Sigaba 110
Imibono leyavetelwa Joseph Smith umPhrofethi na-Oliver Cowdery ethempelini eKirtland, e-Ohio, mhlaka 3 kuMabasa, ngemnyaka we-1836. Bekusikhatsi semhlangano weliSabatha. Umlandvo waJoseph Smith utsi: “Entsambama, ngasita labanye boMengameli ekwabeni Sidlo seNkhosi sakusihlwa eBandleni, sisitfola kulabaliShumi nakuBili, lilungelo labo lokwakukwenta imisebenti etafuleni lelingcwele ngalelo langa. Emvakwekwentela bomnaketfu lomsebenti, ngaya epulupiti, tindvwangu tehlisiwe, ngaguca, na-Oliver Cowdery, ngemthandazo lonesizotsa nekuthula. Emvakwekuphakama emthandazweni, lombono lolandzelako wembulelwa tsine sobabili.”
1–10, INkhosi Jehova ivela isenkhatimulweni futsi yemukela liThempeli laseKirtland njengendlu Yayo; 11–12, Mosi na-Eliyasi ngamunye bayavela baphindze baniketa tikhiya tabo netinhlelo tekwengamela; 13–16, Elija uyabuya futsi uniketa tikhiya teluhlelo lwakhe lwekwengamela njengobe kwatsenjiswa nguMalakhi.
1 Indvwangu yesuswa etingcondvweni tetfu, nemehlo ekucondza kwetfu avuleka.
2 Sabona iNkhosi ime etikweludvonga lwepulupiti, phambi kwetfu, futsi ngaphansi kwetinyawo tayo bekukhona umsebenti lonamekiwe weligolide lelicwebile, unembala lolitfusi.
3 Emehlo akhe bekafana nelilangabi lemlilo; tinwele tenhloko yakhe betimhlophe njengelichwa lelicwebile; buso bakhe bebukhatimula kwendlula kukhanya kwelilanga; livi lakhe belinjengenhlokomo yemanti lamanyenti, ngisho livi laJehova, litsi:
4 Ngisicalo nesiphetfo; nginguye lophilako, nginguye lowabulawa; ngingummeli wenu kuBabe.
5 Bukani, tono tenu titsetselelwe; nihlantekile phambi kwami; ngako-ke phakamisani tinhloko tenu nijabule.
6 Tinhlitiyo tabomnakenu atijabule, netinhlitiyo tabo bonkhe bantfu bami atijabule, labakhe, ngemandla abo, lendlu egameni lami.
7 Ngoba bukani, ngiyemukele lendlu, nelibito lami litawuba lapha; futsi ngitawutibonakalisa kubantfu bami ngebubele kulendlu.
8 Yebo, ngitawuvela etincekwini tami, ngikhulume nato ngelivi lami, uma bantfu bami batawuyigcina imiyaleto yami, futsi bangayingcolisi lendlu lengcwele.
9 Yebo tinhlitiyo talabatinkhulungwane nemashumi etinkhulungwane tiyawujabula kakhulu ngenca yetibusiso letiyawutfululwa, netipho takamoya tinceku tami letiphiwe tona kulendlu.
10 Neludvumo lwalendlu luyawukwandza lufinyelele kulamanye emave; futsi lesi sicalo setibusiso lesiyawutfululelwa etinhloko tebantfu bami. Kunjalo nje. Amen.
11 Emvakwekutsi lombono sewuvaliwe, saphindze savulelwa emazulu; futsi Mosi wavela phambi kwetfu, wasinika tikhiya tekugcogca Israyeli kusuka kumagumbi lamane emhlaba, nekuholwa kwetive letilishumi tisuka eveni lasenyakatfo.
12 Emvakwaloko, Eliyasi wavela, wanika luhlelo lwekwengamela lwelivangeli la-Abrahama, atsi kitsi nasentalelwaneni yetfu tonkhe titukulwane emvakwetfu kufanele tibusiswe.
13 Emvakwekuvaleka kwalombono, lomunye umbono lomkhulu nalomangalisako wakhonjiswa kitsi; ngoba Elija umphrofethi, lowatsatfwa waya ezulwini ngaphandle kwekuva kufa, wema phambi kwetfu, watsi:
14 Bukani, sikhatsi sesifike ngalokuphelele, lokwakhulunywa ngaso ngemlomo waMalakhi—afakaza kutsi kufanele atfunyelwe [Elija], ngaphambi kwekufika kwelilanga lelikhulu nalelesabekako leNkhosi—
15 Kugucula tinhlitiyo taboyise kubantfwana, nebantfwana kuboyise, funa umhlaba wonkhe ushaywe ngesicalekiso–
16 Ngako-ke, tikhiya teluhlelo lwekwengamela setibekwa etandleni tenu; kute ngaloku nati kutsi lilanga lelikhulu nalelesabekako leNkhosi selisedvute, ngisho emnyango.