Malumalu, Maota o le Alii

O le mea moni lava o le maota lea o le Alii. E masani lava ona poloaiina e le Alii lona nuu e fausia malumalu, o maota paia ia e fai ai e le Au Paia agavaa sauniga paia o le talalelei mo i latou lava ma e ua maliliu. E asiasi mai le Alii i ona malumalu, ma ia maota ua silisili ona paia i fale uma ua saunia mo tapuaiga.

O le fale fetafai na fausia e Mose ma le fanauga a Isaraelu o se malumalu e mafai ona feaveai. Sa faaaogaina e le fanauga a Isaraelu lea maota i le taimi o la latou esoto mai Aikupito.

O le malumalu e sili ona lauiloa o loo taʼua i le Tusi Paia o le malumalu lea na faia e Solomona i Ierusalema (2 No. 2–5). Na faaumatia lea malumalu i le 600 T.L.M. e tagata Papelonia ma sa toe fausia lea malumalu e Serupapelu e latalata atu i le selau tausaga mulimuli ane (Esera 1–6). O se vaega o lenei malumalu na mu i le 37 T.L.M., ma sa toe fausia lea malumalu i se taimi mulimuli ane e Herota le Sili. Sa faaleagaina e tagata Roma le malumalu lenei i le 70 T.A.

I le Tusi a Mamona, o soo amiotonu o le Atua sa taitaiina atu i latou e fausia malumalu ma tapuai ai i totonu o malumalu (2 Ni. 5:16; Mosaea 1:18; 3 Ni. 11:1). O le fausia ma le faaaogaina tatau o se malumalu o faailoga ia o le Ekalesia moni i soo se tisipenisione, e aofia ai le Ekalesia toefuataiina i ō tatou aso. O le Malumalu o Katelani o le malumalu muamua lea na fausia ma faapaiaina i le Alii i lenei tisipenisione. Talu mai lena taimi e tele malumalu ua fausia ma faapaiaina i le tele o laueleele i le lalolagi.