Papatiso, Papatisoga

E maua mai se upu Eleni o lona uiga, o le “fufui” po o le “faatofu.” O le papatisoga e ala i le faatofuina i le vai e se tasi ua i ai le pule o le sauniga muamua o le talalelei ma e manaomia i le avea ai o se uso O Le Ekalesia a Iesu Keriso o le Au Paia o Aso e Gata Ai. E muamua le faatuatua ia Iesu Keriso ma le salamo i le papatisoga. Ona sosoo ai lea ma le taliaina o le Agaga Paia ina ia atoatoa ai (2 Ni. 31:13–14). O le papatisoga i le vai ma le agaga e tatau ona maua ae lei mafai ona ulufale atu se tasi i le malo selesitila. O Atamu o le tagata muamua na papatisoina, (Mose 6:64–65). Sa papatisoina foi Iesu e faataunuu ai mea tonu uma ma faaali atu ai le ala mo tagata uma (Mata. 3:13–17; 2 Ni. 31:5–12).

Ona e lē maua e tagata uma i le lalolagi le avanoa e talia ai le talalelei a o i ai i le olaga faaletino, o lea na tuuina mai ai e le Alii le pule e fai ai papatisoga e fai ma sui mo e ua oti. O lea, o i latou o e ua talia le talalelei i le lalolagi o agaga e mafai ona agavaa i le ulufale atu i le malo o le Atua.