Sigaba 122
Livi leNkhosi kuJoseph Smith umPhrofethi, ngesikhatsi asiboshwa ejele laseLiberty, eMissouri. Lesi sembulo siyincenye letsatfwe encwadzini layibhalela liBandla mhlaka 20 ngeNdlovulenkhulu, ngemnyaka we-1839 (buka sihloko sesigaba 121).
1–4, Imikhawulo yemhlaba itawufuna kwati ngaJoseph Smith; 5–7, Bonkhe bungoti nekuhlupheka kwakhe kutawumnika litfuba lekutivela nekutibonela futsi kumnike inzuzo; 8–9, INdvodzana yeMuntfu yendlule kuko konkhe.
1Â Imikhawulo yonkhe yemhlaba iyawufuna kwati ngelibito lakho, futsi tiwula tiyawukudzelela, nesihogo siyawukulwa nawe ngelulaka lolukhulu;
2Â Kodvwa labahlantekile enhlitiyweni, nalabahlakaniphile, nalabanebuntfu, nalabalungile, bayawufuna kwelulekwa, neligunya, netibusiso njalo ngephansi kwesandla sakho.
3Â Futsi bantfu bakho angeke bakugucukela ngebufakazi bebatsengisi.
4Â Nanoma umtselela wabo uyawukufaka elusizini, nasejele, uyawuhlonishwa; kodvwa emvakwesikhashana livi lakho liyawukwesabeka emkhatsini wetitsa takho kunelibhubesi lelesabekako, ngenca yekulunga kwakho; futsi Nkulunkulu wakho uyawuma edvute nawe phakadze naphakadze.
5Â Uma ubitelwe kwendlula etinhluphekweni, uma usebungotini emkhatsini wabomnakenu bemanga; uma usebungotini emkhatsini wetigebengu; uma usebungotini eveni noma elwandle;
6Â Uma ubekwa licala ngato tonkhe tinhlobo tetinsolo letingemanga; uma titsa takho tikuhlasela; uma tikwehlukanisa neyihlo nenyoko, nabomnakenu, nabodzadzewenu; futsi uma ngenkemba titsa takho tikwehlukanisa nemkakho, nebantfwana bakho, nendvodzana yakho lendzala, nanoma ineminyaka lesitfupha kuphela budzala, iyawunamatsela etingubeni takho, itsi: Babe, babe, kungani ungahlali natsi na? O, babe, atawukwentani lamadvodza na? futsi emvakwaloko uma iyawuhlukaniswa nawe ngekuphocelelwa ngenkemba, bese uhudvulelwa ejele, futsi titsa takho tizulazule njengetimphisi tifuna ingati yeliwundlu;
7Â Futsi uma uphonswa emgodzini, noma etandleni tebabulali, futsi ugwetjwa sigwebo sekufa; uma uphonswa ekujuleni; emagagasi laphakamako akujikela, uma imimoya lenemandla iba sitsa sakho; uma sibhakabhaka siba mnyama, nemvelo ihlangana yonkhe kuvimba indlela; futsi ngetulu kwako konkhe, uma imihlatsi yesihogo lucobo iyawukuvulela umlomo kakhulu, yati, ndvodzana yami, kutsi tonkhe leti tintfo tiyawukunika litfuba lekutivela nekutibonela, futsi tiyawuba yinzuzo kuwe.
8Â INdvodzana yeMuntfu yendlule kuko konkhe. Ngabe umkhulu kunayo na?
9Â Ngako-ke, bambelela endleleni yakho, futsi buphristi buyawuhlala kuwe; ngoba imincele yabo ibekiwe, angeke bayendlule. Emalanga ekuphila kwakho ayatiwa, futsi iminyaka yekuphila kwakho angeke incishiswe; ngako-ke, ungakwesabi umuntfu langakwenta, ngoba Nkulunkulu uyawuba nawe phakadze naphakadze.