Sigaba 95
Sembulo lesaniketwa ngaJoseph Smith umPhrofethi, eKirtland, e-Ohio, mhlaka 1 iNhlaba, 1833. Lesi sembulo sikuchubeka kwemiyaleto yaNkulunkulu kutsi kwakhiwe indlu yekukhonta nekufundziswa, indlu yeNkhosi (buka sigaba 88:119–136).
1–6, LabaNgcwele bayayalwa ngekwehluleka kwabo kwakha indlu yeNkhosi; 7–10, INkhosi ifisa kusebentisa indlu Yayo kupha bantfu Bayo emandla lavela etulu; 11–17, Lendlu kufanele ingcweliswe njengendzawo yekukhonta nesikolwa sekufundzisa baPhostoli.
1 Ngicinisile, naku lokushiwo yiNkhosi kini nine lenginitsandzako, futsi labo lengibatsandzako ngiphindze ngibajezise kute tono tabo ticolelwe, ngoba ngalesijeziso ngilungiselela indlela yekukhululwa kwabo kuto tonkhe tintfo ekulingweni, futsi nginitsandzile—
2 Ngaloko-ke, kufanele nijeziswe futsi nitsetsiswe phambi kwebuso bami;
3 Ngoba nonile ngekumelana nami ngesono lesibi, ngoba aniwunakanga umyaleto lomkhulu kuto tonkhe tintfo, lengininikete wona ngalokuphatselene nekwakhiwa kwendlu yami;
4 Kulungiselela lengihlela ngako kulungiselela baphostoli bami kutsi batsene sivini sami kwekugcina, kute ngente sento sami lesingakejwayeleki, kute ngitfululele Moya wami etikwabo bonkhe bantfu—
5 Kodvwa bukani, ngicinisile ngitsi kini, baningi lababekiwe emkhatsini wenu, lengibabitile kodvwa bambalwa lakakhetsiwe.
6 Labo labangakakhetfwa bone sono lesibi, ngoba bahamba ebumnyameni kube kusemini.
7 Ngenca yalesi sizatfu nganinika umyaleto wekutsi nibite umhlangano wenu lonesizotsa, kute kuzila kwenu nekukhala kwenu kufinyelele etindlebeni teNkhosi Sebawothi, lokungukutsi ngekuhunyushwa, umdali welilanga lekucala, sicalo nesiphetfo.
8 Yebo, ngicinisile ngitsi kini, ngininike umyaleto wekutsi kufanele nakhe indlu, kuleyondlu lengihlele kupha labo lengibakhetsile emandla lasuka ngetulu;
9 Ngoba lesi setsembiso saBabe kini; ngako-ke ngiyaniyaleta kutsi nihlale, njengebaphostoli bami eJerusalema,
10 Noko, tinceku tami tonile ngesono lesibi kakhulu; futsi kuphikisana kwavuka esikolweni sebaphrofethi; lokwaba kubi kakhulu kimi, kusho iNKhosi yenu; ngako-ke ngabacosha kute bajeziswe.
11 Ngicinisile ngitsi kini, kuyintsandvo yami kutsi nakhe indlu. Uma nigcina imiyaleto yami niyawuba nemandla ekuyakha.
12 Uma ningayigcini imiyaleto yami, lutsandvo lwaBabe angeke lube kini, ngako-ke niyawuhamba ebumnyameni.
13 Manje naku kuhlakanipha, nemcondvo weNkhosi—ayakhiwe lendlu, hhayi ngendlela yemhlaba, ngoba angininiki kutsi niphile ngendlela yemhlaba;
14 Ngako-ke, ayakhiwe ngendlela lengitawuyikhombisa labatsatfu benu, leniyawubakhetsa niphindze nibabeke kulamandla.
15 Futsi bukhulu bayo buyawuba silinganiso semashumi lasihlanu nesihlanu bubanti, bese iba silinganiso semashumi lasitfupha nesihlanu budze, lingekhatsi lesibuya sayo.
16 Futsi indzawo lengephansi yesibuya lesingekhatsi ayingcweliselwe mine kwentela iminikelo yenu yesidlo seNkhosi, nekushumayela, nekuzila kwenu, nekuthandaza kwenu, nekunikelwa kwetifiso tenu letingcwele kakhulu kimi, kusho iNkhosi.
17 Bese incenye lengetulu yesibuya lesingekhatsi ayingcweliselwe mine kwentela sikolwa sebaphostoli bami, kusho iNdvodzana Ahman; noma, ngalamanye emagama, Alfa; noma, ngalamanye emagama, Omega; ngisho Jesu Khristu iNkhosi yenu. Amen.