Sigaba 112
Sembulo lesaniketwa ngaJoseph Smith umPhrofethi kuThomas B. Marsh, eKirtland, e-Ohio, mhlaka 23 kuKholwane, ngemnyaka we-1837, ngalokuphatselene nebaPhostoli labaliShumi nakubili beliWundlu. Lesi sembulo satfolakala ngelilanga lapho babonisi Heber C. Kimball na-Orson Hyde bashumayela livangeli kwekucala Engilandi. Thomas B. Marsh ngalesi sikhatsi bekanguMengameli weKhoramu yebaPhostoli labaliShumi nakuBili.
1–10, LabaliShumi nakuBili kufanele batfumele livangeli baphindze baphakamise livi lesecwayiso kuto tonkhe tive nebantfu; 11–15, Kufanele betfwale siphambano sabo, balandzele Jesu, baphindze baphe timvu Takhe; 16–20, Labo labemukela buMengameli bekuCala bemukela iNkhosi; 21–29, Bumnyama bumbonya umhlaba, futsi ngulabo kuphela labakholwako nalababhajatiswako labatawusindziswa; 30–34, BuMengameli bekuCala nalabaliShumi nakuBili baphetse tikhiya teluhlelo lwekwengamela lekuphelela kwetikhatsi.
1Â Ngicinisile naku lokushiwo yiNkhosi kuwe nceku yami Thomas: Ngiyivile imithandazo yakho; futsi netipho takho tenyukile taba sikhumbuto kimi, kute kuzuze labo, bomnakenu, labakhetfwa kutsi betfule bufakazi ngelibito lami nekubutfumela yonkhe indzawo emkhatsini wato tonkhe tive, tihlobo, tilimi, nebantfu, nalababekwa ngelusito lwetinceku tami.
2Â Ngicinisile ngitsi kuwe, kube netintfo letimbalwa enhlitiyweni yakho nangawe, mine iNkhosi, lengingatfokotanga ngato.
3Â Noko, ngenca yekutsi utitfobile uyawuphakanyiswa; ngako-ke, tonkhe tono takho titsetselelwe.
4Â Inhlitiyo yakho ayime sibindzi phambi kwebuso bami; futsi kufanele uyofakaza ngelibito lami, hhayi kubeTive kuphela, kodvwa nakumaJuda; futsi kufanele utfumele libito lami emikhawulweni yemhlaba.
5Â Ngako-ke, lwani, njalo nje ekuseni; futsi lilanga nelilanga hambisa livi lakho lesecwayiso; uma busuku bufika ungabavumeli bantfu basemhlabeni balale, ngenca yekukhuluma kwakho.
6Â Kuhlala kwakho akwatiwe eSiyoni, futsi ungasuki lapho uhlala khona; ngoba mine, iNkhosi, nginemsebenti lomkhulu lokufanele uwente, kwatisa libito lami emkhatsini webantfwana bebantfu.
7Â Ngako-ke, bopha tinkhalo takho kute wente lomsebenti. Tinyawo takho atifakwe ticatfulo, ngoba ukhetsiwe, futsi indlela yakho isetintsabeni, nasemkhatsini wetive letinyenti.
8Â Futsi ngelivi lakho labanyenti labaphakeme bayawutfotjiswa, nangelivi lakho labanyenti labatfobekile bayawuphakanyiswa.
9Â Livi lakho liyawukwekhuta kuloyo lophambukako; futsi ngekwekhuta kwakho lulwini lwenhlebi aluyekele bubi balo.
10Â Titfobe; iNkhosi Nkulunkulu wakho uyawukuhola ngesandla, ikunike imphendvulo emithandazweni yakho.
11Â Ngiyayati inhlitiyo yakho, futsi ngiyivile imithandazo yakho ngalokuphatselene nabomnakenu. Ungabakhetsi ngelutsandvo etikwalabanye, kodvwa lutsandvo lwakho kubo alube njengobe utitsandza wena; futsi lutsandvo lwakho alucicime kubo bonkhe bantfu, nakubo bonkhe labatsandza libito lami.
12Â Futsi bathandazele bomnakenu labaliShumi nakuBili. Becwayise kakhulu ngenca yelibito lami, futsi nabo abecwayiswe ngato tonkhe tono tabo, futsi yetsembeka phambi kwami kulo libito lami.
13Â Futsi emvakwetilingo tabo, nekuhlupheka lokukhulu, buka, mine, iNkhosi, ngitawubafuna, uma bangatenti lukhuni tihlitiyo tabo, futsi bete inkhani ngekumelana nami, batawuguculwa, futsi ngitawubelapha.
14Â Manje, ngitsi kuwe, futsi lengikusho kuwe, ngikusho kubo bonkhe labaliShumi nakuBili: Sukuma ubophe tinkhalo takho, utsatse siphambano sakho, ungilandzele, uphindze uphe timvu tami.
15Â Ningatiphakamisi; ningayivukeli inceku yami Joseph; ngoba ngicinisile ngitsi kini, nginayo, futsi sandla sami siyawuba setikwayo; netikhiya lengiyinikete tona, nakini, angeke titsatfwe kuyo ngite ngibuye.
16 Ngicinisile ngitsi kuwe, nceku yami Thomas, uyindvodza lengiyikhetsile kutsi iphatse tikhiya tembuso wami, ngalokuphatselene nalabaliShumi nakuBili, khashane emkhatsini wetive tonkhe—
17Â Kute ube yinceku yami letawuvula umnyango wembuso etindzaweni tonkhe lapho inceku yami Joseph, nenceku yami Sidney, nenceku yami Hyrum, bangeke bakhone kufika khona.
18Â Ngoba kubo ngibeke umtfwalo wemabandla onkhe kwesikhashana.
19Â Ngaloko-ke, noma ngukuphi lapho bayawukutfuma khona, hamba, ngitawuba nawe; futsi noma nguyiphi indzawo loyawumemetela kuyo libito lami uyawuvulelwa umnyango welitfuba lekusebenta, kute bemukele livi lami.
20Â Noma ngubani lowemukela livi lami wemukela mine, futsi noma ngubani lowemukela mine, wemukela labo, bebuMengameli bekuCala, lengibatfumile, lengibente beluleki ngenca yelibito lami kini.
21 Ngetulu kwaloko, ngitsi kini, noma ngubani leniyawumtfuma egameni lami, ngelivi labomnakenu, labaliShumi nakuBili, lovunywe ngini ngalokufanele futsi wagunyatwa ngini, uyawuba nemandla ekuvula umnyango wembuso wami kunoma ngusiphi sive noma ngukuphi lapho niyawumtfuma khona—
22Â Nangabe bayawutitfoba phambi kwami, futsi bahlale evini lami, balalele nelivi laMoya wami.
23Â Ngicinisile, ngicinisile, ngitsi kini, bumnyama bumbonye umhlaba, nebumnyama lobukhulu bumbonya tingcondvo tebantfu, futsi bonkhe bantfu bonakele phambi kwebuso bami.
24Â Bukani, kuphindzisela kuta ngekushesha kubantfu basemhlabeni, lilanga lelulaka, lilanga lekusha, lilanga lekubhubhisa, lekukhala, lekudzabuka, nelekulila; futsi njengesivunguvungu liyawukuta kuwo wonkhe umhlaba, kusho iNkhosi.
25Â Kuyawucala kuyo indlu yami, futsi kusuka endlini yami kuyawuchubekela embili, kusho iNkhosi;
26Â Kuyawucala emkhatsini walabo labasemkhatsini wenu, kusho iNkhosi, labatente ngatsi bayalati libito lami babe bangalati, labahlambalate ngekumelana nami emkhatsini wendlu yami, kusho iNkhosi.
27Â Ngako-ke, cinisekisani kutsi anitikhatsati mayelana netindzaba telibandla lami kulendzawo, kusho iNkhosi.
28Â Kodvwa hlambululani tinhlitiyo tenu phambi kwami; emvakwaloko hambani niye kuwo wonkhe umhlaba, nishumayele livangeli lami kuto tonkhe tidalwa letingakalitfoli;
29Â Futsi loyo lokholwako aphindze abhajatiswe uyawusindziswa, bese loyo longakholwa, aphindze angabhajatiswa, uyawulahlwa.
30Â Ngoba kini, labaliShumi nakuBili, nalabo, lababuMengameli bekuCala, labakhetfwe nani kutsi babe beluleki nebaholi benu, emandla alobu buphristi niniketiwe, ngemalanga ekugcina nangesikhatsi sekugcina, lapho kukhona luhlelo lwekwengamela lekuphelela kwetikhatsi,
31Â Emandla lawo leninawo, kanye nabo bonkhe labo labanikwe luhlelo lwekwengamela kunoma ngusiphi sikhatsi kusuka ekucaleni kwendalo;
32Â Ngoba ngicinisile ngitsi kini, tikhiya teluhlelo lwekwengamela, lenititfolile, tehle tisuka kubokhokho, futsi ekugcineni kwako konkhe, titfunyelwe kini phansi tisuka ezulwini.
33Â Ngicinisile ngitsi kini, bukani kutsi lukhulu kangakanani lubito lwenu. Hlantani tinhlitiyo tenu netingubo tenu, funa ingati yalesi situkulwane ifunwe etandleni tenu.
34Â Yetsembekani ngite ngibuye, ngoba ngiyabuya masinyane; futsi umvuzo wami unami kukhokhela wonkhe muntfu ngekwemsebenti wakhe. Ngingu-Alfa na-Omega. Amen.