Sigaba 89
Sembulo lesaniketwa ngaJoseph Smith umPhrofethi, eKirtland, e-Ohio, mhlaka 27 iNdlovana, 1833. Ngenca yebazalwane besilisa bekucala labebabhema ligwayi emihlanganweni yabo, umPhrofethi waholeleka kutsi azindle ngaloludzaba; ngenca yaloko, wabuta iNkhosi ngalokuphatselene nalo. Lesi sembulo, lesatiwa ngekutsi Livi leKuhlakanipha, saniketwa.
1–9, Kusetjentiswa kweliwayini, tinatfo letidzakisako, ligwayi, netinatfo letishisako akukavumeleki; 10–17, Emakhambi, titselo, inyama, nekudla lokusanhlavu, kubekelwe kusetjentiswa bantfu netilwane; 18–21, Kuhlonipha umtsetfo welivangeli, kufaka ekhatsi Livi leKuhlakanipha, kuletsa tibusiso tasemhlabeni netamoya.
1 Livi Lekuhlakanipha, kute kuzuze umkhandlu webafundisi labakhulu, lowawuhlangene eKirtland, nelibandla, nalabangcwele eSiyoni—
2 Litfunyelwe ngesibingelelo; hhayi ngemyaleto noma ngekucindzetelwa, kodvwa ngesembulo nangelivi lekuhlakanipha, litjengisa luhlelo nentsandvo yaNkulunkulu ngensindziso yasemhlabeni yabo bonkhe labangcwele emalangeni ekugcina—
3 Liniketwe kute libe ngumgomo lonesetsembiso, lilungiselwe lababutsakatsaka nalababutsakatsaka kakhulu babo bonkhe labangcwele, lababitwa noma labangabitwa ngalabangcwele.
4 Bukani, ngicinisile, naku lokushiwo yiNkhosi kini: Ngenca yebubi, netinhloso letikhona naletitawuba khona etinhlitiyweni tebantfu labahlose kwenta lokubi ngemalanga ekugcina, nginicwayisile, futsi nginicwayisile ngaphambilini, ngekuninika lelivi lekuhlakanipha ngesembulo—
5 Kutsi noma ngabe ngubani lonatsa liwayini noma sinatfo lesidzakisako emkhatsini wenu, bukani loko akukuhle, futsi akukemukeleki emehlweni aBabe wenu, kuphela uma nihlangana ndzawonye kunikela tidlo teNkhosi phambi kwakhe.
6 Futsi, bukani, leli kufanele kube liwayini, yebo, liwayini lelicwebile letitselo tesivini, lenitentele nine.
7 Futsi, ngetulu kwaloko, tinatfo letidzakako atisito tesisu, kodvwa tekugeza imitimba yenu.
8 Ngetulu kwaloko, ligwayi alisilo lemtimba, noma lesisu, futsi alimulungeli umuntfu, kodvwa lilikhambi lemihuzuko nato tonkhe tinkhomo letigulako, kute lisetjentiswe ngebuhlakani nangelikhono.
9 Ngetulu kwaloko, tinatfo letishisako atisito temtimba noma tesisu.
10 Ngetulu kwaloko, ngicinisile ngitsi kini, onkhe emakhambi laphilisako Nkulunkulu uwabekele simo semtimba, imvelo, nekusetjentiswa ngumuntfu—
11 Lonkhe likhambi lisentjentiswa ngesikhatsi salo, naso sonkhe sitselo sisetjentiswe ngesikhatsi saso; tonkhe tisetjentiswe ngekuhlakanipha nangekubonga.
12 Yebo, inyama yetilwane neyetinyoni tasemoyeni, mine, iNkhosi, ngitibekele kusetjentiswa ngumuntfu ngekubonga; noko kufanele tisetjentiswe ngekongiwa;
13 Futsi kuyajabulisa kimi kutsi tingasetjentiswa, kodvwa ngetikhatsi tasebusika, noma temakhata, noma tendlala.
14 Konkhe kudla lokusanhlavu kubekelwe kusetjentiswa ngumuntfu netilwane, kube kudla lokubasekelako emphilweni, kungasiko kwemuntfu kuphela kodvwa nekwetilwane tesiganga, netinyoni telizulu, nato tonkhe tilwane tesiganga letigijimako noma letihamba ngesisu emhlabeni;
15 Futsi leti Nkulunkulu utentele kusetjentiswa ngumuntfu ngetikhatsi tendlala netekulamba lokukhulu.
16 Konkhe kudla lokusanhlavu kulungile njengekudla kwemuntfu; njengesitselo sesivini naso; loko lokutsela titselo, emhlabatsini noma ngetulu kwemhlabatsi—
17 Noko, emabele amlungele umuntfu, nemmbila wenkunzi, tinhlavu letidliwako telihhashi, nenhlobo yemabele ngeyetinyoni netingulube, nato tonkhe tilwane tesiganga, ibhali ledliwako yato tonkhe tilwane letifuywako, netinatfo letingadzakisani, ngalokunjalo nalokunye lokusanhlavu.
18 Futsi bonkhe labangcwele labakhumbula kugcina baphindze bente loku lokushiwoko, bahamba ngekuhlonipha imiyaleto, bayawutfola imphilo enkhabeni yabo nemnkantja ematsanjeni abo;
19 Futsi bayawutfola kuhlakanipha nemicebo lemikhulu yelwati, ngisho imicebo lefihliwe;
20 Bayawugijima bangadzinwa, futsi bayawuhamba bangaphelelwa ngemandla.
21 Futsi mine, iNkhosi, ngibaniketa setsembiso, sekutsi ingilosi lebhubhisako iyawukwendlula ngakubo, njengakubantfwana baka-Israyeli, kodvwa angeke ibabulale. Amen.