Fesoasoaniga mo Suesuega
Toetu


Toetu

O le toefaatasia lea o le tino agaga ma le tino faaletino o aano ma ivi pe a mavae le oti. Pe a mavae le toetutu, e lē toe tuueseeseina le agaga ma le tino, ma o le a avea ai le tagata ma tagata tino ola pea. O tagata uma lava na fananau mai i le lalolagi o le a toetutu mai aua ua manumālo Keriso i le oti (1 Kori. 15:20–22).

O Iesu Keriso o le tagata muamua lea na toetu mai i lenei lalolagi (Galu. 26:23; Kolo. 1:18; Faaa. 1:5). Ua tuuina mai e le Feagaiga Fou faamaoniga e tele e uiga i le toetu mai o Iesu ma lona tino faaletino: sa tuufua lona tuugamau, sa ai o ia i iʼa ma le meli, sa ia te ia se tino o aano ma ivi, sa paʼi atu tagata ia te ia, ma sa fai mai agelu ua toetu mai o ia (Mare. 16:1–6; Luka 24:1–12, 36–43; Ioane 20:1–18). Ua faamaonia i faaaliga i aso e gata ai le moni o le toetu mai o Keriso ma tagata uma (Alema 11:40–45; 40; 3 Ni. 11:1–17; MF&F 76; Mose 7:62).

O le a le toetutu mai tagata uma i le mamalu e tasi (1 Kori. 15:39–42; MF&F 76:89–98), o le a lē toetutu mai foi tagata uma i le taimi e tasi (1 Kori. 15:22–23; Alema 40:8; MF&F 76:64–65, 85). E toatele le au paia na toetutū mai ina ua mavae le toetu mai o Keriso (Mata. 27:52). O le a toetutu mai e amiotonu e muamua i e amioleaga ma o le a tulai i le toetutu muamua (1 Tesa. 4:16); o tagata agasala e lē salamō o le a tulaʼi mai i le toetutu mulimuli (Faaa. 20:5–13; MF&F 76:85).