Moronae, le Atalii o Mamona
O le perofeta sa Nifaē mulimuli i le Tusi a Mamona (e tusa o le 421 T.A.). A o lei maliu Mamona, na ia tuuina atu se talafaamaumau faasolopito na taʼua o papatusi a Mamona i lona atalii o Moronae (UaM 1:1). Na faaiuina e Moronae le tuufaatasiga o papatusi a Mamona. Na ia faaopoopoina le mataupu 8 ma le 9 i le tusi a Mamona (Mamona 8:1). Na ia otootoina ma tuu i ai le tusi a Eteru (Eteru 1:1–2) ma sa faaopoopo i ai lana lava tusi na taʼua o le tusi a Moronae (Moro. 1:1–4). Na faamaufaailogaina e Moronae o papatusi ma sa ia natia ai i le mauga o Kumora (Mamona 8:14; Moro. 10:2). I le 1823 na auina mai ai Moronae o se tagata toetu e faaali atu le Tusi a Mamona ia Iosefa Samita (IS—T 1:30–42, 45; MF&F 27:5). Sa ia aoaoina le perofeta talavou i tausaga taitasi e amata mai i le 1823 e oo i le 1827 (IS—T 1:54) ma sa iu ina tuu atu ai papatusi ia te ia i le 1827 (IS—T 1:59). Ina ua uma le faaliliuga, na toe faafoi atu e Iosefa Samita papatusi ia Moronae.
O le tusi a Moronae
O le tusi mulimuli lea i totonu o le Tusi a Mamona. Sa tusia lea tusi e le perofeta mulimuli o sa Nifaē, o Moronae. O le mataupu 1–3 o loo faamatala mai ai le faaumatiaga mulimuli o sa Nifaē, ua tuuina mai ai faatonuga i le faaeeina atu o le Agaga Paia ma le perisitua. O le mataupu 4–5 ua faamatala mai ai le ala sao e fai ai le faamanatuga. O le mataupu 6 ua tuu mai ai le aotelega o le galuega a le Ekalesia. O le mataupu 7–8 o lauga ia e uiga i uluai mataupu autu o le talalelei, e aofia ai aoaoga a Mamona e uiga i le faatuatua, faamoemoe, ma le alofa mama ma le ala e iloa ai le lelei ma le leaga (Moro. 7), ma le faamalamalamaga a Mamona e faapea o tamaiti laiti ua faaolaina ia Keriso ma e le manaomia le papatisoga (Moro. 8). O le mataupu 9 ua faamatala mai ai le amio leaga o le malo o sa Nifaē. O le mataupu 10 o le savali mulimuli a Moronae ma ua aofia ai ma le ala e iloa ai le moni o le Tusi a Mamona (Moro. 10:3–5).