Kenese

O se upu Eleni o lona uiga o le “pogai” po o le “amataga.” O le tusi o Kenese o le tusi muamua o le Feagaiga Tuai ma sa tusia e le perofeta o Mose. O lea tusi o loo tuuina mai ai se tala i amataga e tele, e pei o le foafoaga o le lalolagi, le tuuina o meaola ma tagata i le lalolagi, le paū o Atamu ma Eva, le faʼaaliga o le talalelei ia Atamu, le amataga o ituaiga ma nuu, le pogai o gagana eseese i Papelu, ma le amataga o le aiga FaaAperaamo lea na oo atu ai i le faavaeina o le aiga o Isaraelu. O le galuega a Iosefa i le avea ma se e faasaoina Isaraelu o loo faamamafaina mai i le Kenese.

Ua faamaonia ma faʼamanino i faʼaaliga i aso e gata ai le talafaʼamaumau a Kenese (1 Ni. 5; Eteru 1; Mose 1–8; Ape. 1–5).

I le tusi a Kenese, o le mataupu 1–4 ua faamatala mai ai le foafoaga o le lalolagi ma le faavaega o le aiga o Atamu. O le mataupu 5–10 ua faamaumauina ai le talafaasolopito o Noa. O le mataupu 11–20 ua faamatala mai ai e uiga ia Aperaamo ma lona aiga seia oo atu i le taimi o Isaako. O le mataupu 21–35 ua faamatala mai ai e uiga i le aiga o Isaako. O le mataupu 36 ua faamatala mai ai e uiga ia Esau ma lona aiga. O le mataupu 37–50 ua faamatala mai ai le aiga o Iakopo ma le tala e uiga ia Iosefa i le faatauina atu i Aikupito ma lana galuega i le laveaiina o le aiga o Isaraelu.