Faaaliga a Ioane

O le tusi mulimuli i le Feagaiga Fou, o loo i ai ni faaaliga na tuuina atu ia Ioane le Aposetolo. Na faatagaina o ia e vaai i le talafaasolopito o le lalolagi, aemaise lava i aso e gata ai (Faaa. 1:1–2; 1 Ni. 14:18–27; MF&F 77). O le Faaaliga a Ioane ua taʼua foi o le Apokalipe.

Na maua e Ioane lenei faaaliga i le aso o le Alii i le motu o Patamo (Faaa. 1:9–10), i tua atu o le tolotolo o Asia, e le mamao ese mai i Efeso. O le aso tonu na maua ai le faaaliga e le o iloa.

O ki e malamalama ai i le tusi lenei o loo aofia ai i le 1 Nifae 14:18–27 ma le MF&F 77 (Eteru 4:15–16).

O le mataupu 1–3 o faatomuaga ia i le tusi ma tusi na auina atu i ekalesia e fitu i Asia. Sa tusia e Ioane ia tusi e fesoasoani atu ai i le Au Paia e fōia ai nisi o faafitauli faapitoa. O le mataupu 4–5 o loo tusia ai faaaliga vaia na maua e Ioane na faailoa mai ai le maoae ma le mana amiotonu o le Atua ma Keriso. O le mataupu 6–9, 11, na tusia ai e Ioane lona vaai i se tusi na faamau i faamaufaailoga e fitu, o faamau taitasi ua fai ma sui o le afe tausaga taitasi o le talafaasolopito faaletino o le lalolagi. O nei mataupu o loo faamatala mai ai mea na tutupu i le faamaufaailoga lona fitu (tagai i le Faaa. 8–9; 11:1–15). O le mataupu 10 ua faamatala mai ai se tusi na ai e Ioane. O le tusi ua fai ma sui o le misiona o le a ia faia i le lumanai. O le mataupu 12 ua tusia ai se faaaliga vaaia e uiga i le leaga na amata i le lagi ina ua fouvale ma tulieseina Satani. O le taua na amata mai iina o loo faaāuāu pea ona tauina i luga o le lalolagi. O le mataupu 13, 17–19, o loo faamatalaina ai e Ioane le amioleaga o malo faalelalolagi e pulea e Satani ma sa tusia ai lo latou malaia, e aofia ai le faaumatiaga mulimuli o le leaga. O le mataupu 14–16, o loo faamatala ai le amiotonu a le Au Paia i le lotolotoi o le amioleaga pe a toetoe ina oo mai le afio mai faalua o Keriso. O le mataupu 20–22 ua faamatala mai ai le Meleniuma, le aai matagofie o le Ierusalema Fou, ma mea mulimuli e tutupu i le talafaasolopito o le lalolagi.