Perisitua Mekisateko

O le Perisitua Mekisateko o le perisitua maualuga pe sili atu; o le Perisitua Arona o le perisitua maualalo. O le Perisitua Mekisateko e aofia ai ki o faamanuiaga faaleagaga i le Ekalesia. E ala mai i sauniga o le perisitua maualuga, e faaali mai ai le mana o le amioatua i tagata (MF&F 84:18–25; 107:18–21).

Sa faaali atu muamua e le Atua lenei perisitua maualuga ia Atamu. Sa i ai lenei pule i tisipenisione uma lava i le au peteriaka ma le au perofeta (MF&F 84:6–17). Sa taʼua muamua lenei pule o le Perisitua Paia, e tusa ma le Faatulagaga a le Alo o le Atua. Ma sa taʼua mulimuli ane o le Perisitua Mekisateko (MF&F 107:2–4).

Ina ua lē mafai e le fanauga a Isaraelu ona ola ai i avanoa ma feagaiga o le Perisitua Mekisateko, na aveese ai e le Alii le tulafono maualuga ma sa tuuina atu ia te i latou se perisitua maualalo ma se tulafono maualalo (MF&F 84:23–26). Sa taʼua ia mea o le Perisitua Arona ma le tulafono a Mose. Ina ua afio mai Keriso i le lalolagi, na ia toe fuataiina le Perisitua Mekisateko i tagata Iutaia ma sa amata ai ona toe atinae le Ekalesia ia te i latou. Ae ui i lea, sa toe aveesea le perisitua ma le Ekalesia e ala i le liliuese. Mulimuli ane sa toe fuataiina mai ia mea e ala ia Iosefa Samita, Laitiiti (MF&F 27:12–13; 128:20; IS—T 1:73).

E aofia i le Perisitua Mekisateko tofiga o le toeaina, faitaulaga sili, peteriaka, fitugafulu, ma le Aposetolo (MF&F 107). O le a avea pea le Perisitua Mekisateko o se vaega o le malo o le Atua i le lalolagi.

O le Peresitene O Le Ekalesia a Iesu Keriso o le Au Paia o Aso e Gata Ai o le peresitene lea o le perisitua maualuga po o le Perisitua Mekisateko, ma e umia e ia ki uma lava e tau i le malo o le Atua i le lalolagi. O le valaauga o le Peresitene e nao le toatasi lava le tagata na te umia i le taimi e tasi, ma e naʼo ia lava lea i le lalolagi ua faatagaina ona faaaoga ki uma o le perisitua (MF&F 107:64–67; MF&F 132:7).