Sigaba 75
Sembulo lesaniketwa ngaJoseph Smith umPhrofethi, e-Amherst, e-Ohio, mhlaka 25 Bhimbidvwane, 1832. Lesi sigaba sicuketse tembulo letimbili letehlukene (sekucala sisemavesini 1 kuya ku 22 bese sesibili sisemavesini 23 kuya ku 36) letaniketwa ngelilanga linye. Bekusikhatsi semhlangano lapho Joseph Smith emukelwa khona waphindze wabekwa njengeMengameli webuPhristi lobuKhulu. Labanye babonisi bebanesifiso sekwati kabanti ngemisebenti yabo yangaleso sikhatsi. Leti tembulo talandzela.
1–5, Babonisi labetsembekile labashumayela livangeli batawutfola kuphila lokuphakadze; 6–12, Thandazani kute nitfole uMdvudvuti, lofundzisa tonkhe tintfo; 13–22, Babonisi batawuhlala ekwehluleleni kulabo labalahla umlayeto wabo; 23–36, Imindeni yebafundzisi belivangeli kufanele itfole lusito eBandleni.
1 Ngicinisile, ngicinisile ngitsi kini, mine lokhuluma ngisho nangelivi laMoya wami, ngisho Alfa na-Omega, iNkhosi yenu naNkulunkulu wenu—
2 Lalelani, Awu nine leninikete emabito enu kute nihambe niyawumemetela livangeli lami, niphindze nitsene sivini sami.
3 Bukani, ngitsi kini kuyintsandvo yami kutsi nihambe futsi ningalibali, noma nibe ngemavila kodvwa nisebente ngemandla enu—
4 Niphakamise emavi enu njengekukhala kwelicilongo, nimemetele liciniso ngekwetembulo nemiyaleto lengininike yona.
5 Ngako-ke, uma netsembekile niyawetfweswa titfungo letiningi, netfweswe nemchele webukhosi, nenkhatimulo, nekungabhubhi, nekuphila lokuphakadze.
6 Ngako-ke, ngicinisile ngitsi encekwini yami William E. McLellin, ngiyalihocisa ligunya lekutfunywa lengamnika lona kutsi ahambe aye emaveni lasemphumalanga;
7 Futsi ngimniketa lelinye ligunya lekutfunywa nemyaleto lomusha, kuwo mine, iNkhosi, ngiyamekhuta ngenca yekuvungama enhlitiyweni yakhe;
8 Futsi wonile; noko, ngiyamtsetselela ngiyaphindza ngitsi kuye, hamba uye emaveni laseningizimu.
9 Futsi inceku yami Luke Johnson ayihambe naye, bashumayele tintfo lengibayalete ngato—
10 Babite libito leNkhosi kute batfole uMdvudvuti, lotawubafundzisa tonkhe tintfo letibafanele.
11 Bathandaze njalo kute bangadzinwa; futsi nangabe bakwenta loku, ngiyawuba nabo kute kube sekugcineni.
12 Bukani, lena yintsandvo yeNkhosi Nkulunkulu wenu ngalokuphatselene nani. Kunjalo nje. Amen.
13 Ngetulu kwaloko, ngicinisile naku lokushiwo yiNkhosi, inceku yami Orson Hyde nenceku yami Samuel H. Smith kufanele batsatse luhambo lwabo baye emaveni lasemphumalanga, bamemetele letintfo lengibayalete ngato; futsi nangabe betsembekile, buka, ngiyawuba nabo kute kube sekugcineni.
14 Ngetulu kwaloko, ngicinisile ngitsi encekwini yami Lyman Johnson, nasencekwini yami Orson Pratt, nabo kufanele batsatse luhambo lwabo baye emaveni lasemphumalanga, bukani, niphindze nibone, nabo nginabo, kute kube sekugcineni.
15 Ngetulu kwaloko, ngitsi encekwini yami Asa Dodds, kanjalo nasencekwini yami Calves Wilson, nabo abatsatse luhambo lwabo baye emaveni lasenshonalanga, bamemetele livangeli lami, njengoba ngibayaletile.
16 Futsi loyo lowetsembekile uyawutincoba tonkhe tintfo, aphindze aphakanyiswe ngelilanga lekugcina.
17 Ngetulu kwaloko, ngitsi encekwini yami Major N. Ashley, nasencekwini yami Burr Riggs, nabo abatsatse luhambo lwabo baye eveni leliseningizimu.
18 Yebo, bonkhe labo abatsatse luhambo lwabo, njengoba ngibayaletile, bahambe likhaya ngelikhaya, sigodzi ngesigodzi, kanjalo lidolobha ngelidolobha.
19 Futsi kunoma nguliphi likhaya leningena kulo, banemukela, shiyani sibusiso senu kulelo likhaya.
20 Futsi kunoma nguliphi likhaya leningena kulo, banganemukeli, kufanele nibashiye masinyane kulelo khaya, nitsintsitse lutfuli etinyaweni tenu kute kube bufakazi lobumelene nabo.
21 Niyawugcwala injabulo nentfokoto, futsi yatini loku, kutsi ngelilanga lekwehlulela niyawuba behluleli kulelo khaya, futsi nibabeke licala;
22 Futsi kuyawubeketeleleka kakhulu kumahedeni ngelilanga lekwehlulela, kunalelo khaya; ngako-ke bophani tinkhalo tenu netsembeke, futsi niyawutincoba tonkhe tintfo, niphindze niphakanyiswe ngelilanga lekugcina. Kunjalo nje. Amen.
23 Ngetulu lwaloko, naku lokushiwo yiNkhosi kini, Awu nine babonisi belibandla lami, leninikete emabito enu kute nati intsandvo yakhe ngalokuphatselene nani—
24 Bukani, ngitsi kini, kungumsebenti welibandla kutsi lelekelele kusekela imindeni yalabo, kanjalo nekusekela imindeni yalabo lababitiwe nalokudzingeka kutsi batfunywe emhlabeni kuyawumemetela livangeli kubantfu.
25 Ngaloko-ke, mine, iNkhosi, ngininika lomyaleto, wekutsi nitfolele imindeni yenu tindzawo, nangabe bomnakenu bakulungele kuvula tinhlitiyo tabo.
26 Futsi bonkhe labo labangakhona kutfolela imindeni yabo tindzawo, nekusekelwa libandla, abangehluleki kuya emhlabeni, noma kusemphumalanga noma enshonalanga, noma enyakatfo, noma eningizimu.
27 Abacele batawutfola, abanconcotse batawuvulelwa, futsi kutawukwembulwa kusuka etulu, ngisho ngeMdvudvuti, kutsi abaye kuphi.
28 Ngetulu kwaloko, ngicinisile ngitsi kini, wonkhe umuntfu lophocelelekile kondla umndeni wakhe, akawondle, futsi akayuze alahlekelwe ngumchele wakhe; futsi akasebente ebandleni.
29 Wonkhe umuntfu akakhutsale etintfweni tonkhe. Futsi livila angeke libe nendzawo ebandleni, ngaphandle uma liphendvuka liphindze lilungise tindlela talo.
30 Ngaloko-ke, inceku yami Simeon Carter kanye nenceku yami Emer Harris ababe munye ebufundisini;
31 Kanjalo nenceku yami Ezra Thayre kanye nenceku yami Thomas B. Marsh;
32 Kanjalo nenceku yami Hyrum Smith kanye nenceku yami Reynolds Cahoon;
33 Kanjalo nenceku yami Daniel Stanton kanye nenceku yami Seymour Brunson;
34 Kanjalo nenceku yami Sylvester Smith kanye nenceku yami Gideon Carter;
35 Kanjalo nenceku yami Ruggles Eames kanye nenceku yami Stephen Burnett;
36 Kanjalo nenceku yami Micah B. Welton kanye nenceku yami Eden Smith. Kunjalo nje. Amen.