Peteru
I le Feagaiga Fou, sa lauiloa ai muamua Peteru o Simeona po o Simona (2 Pete. 1:1), o se tagata faifaiva o Petesaita sa nofo i Kapanaumi faatasi ma lana avā. Sa faamaloloina e Iesu le maʼi o le tina o le avā a Peteru (Mare. 1:29–31). Sa valaauina Peteru faatasi ma lona uso o Aneterea e avea ma soo o Iesu Keriso (Mata. 4:18–22; Mare. 1:16–18; Luka 5:1–11). O lona igoa Faa-Aramaika, o Kefa, o lona uiga o se “tagatavāai” po o le “maa”, na tuuina atu e le Alii lea igoa ia te ia (Ioane 1:40–42; FIS, Ioane 1:42). E ui ina taʼua mai i le Feagaiga Fou ni isi o vaivaiga faaletino o Peteru, ae ua faapea foi ona faamalamalama ai i le Feagaiga Fou na ia faatoilaloina na vaivaiga ma sa faamalosia ai o ia e ala i lona faatuatua ia Iesu Keriso.
Na tautino atu e Peteru o Iesu o le Keriso ma le Alo o le Atua (Ioane 6:68–69), ma sa filifilia o ia e le Alii e umia ki o le malo i le lalolagi (Mata. 16:13–18). I le Mauga o Liua, na vaai ai Peteru i le Faaola ua liua, faatasi ai ma Mose ma Elaia (Elia) (Mata. 17:1–9).
Sa avea Peteru ma aposetolo sili i ona aso. Ina ua mavae le maliu, le toetu, ma le afio aʼe o le Faaola, sa ia faapotopotoina faatasi le Ekalesia ma sa ia taitaia le valaauina o se Aposetolo e sui ia Iuta le Sekara (Galu. 1:15–26). Sa faamaloloina e Peteru ma Ioane se alii na pipili i lona fanau mai (Galu. 3:1–16) ma sa tatalaina i se ala faavavega mai le falepuipui (Galu. 5:11–29; 12:1–19). O le galuega a Peteru na tatalaina ai muamua le talalelei i tagata o Nuuese (Galu. 10–11). I nei aso e gata ai, na o mai ai Peteru, faatasi ma Iakopo ma Ioane mai le lagi ma sa faaeeina atu ai le Perisitua Mekisateko ma ki o i ai i luga o Iosefa Samita ma Oliva Kaotui (MF&F 27:12–13; 128:20).
Tusi muamua a Peteru
O le tusi muamua sa tusia mai “Papelonia” (ai lava o Roma) ma sa auina atu ai i le Au Paia i le mea ua taʼua nei o Asia Minoa i se taimi ina ua amata e Niro ona sauaina tagata Kerisiano.
O le mataupu 1 o loo tautala i le muai faauuina o Keriso i le tofi o le avea ma Togiola. O le mataupu 2–3 ua faamalamalama mai ai o Keriso o le maatulimanu sili o le Ekalesia, ma e umia e le Au Paia se perisitua tau tupu, ma sa talai atu Keriso i agaga i le falepuipui. O le mataupu 4–5 ua faamalamalama mai ai le mafuaaga na talaʼi atu ai le talalelei i e ua oti ma le mafuaaga e tatau ai ona fafagaina e toeaina le lafu mamoe.
Tusi lona lua a Peteru
O le mataupu 1 ua apoapoai atu i le Au Paia ia faia ia mausali o latou valaauga ma le filifiliga. O le mataupu 2 ua tuuina mai ai se lapataiga e faasaga i aoao pepelo. O le mataupu 3 o loo tautala i aso e gata ai ma le afio faalua mai o Keriso.