Sigaba 103
Sembulo lesaniketwa ngaJoseph Smith umPhrofethi, eKirtland, e-Ohio, mhlaka 24 iNdlovana, 1834. Lesi sembulo saniketwa emvakwekufika eKirtland, e-Ohio, kwaParley P. Pratt naLyman Wight, labebaphuma eMissouri kutawubonisana nemPhrofethi ngekusitakala nekubuyiselwa kwalabaNgcwele emihlabeni yabo eSifundzeni iJackson.
1–4, Kungani iNkhosi yavumela kutsi labaNgcwele eSifundzeni iJackson bahlushwe na?; 5–10, LabaNgcwele batawuncoba uma bagcina imiyaleto; 11–20, Kubuyiswa kweSiyoni kutawukuta ngemandla, futsi neNkhosi itawuhamba phambi kwebantfu Bayo; 21–28, LabaNgcwele kufanele babutsane eSiyoni, futsi labo labalahlekelwa timphilo tabo, bayawuphindze batitfole; 29–40, Bazalwane labehlukahlekene babitelwa kuhlela iNkambu yaseSiyoni nekutsi baye eSiyoni; batsenjiswa kuncoba uma betsembekile.
1 Ngicinisile, ngitsi kini, bahlobo bami, bukani, ngitawuninika sembulo nemyaleto, kute nati kutsi nitiphatsa njani ekwenteni imisebenti yenu lephatselene nensindziso nekubuyiswa kwabomnakenu, labasakatiwe eveni laseSiyoni;
2 Basuswa baphindze bashaywa ngetandla tetitsa tami, kuto lengitawutfululela lulaka lwami ngaphandle kwesilinganiso ngesami sikhatsi.
3 Ngoba ngitivumele kute kube ngumanje, kute tigcwalise silinganiso sebubi bato lobukhulu, kute indzebe yato igcwale;
4 Futsi kute labo labatibita ngelibito lami bajeziswe kwesikhashana ngesijeziso lesibuhlungu nalesibi kakhulu, ngoba abatange balalele ngalokuphelele imiyalo nemiyaleto lengibanike yona.
5 Kodvwa ngicinisile ngitsi kini, ngikhiphe simemetelo bantfu bami labayawusicondza, nangabe balalela kusukela ngalesikhatsi seluleko mine, iNkhosi Nkulunkulu wabo, lengiyawubanika sona.
6 Bukani, bayawucala kutincoba titsa tami kusukela ngalesi sikhatsi, ngoba ngikushito loko.
7 Futsi ngekucaphela kutsi bayawagcina onkhe emavi mine, iNkhosi Nkulunkulu wabo, lengiyawuwakhuluma kubo, angeke bayekele kuncoba ite imibuso yonkhe yemhlaba ibekwe ngaphansi kwetinyawo tami, futsi umhlaba uniketwe labangcwele, ube ngewabo phakadze naphakadze.
8 Kodvwa nangabe bangayigcini imiyaleto yami, futsi bangacapheli kutsi bayawagcina onkhe emavi ami, imibuso yemhlaba iyawubancoba.
9 Ngoba bebabekwe kutsi babe kukhanya kwelive, nekutsi babe basindzisi bebantfu;
10 Futsi nangabe bangasibo basindzisi bebantfu, banjengaswayi losaphelelwa bunandzi balo, futsi kusukela ngaleso sikhatsi lolusuke selungenamsebenti walutfo kodvwa kutsi lulahlwe ngephandle lunyatselwe ngaphansi kwetinyawo tebantfu.
11 Kodvwa ngicinisile ngitsi kini, ngikushito kutsi bomnakenu labasakatiwe bayawubuyela emihlabeni lengemafa abo, futsi bayawukwakha tindzawo letitindzala teSiyoni.
12 Ngoba emvakwekuhlupheka lokukhulu, njengoba ngishito kini emyaletweni waphambilini, kuta sibusiso.
13 Bukani, lesi ngulesibusiso lenginitsembise sona emvakwetinhlupheko tenu, netinhlupheko tabomnakenu—kubuyiswa kwenu, nekubuyiswa kwabomnakenu, ngisho nekubuyiselwa kwabo eveni laseSiyoni, kutsi bacinisekiswe, bangaphindzi bancotjwe.
14 Noko, uma bangcolisa emafa abo bayawuncotjwa; ngoba angeke ngibahawukele uma bangcolisa emafa abo.
15 Bukani, ngitsi kini, kubuyiswa kweSiyoni kufanele kute ngemandla;
16 Ngako-ke, bantfu bami ngitawubavusela umuntfu, lotawubahola njengaMosi ahola bantfwana baka-Israyeli.
17 Ngoba nibantfwana baka-Israyeli, futsi niyintalelwane ya-Abrahama, kufanele niholwe niphume ebugcilini ngemandla, ngengalo leyeluliwe.
18 Futsi njengoba boyihlo baholwa ekucaleni, kuyawuba njalo-ke kubuyiswa kweSiyoni.
19 Ngako-ke, tinhlitiyo tenu atingakhatsateki, ngoba angisho kini njengoba ngishito kuboyihlo kutsi: Ingilosi yami iyawuhamba embikwenu, kodvwa hhayi inkhatimulo yami.
20 Kodvwa ngitsi kini: Tingilosi tami tiyawuhamba embikwenu, kanjalo nenkhatimulo yami, futsi ngekuhamba kwesikhatsi niyawuhlala eveni lelihle.
21 Ngicinisile, ngicinisile ngitsi kini, inceku yami Joseph Smith, lomNcane, ngiyo lendvodza lengiyifanise nenceku iNkhosi yesivini leyakhuluma nayo emfanekisweni lengininike wona.
22 Ngako-ke inceku yami Joseph Smith, lomNcane, ayitsi ebutfweni lendlu yami, emajaha ami kanye nalabaneminyaka lesemkhatsini—Butsanani ndzawonye eveni laseSiyoni, emhlabeni lengiwutsengile ngemali lenikelwe kimi.
23 Futsi onkhe emabandla akatfumele emadvodza lahlakaniphile netimali tawo, batsenge imihlaba njengoba ngibayaletile.
24 Futsi nangabe titsa tami tita ngekumelana nani kutawunikhipha emhlabeni wami lomuhle, lengiwunikele kutsi ube ngumhlaba weSiyoni, ngisho emihlabeni yenu emvakwalobu bufakazi, lenibuletsile phambi kwami ngekumelana nabo, nitawuticalekisa;
25 Futsi noma ngubani lenimcalekisako, ngitawumcalekisa; futsi niyawungiphindziselela etitseni tami.
26 Futsi inkhatimulo yami iyawuba nani ngisho ekungiphindziseleleni etitseni tami, esitukulwaneni sesitsatfu nesesine salabo labangitondzako.
27 Akubete umuntfu lowesaba kudzela imphilo yakhe ngenca yami; ngoba noma ngubani lodzela imphilo yakhe ngenca yami uyawuphindze ayitfole.
28 Futsi noma ngubani longafuni kudzela imphilo yakhe ngenca yami akasuye umfundzi wami.
29 Kuyintsandvo yami kutsi inceku yami Sidney Rigdon iphakamise livi layo emabandleni lasemaveni lasemphumalanga, kulungiselela emabandla kutsi agcine imiyaleto lengiwanikete yona ngalokuphatselene nekubuyiselwa nekubuyiswa kweSiyoni.
30 Kuyintsandvo yami kutsi inceku yami Parley P. Pratt nenceku yami Lyman Wight bangabuyeli emhlabeni wabomnakabo, bate batfole emacembu labatawuhamba nawo eveni laseSiyoni, ngemashumi, noma ngemashumi lamabili, noma ngemashumi lasihlanu, noma ngelikhulu, bate batfole tibalo letingemakhulu lasihlanu emabutfo endlu yami.
31 Bukani lena yintsandvo yami, celani nitawuphiwa; kodvwa bantfu abayenti intsandvo yami njalo.
32 Ngako-ke, uma ningawatfoli emakhulu lasihlanu, funani ngekukhutsala mhlawumbe nitfole emakhulu lamatsatfu.
33 Futsi uma ningakwati kutfola emakhulu lamatsatfu, funani ngekukhutsala mhlawumbe ningatfola likhulu.
34 Kodvwa ngicinisile ngitsi kini, ngininika umyaleto, wekutsi ningayi etulu eveni laseSiyoni nite nitfole likhulu lemabutfo endlu yami, lelitawuhamba nani kuya eveni laseSiyoni.
35 Ngako-ke, njengoba ngishito kini, celani nitawuphiwa; thandazani ngebucotfo mhlawumbe inceku yami Joseph Smith, lomNcane, ingahamba nani, futsi yengamele emkhatsini webantfu bami, iphindze ihlele umbuso wami eveni lelingcwelisiwe, icinisekise bantfwana baseSiyoni etikwemitsetfo nemiyaleto leninikwe yona nalenitawuniketwa yona.
36 Konkhe kuncoba neludvumo kufezeka kini ngekukhutsala, ngekwetsembeka nangemithandazo yekukholwa.
37 Inceku yami Parley P. Pratt ayihambe nenceku yami Joseph Smith, lomNcane.
38 Inceku yami Lyman Wight ayihambe nenceku yami Sidney Rigdon.
39 Inceku yami Hyrum Smith ayihambe nenceku yami Frederick G. Williams.
40 Inceku yami Orson Hyde ayihambe nenceku yami Orson Pratt, noma ngukuphi lapho inceku yami Joseph Smith, lomNcane iyawubayaleta kutsi baye khona, kute kugcwaliswe lemiyaleto lengininikete yona, bashiye lokusele etandleni tami. Kunjalo nje. Amen.