Timemetelo lesiseMtsetfweni 2
INcwadzi yaMormon ifundzisa kutsi “bonkhe bayafana kuNkulunkulu,” lokufaka ekhatsi “lomnyama nalomhlophe, loboshiwe nalokhululekile, wesilisa newesifazane” (2 Nefi 26:33). Kuwo wonkhe umlandvo weliBandla, bantfu bato tonkhe tinhlanga kanye nebuve emaveni lamaningi babhajatisiwe futsi baphila ngekwetsembeka njengemalunga eliBandla. Ngesikhatsi saJoseph Smith, emalunga lambalwa ebesilisa labamnyama abekwa ebuphristini. Ekucaleni emlandvweni walo, baholi beliBandla bayekela kunika buphristi kubesilisa labamnyama lababesitukulwane sase-Afrika. Kute lokucacisako emibhalweni yeliBandla ngemvelaphi yalomkhuba. Baholi belibandla bebakholwa kutsi sembulo lesivela kuNkulunkulu sasidzingeka kute kuguculwe lomkhuba futsi bafuna kwelulekwa ngemthandazo. Lesi sembulo sefika kuMengameli weliBandla Spencer W. Kimball futsi sacinisekiswa kulabanye baholi belibandla eThempelini laseSalt Lake mhlaka 1 iNhlaba, 1978. Lesi sembulo sisusa konkhe kuvimbeleka ngekweluhlanga lokwakutsintsa buphristi.
Kuloyo Longatsintseka:
Mhlaka 30 iNyoni, 1978, eMhlanganweni loMkhulu weNcenye yemnyaka welikhulu nemashumi lamane nesiphohlongo weliBandla laJesu Khristu lalabaNgcwele beTinsuku Tekugcina, loku lokulandzelako kwetfulwa nguMengameli N. Eldon Tanner, uMeluleki wekucala kuBumengameli bekuCala beliBandla:
Ekucaleni kweNhlaba kwalomnyaka, Bumengameli bekuCala bumemetele kutsi Mengameli Spencer W. Kimball utfole sembulo lesinika buphristi netibusiso tasethempelini kuwo onkhe emalunga esilisa lafanelekile eliBandla. Mengameli Kimball ucelile kutsi ngatise lomhlangano kutsi emvakwekutfola lesembulo, lesite kuye emvakwekuzindla nekuthandaza emagumbini langcwele elithempeli lelingcwele, usetfule kubeluleki bakhe, labasemukele futsi basivuma. Sibese sesetfulwa kuKhoramu yebaPhostoli labaliShumi nakuBili, labasemukele ngekuvumelana, futsi emva kwaloko setfulwa kuto tonkhe Tiphatsimandla letiNkhulu eBandleni lonkhe, nato ngalokunjalo tasemukela ngekuvumelana.
Mengameli Kimball ucele kutsi manje ngifundze lencwadzi:
INhlaba 8, 1978
Kuto tonkhe tiphatsimandla tebaphristi temhlaba wonkhe netetindzawo teliBandla laJesu Khristu lalabaNgcwele beTinsuku Tekugcina emhlabeni wonkhe:
Bomnaketfu labatsandzekako:
Njengoba sitibonele kukhula kwemsebenti weNkhosi emhlabeni, siyabonga kutsi bantfu betive letiningi bativumile tindzaba telivangeli lelibuyiselwe, futsi batihlanganisa neliBandla ngebuningi. Ngenca yaloku, kusikhutsate ngesifiso sekwendlulisela kuwo onkhe emalunga lafanelekile eliBandla onkhe emalungelo kanye netibusiso letiniketwa livangeli.
Ngekwati tetsembiso letentiwe baphrofethi nabomengameli beliBandla labasendvulele kutsi ngesikhatsi lesitsite, eluhlelweni lwaNkulunkulu lwaphakadze, bonkhe bomnaketfu labafanelekile bangabutfola buphristi, futsi sibona kwetsembeka kwalabo lobuphristi lobugodliwe kubo, sibancengele sikhatsi lesidze nangebucotfo, labomnaketfu labatsembekile, sacitsa emahora lamaningi eGumbini leliseTulu leliThempeli sincusa eNkhosini kute sitfole kuholwa nguNkulunkulu.
Uyivile imithandazo yetfu, futsi ngesembulo wacinisekisa kutsi selifikile lilanga losekusikhatsi lesidze latsenjiswa lapho wonkhe umuntfu wesilisa lowetsembekile, lofanelekile eBandleni angatfola buphristi lobungcwele, kanye nemandla ekusebentisa ligunya labo lelivela kuNkulunkulu, futsi ajabulele nalabatsandzekako bakhe tonkhe tibusiso letiphuma kubo, lokufaka ekhatsi netibusiso tasethempelini. Ngako-ke, onkhe emalunga esilisa lafanelekile eliBandla angabekwa ebuphristini ngaphandle kwekubuka buhlanga noma libala. Baholi bebuphristi bayalwa kutsi balandzele inchubomgomo yekucocisana ngekucophelela nabo bonkhe labatawubekwa ebuPhristini baka-Aroni noma bakaMelkhisedeki kute bacinisekise kutsi bayayenelisa imigomo lebekiwe yekufaneleka.
Simemetela ngalokukhulu kutitfoba kutsi iNkhosi iyatisile intsandvo yayo kute ibusise bonkhe bantfwana bayo emhlabeni wonkhe labatawulalela livi letinceku tayo letigunyatiwe, futsi batilungiselele kutfola tonkhe tibusiso telivangeli.
Ngitsi Labatitfobako,
Spencer W. Kimball
N. Eldon Tanner
Marion G. Romney
Bumengameli bekuCala
Semukela Spencer W. Kimball njengemphrofethi, umboni, nemembuli, namengameli welibandla laJesu Khristu lalabaNgcwele beTinsuku Tekugcina, kuyaphakanyiswa kutsi tsine njengembutsano lonemandla ekwemukela nekushintja imitsetfo semukela lesi sembulo njengelivi nentsandvo yeNkhosi. Bonkhe labavumako sicela bakhombise ngekuphakamisa sandla sabo sangesekudla. Uma ukhona lophikisako akhombise ngeluphawu lolufanako.
Kuvotela kusekela lesi siphakamiso lesichaziwe kwenitwa ngekuvumelana.
ESalt Lake City, e-Utah, mhlaka 30 iNyoni, 1978.