Toeaina

O le upu toeaina e tele ala o loo faaaoga ai i le Tusi Paia. I le Feagaiga Tuai e masani lava ona faatatau i alii matutua o se ituaiga, o e masani ona faatuatuaina i mataupu faalemalo (Kene. 50:7; Iosua 20:4; Ruta 4:2; Mata. 15:2). O o latou tausaga ma lo latou potomasani ua faatauaina ai a latou fautuaga. O lo latou tulaga e lē naʼo se valaauga faaleperisitua.

Sa i ai foi toeaina na faauuina i le Perisitua Mekisateko i taimi o le Feagaiga Tuai (Esoto 24:9–11). I le Feagaiga Fou, o loo taʼua ai toeaina o se tofiga o le perisitua i le Ekalesia (Iako. [FF] 5:14–15). O sa Nifaē sa i ai foi toeaina na faauuina i le perisitua (Alema 4:7, 16; Moro. 3:1). I lenei tisipenisione, o Iosefa Samita ma Oliva Kaotui o uluai toeaina na faauuina (MF&F 20:2–3).

O le Toeaina o le igoa lea ua tuuina atu ia i latou uma e umia le Perisitua Mekisateko. Mo se faataitaiga, o alii faifeautalai ua taʼua o toeaina. O le Aposetolo foi e taʼua o se toeaina, ma e tatau foi ona taʼua ai uso o le Korama a le Toasefululua po o Korama a Fitugafulu i lenei igoa (MF&F 20:38; 1 Pete. 5:1). O tiute o toeaina ua faauuina o le Ekalesia i ona po nei na tuuina mai i faaaliga i aso e gata ai (MF&F 20:38–45; 42:44; 46:2; 107:12).