ma faamamāina i latou lava i ona luma, e tuuina mai i ai e le Atua i ni isi taimi le avanoa e vaai ai ma iloa mo i latou lava o ia o le Atua (Mata. 5:8; 3 Ni. 12:8; MF&F 76:116–118; 93:1).

O le Atua le Alo

O le Atua ua lauiloa o Ieova o le Alo, o Iesu Keriso (Isai. 12:2; 43:11; 49:26; 1 Kori. 10:1–4; 1 Timo. 1:1; Faaa. 1:8; 2 Ni. 22:2). E galue Iesu i lalo o le taitaiga a le Tamā ma e atoatoa le lotogatasi ma ia. O tagata uma lava o ona uso ma tuafafine, auā o ia o le ulumatua o fanau agaga uma a Elohima. O ni isi mau ua taʼua ai o ia i le upu Atua. Mo se faataitaiga, ua faapea mai le mau “Na faia e le Atua le lagi ma le lalolagi” (Kene. 1:1), ae peitai o Iesu lava o le Tufuga na faia mea uma i lalo o le taitaiga a le Atua le Tamā (Ioane 1:1–3, 10, 14; Epe. 1:1–2).

O le Atua le Agaga Paia

O le Agaga Paia o se Atua foi ma ua taʼua o le Agaga Sa, o le Agaga, ma le Agaga o le Atua, ma isi igoa ma suafa faapena. O le fesoasoani a le Agaga Paia, e mafai ai e le tagata ona iloa le finagalo o le Atua le Tamā, ma iloa ai foi o Iesu o le Keriso (1 Kori. 12:3).