Sigaba 137
Umbono lowaniketwa Joseph Smith umPhrofethi, ethempelini laseKirtland, e-Ohio, mhlaka 21 Bhimbidvwane, 1836. Kwakusikhatsi sekwentiwa kwetimiso kulungiselela kungcweliswa kwelithembeli.
1–6, UmPhrofethi ubona umnakabo Alvin embusweni wesilestiyali; 7–9, Imfundziso yekusindziswa kwalabafile iyembulwa; 10, Bonkhe bantfwana bayasindziswa embusweni wesilestiyali.
1 Savulelwa emazulu, ngase ngibona umbuso wesilestiyali waNkulunkulu, nenkhatimulo yawo, noma ngangisemtimbeni noma ngangingekho angati.
2 Ngabona buhle lobendlulele belisango lekutongena kulo tindlalifa talowo mbuso, lobabufana nemalangabi emlilo latungeletako;
3 Kanjalo nesihlalo sebukhosi lesivutsako saNkulunkulu, kuso lokwakuhleti Babe neNdvodzana.
4 Ngabona imigwaco lemihle yalowo mbuso, leyayibonakala shangatsi yentiwe ngeligolide.
5 Ngabona Babe Adamu na-Abrahama; nababe namake; nemnaketfu Alvin, losewashona kadzeni;
6 Futsi ngamangaliswa kutsi walitfola njani lifa kulowo mbuso, ngoba bekendlule kulomhlaba ngaphambi kwekube iNkhosi yelule sandla sayo kugcogca Israyeli kwesibili, futsi bekangatange sekabhajatiswe kute kutsetselelwe tono.
7 Naku lokwashiwo livi leNkhosi kimi, litsi: Bonkhe labafe ngaphandle kwekwati lelivangeli, labebatawulemukela kube bebavunyelwe kuphila emhlabeni, bayawuba tindlalifa tembuso wesilestiyali waNkulunkulu;
8 Futsi bonkhe labayawufa kusukela manje kuya phambili ngaphandle kwekulati, labebatawulemukela ngetinhlitiyo tabo tonkhe, bayawuba tindlalifa talowo mbuso.
9 Ngoba mine, iNkhosi, ngitawukwehlulela bonkhe bantfu ngekwemisebenti yabo, ngekwetifiso tetinhlitiyo tabo.
10 Futsi ngaphindze ngabona kutsi bonkhe bantfwana labafa bangakafiki eminyakeni yekutiphendvulela bayasindziswa embusweni wesilestiyali wasezulwini.