Mataio
O se Aposetolo a Iesu Keriso ma lē na tusia le tusi muamua i le Feagaiga Fou. O Mataio, o le Iutaia sa avea o se ao lafoga mo le malo o Roma i Kapanaumi, atonu o se auauna ia Herota Anetipa. Sa igoa o ia ia Levi a o lei liliu o ia, o le atalii o Alefaio (Mare. 2:14). Ina ua uma ona valaauina o ia o se soo o Iesu, sa faia e ia se taumafataga lea sa faatasi ai le Alii (Mata. 9:9–13; Mare. 2:14–17; Luka 5:27–32). Atonu sa i ai ia Mataio se malamalamaga lautele e uiga i tusitusiga paia o le Feagaiga Tuai ma sa mafai ai e ia ona iloa le faataunuuga auiliili o valoaga i le soifuaga o le Alii. E itiiti ni mea ua iloa i le olaga mulimuli ane o lenei Aposetolo. Ua faailoa mai e se tasi talatuu e faapea na maliu o ia i se oti faamaturo.
O le Evagelia a Mataio
O le tusi muamua i le Feagaiga Fou. Atonu sa tusia faapitoa lava le Evagelia a Mataio mo le faaaogaina e tagata Iutaia i Palesitina. O loo faaaoga i lenei tusi le tele o upusii mai le Feagaiga Tuai. O le faamoemoega autu o Mataio o le faailoa atu lea e faapea o Iesu o le Mesia lava lea na fai mai ai perofeta o le Feagaiga Tuai. Sa ia faamamafaina foi e faapea o Iesu o le Tupu ma le Faamasino o tagata uma.
Mo se otootoga o mataupu, tagai i “Evagelia (Tusi).”