Isaia
O se perofeta o le Feagaiga Tuai o lē na vavalo mai i le 740–701 T.L.M. I le avea o se fautua sili a le Tupu o Esekia, sa malosi tele le uunaiga faalelotu ma faalemālō a Isaia.
Na sili atu ona taʼua soo e Iesu le perofeta o Isaia nai lo se isi lava perofeta. Sa taʼua soo foi Isaia e Peteru, Ioane, ma Paulo i le Feagaiga Fou. O le Tusi a Mamona ma le Mataupu Faavae ma Feagaiga o loo i ai le tele o upusii mai ia Isaia nai lo se isi lava perofeta ma ua maua ai foi se fesoasoani tele i le faamatalaina o tusitusiga a Isaia. Sa aoaoina e Nifae lona nuu mai tusitusiga a Isaia (2 Ni. 12–24; Isai. 2–14). Sa taʼu atu e le Alii i tagata sa Nifaē e “silisili lava upu a Isaia” ma o mea uma na valoia e Isaia o le a faataunuuina (3 Ni. 23:1–3).
O le tusi a Isaia
O se tusi i le Feagaiga Tuai. O le tele o valoaga a Isaia e faatatau lava i le afio mai o le Togiola, i lana misiona i le lalolagi (Isai. 9:6) ma le avea ma Tupu Silisili i le aso mulimuli (Isai. 63). Sa ia valoia foi mea e tele e uiga i le lumanai o Isaraelu.
O le mataupu 1 o se faatomuaga i le tusi atoa lava. Isai. 7:14; 9:6–7; 11:1–5; 53:1–12; ma le 61:1–3 o loo faaataata mai ai le misiona a le Faaola. O le mataupu 2, 11, 12, ma le 35 o loo faamatala mai ai mea e tutupu i aso e gata ai, pe a toefuataiina mai le talalelei, o le a faapotopotoina Isaraelu, ma le laueleele naumati o le a fua mai e pei o le rosa. O le mataupu 29 o loo i ai se valoaga i le oo mai o le Tusi a Mamona (2 Ni. 27). O le mataupu 40–46 ua tautino mai ai le silisili o Ieova o le Atua moni e sili atu i lo atua tupua o tagata e ifo i tupua. O mataupu o loo totoe, 47–66, e faatatau i le toefuataiga mulimuli o Isaraelu ma le faatuina o Siona, atoa ma le faatasi ai o le Alii ma lona nuu.