Nāvū, Ilinoi (U.S.A.)

O se aai na faavaeina e le Au Paia o Aso e Gata Ai i le 1839 i le setete o Ilinoi. Sa tu lenei aai i tafatafa ane o le Vaitafe o Misisipi, e lata i le luaselau maila i le agai i luga o le vaitafe mai Saini Luisi.

Ona o sauaga i le setete o Misuri, na malaga atu ai le Au Paia e tusa o le luaselau maila i mātū i sasaʼe, e sopo atu i le Vaitafe o Misisipi, ma oo atu ai i Ilinoi, i le mea na latou maua ai ni tulaga e sili atu ona lelei. Mulimuli ane, na faatau mai e le Au Paia le laueleele e latalata i le aai o Komese e lei faatoaina. O lenei laueleele e pei o se pala ma naʼo ni nai fale itiiti sa i ai. Sa eli e le Au Paia alavai e faamātūtū ai le laueleele ma fausia fale. Sa avatu e Iosefa Samita lona aiga i se fale ogalaau itiiti. O le aai lea na taʼua o Komese na sui ia Nāvū, e mulimuli i le upu Eperu o le “matagofie.”

O vaega e tele o le Mataupu Faavae ma Feagaiga na tusia i Nāvū (MF&F 124–129, 132, 135). Na faatonuina atu i le Au Paia e fausia se malumalu i Nāvū (MF&F 124:26–27). Na latou fausia ai le malumalu ma faatulagaina ai siteki o Siona a o lei tuliesea i latou mai i o latou fale i le 1846. O le taunuuga o lenei sauaga na tuua ai e le Au Paia lea eria ona sa latou o atu ai lea i sisifo.