Mataupu Faavae ma Feagaiga

O se tuufaatasiga lea o faaaliga paia ma tautinoga musuia i aso e gata ai. Na tuuina mai e le Alii nei faaaliga ia Iosefa Samita ma le toatele o ona sui mo le faavaeina ma le taitaiga o le malo o le Atua i le lalolagi i aso mulimuli. O le Mataupu Faavae ma Feagaiga o se tasi o tusi faavae o tusitusiga paia i Le Ekalesia a Iesu Keriso o le Au Paia o Aso e Gata Ai, faatasi ai ma le Tusi Paia, le Tusi a Mamona, ma le Penina Tau Tele. Ae ui i lea, e tulaga ese lava le Mataupu Faavae ma Feagaiga, auā e le o se faaliliuga o ni tusitusiga mai anamua, ae na tuuina mai e le Alii nei faaaliga i ana perofeta filifilia i ona po nei ina ia mafai ai ona toefuatai mai lona malo. I nei faaaliga e mafai ai e se tasi ona faalogo i le leo malū ma le mausali o le Alii o Iesu Keriso (MF&F 18:35–36).

Na saunoa mai le Perofeta o Iosefa Samita o le Mataupu Faavae ma Feagaiga o le faavae lea o le Ekalesia i aso mulimuli ma se faamanuiaga i le lalolagi (MF&F 70:ulutala). O faaaliga o loo i ai ua faailoa mai ai le galuega o le saunia mo le afio faalua mai o le Alii, i le faataunuʼuina o upu uma na fai mai ai perofeta talu le amataga o le lalolagi.