Sigaba 135
Satiso ngekufela lukholo kwaJoseph Smith umPhrofethi nemnakabo, Hyrum Smith uMphatriyakhi, eCarthage, eIllinois, mhlaka 27 iNhlaba, 1844. Lombhalo wafakwa ekugcineni encwadzini yeMfundziso neTivumelwano yangemnyaka wa 1844, lokwasekusele kancane kutsi ilungele kukhishwa ngesikhatsi Joseph naHyrum Smith babulawa.
1–2, Joseph naHyrum bafela lukholo eJele laseCarthage; 3, Sikhundla lesikhulu semPhrofethi siyamenyetelwa; 4–7, Ingati yabo lengenacala ifakaza kutsi lomsebenti uliciniso nekutsi uvela kuNkulunkulu.
1 Kucinisekisa bufakazi balencwadzi neNcwadzi yaMormon, satisa ngekufela lukholo kwaJoseph Smith, umPhrofethi, naHyrum Smith uMphatriyakhi. Badutjulwa ejele laseCarthage, mhlaka 27 iNhlaba, 1844, ngetikhatsi tesimbi yesihlanu ntsambama, sicuku lesasihlomile—sitimpende saba mnyama—sebantfu labalikhulu nemashumi lasihlanu kuya emakhululwini lamabili. Hyrum wadutjulwa kucala wawa ngekuthula, wamemeta watsi: Sengifile! Joseph wagcuma aphuma efas’telweni, wadutjulwa wafa kulowo metamo, wamemeta watsi: O Nkhosi Nkulunkulu wami! Bobabili badutjulwa emvakwekube sebafile, ngesihluku, futsi bobabili batfola tinhlavu letine.
2 John Taylor naWillard Richards, babili balabaliShumi nakuBili, kwakungibo kuphela bantfu kulendlu ngaleso sikhatsi; lowekucala walinyatwa ngesihluku ngetinhlavu letine, kodvwa welulama; lowesibili, ngekusitwa nguNkulunkulu, waphunyula, kute ngisho nembobo engutjeni yakhe.
3 Joseph Smith, umPhrofethi neMboni weNkhosi, wente lokuningi, ngaphandle kwaJesu kuphela, kute bantfu basindziswe kulomhlaba, kwendlula noma ngubani lowake waphila kuwo. Esikhatsini lesifishane seminyaka lengemashumi lamabili, uvete iNcwadzi yaMormon, layihumusha ngesipho nangemandla aNkulunkulu, futsi ube lithulusi ekuyikhipheni kumavekati lamabili; utfumele kuphelela kwelivangeli lelingunaphakadze, lelicuketfwe kuyo, emagunjini lamane emhlaba; uvete tembulo nemiyaleto leyenta lencwadzi yeMfundziso neTivumelwano, naletiningi letinye tincwadzi letinekuhlakanipha netimfundziso kute kuzuze bantfwana bebantfu; ubutsise tinkhulungwane letiningi talabaNgcwele beTinsuku Tekugcina, wasungula lidolobha lelikhulu, washiya ludvumo neligama lokungeke kwashabalaliswa. Waphila amkhulu, futsi wafa amkhulu emehlweni aNkulunkulu nakubantfu bakhe; njengalabaningi labagcotjiwe beNkhosi etikhatsini tasemandvulo, ukucinisekisile kutfunywa kwakhe nemisebenti yakhe ngengati yakhe lucobo; kanjalo nemnakabo Hyrum. Emphilweni bebangehlukani, kanjalo nasekufeni abahlukananga!
4 Ngesikhatsi Joseph aya eCarthage kuyawutimikisa kuloko lokwakutsiwa tidzingo temtsetfo, emalangeni lamabili noma lamatsatfu lendvulela kubulawa kwakhe, watsi: “Ngihamba njengemvana iyawuhlatjwa; kodvwa ngithulile njengekusa kwasehlobo; nginanembeza longenacala kuNkulunkulu, nakubo bonkhe bantfu. NGITAWUFA NGIMSULWA, FUTSI ESIKHATSINI LESITAKO KUYAWUTSIWA NGAMI—WABULAWA NGESIHLUKU.”—Ngaloko kusa, emvakwekube Hyrum asalungiselele kuhamba—ngabe kufanele kutsiwe kuyobulawa na? yebo, ngoba kwakunjalo—wafundza lesi sigaba lesilandzelako, ngasekupheleni kwesehluko selishumi nakubili sa-Etheri, encwadzini yaMormon, wase sewugoca lelikhasi lalencwadzi kuleso sigaba:
5 Futsi kwenteka kutsi ngathandaza eNkhosini kutsi ibe nemusa kubeTive, kute babe nelutsandvo. Futsi kwenteka kutsi iNkhosi yatsi kimi: Uma bete lutsandvo akusho lutfo loko kuwe, wena wetsembekile; ngaloko-ke, tingubo takho tiyawuhlantwa. Ngenca yekutsi ububonile butsakatsaka bakho, uyawuciniswa, kangangoba utawuhlala phansi endzaweni lengiyilungisile etindlini letiningi taBabe. Manje mine … sengiyavalelisa kubeTive; yebo, futsi kanjalo nakubomnaketfu lengibatsandzako, site sihlangane embikwesihlalo sekwehlulela saKhristu, lapho bonkhe bantfu bayawukwati kutsi tingubo tami atikangcoli ngengati yenu. Bofakazi sebafile manje, nebufakazi babo bunemandla.
6 Hyrum Smith bekaneminyaka lengemashumi lamane nakune budzala ngeNdlovana, 1844, kantsi Joseph Smith bekaneminyaka lengemashumi lamatsatfu lesiphohlongo ngeNgongoni, 1843; futsi kusukela manje emabito abo ayawubalwa nalabo labafela lukholo; futsi umfundzi kuto tonkhe tive uyawukhumbula kutsi iNcwadzi yaMormon, nalencwadzi yeMfundziso neTivumelwano yelibandla, tabanga kucitseka kwengati yebantfu labamcoka kakhulu eminyakeni lelikhulu nelishumi nemfica kutsi tikhishwe kute kusindziswe umhlaba lowonakele; futsi nekutsi uma umlilo ungashisa sihlahla lesiluhlata kute kudvunyiswe Nkulunkulu, kuyawuba lula kangakanani kushisa tihlahla letomile kususa konakala esivinini. Baphilela ludvumo; bafela ludvumo; futsi ludvumo lungumvuzo wabo waphakadze. Tikhatsi ngetikhatsi emabito abo ayawundluliswa etitukulwaneni njengematje laligugu kulabangcwelisiwe.
7 Bebangenacala, njengoba bebasolo batfolakele ngaphambilini, futsi bavalelwa ejele ngeluzungu lwebatsengisi nebantfu lababi; ingati yabo lengenacala esiyilweni sasejele laseCarthage isishicilelo lesisobala lesinamatseliselwe ku “buMormon” lesingayuze silahlwe ngunoma nguyiphi inkantolo emhlabeni, futsi ingati yabo lengenacala lesesihlangwini seSifundza sase-Illinois, nesetsembiso lesephulwa Sifundza njengekutsenjiswa ngumbusi, ibufakazi beliciniso lelivangeli langunaphakadze umhlaba wonkhe longeke wabuphikisa; futsi ingati yabo lengenacala lekumjeka wenkhululeko, naku-magna charta yaseMelika, ilincusa lenkholo yaJesu Khristu, leyawutsintsa tinhlitiyo tebantfu labetsembekile emkhatsini wetive tonkhe; futsi ingati yabo lengenacala, nengati lengenacala yabo bonkhe labafela lukholo ngaphansi kwelilati lelabonwa nguJohane, iyawukhala eNkhosini yemaBandla ite itfole imphindziselo yaleyo ngati emhlabeni. Amen.