Sigaba 113
Timphendvulo kuleminye imibuto ngemibhalo ya-Isaya, letaniketwa nguJoseph Smith umPhrofethi, eFar West, eMissouri noma edvute nakhona, ngeNdlovulenkhulu 1838.
1–6, Siphunti sakaJese, lihlumela leliphuma kuso, nemphandze yakaJese kuyakhonjwa; 7–10, Insali lesakatiwe yaseSiyoni inelilungelo kubo buphristi futsi iyabitwa kutsi ibuyele eNkhosini.
1 Ngubani Siphunti sakaJese lokukhulunywa ngaso evesini lekucala, lesibili, lesitsatfu, lesine, nelesihlanu esehlukweni selishumi nakunye sa-Isaya na?
2 Ngicinisile naku lokushiwo yiNkhosi: NguKhristu.
3 Liyini lelihlumela lokukhulunywa ngalo evesini lekucala lesehluko selishumi nakunye sa-Isaya, lokufanele liphume eSiphuntini sakaJese na?
4 Buka, naku lokushiwo yiNkhosi: Liyinceku etandleni taKhristu, nganhlanye leyiyentalelwane yaka-Jese nentalelwane yaka-Efrayimu, noma lenguyendlu yaJosefa, lokubekwe kuyo emandla lamakhulu.
5 Yini imphandze yaJese lokukhulunywe ngayo evesini lelishumi esehlukweni selishumi nakunye na?
6 Buka, naku lokushiwo yiNkhosi, yintalelwane yakaJese, neyakaJosefa, kubo buphristi lobungebabo ngalokusemtsetfweni, netikhiya tembuso, kute kube khona siboniso, nekutsi kugcogcwe bantfu bami ngemalanga ekugcina.
7 Imibuto ya-Elias Higbee: Kucondvweni ngemyalo loku-Isaya, esehlukweni semashumi lasihlanu nakubili, livesi lekucala, lotsi: Yembatsa emandla akho, Awu Siyoni—futsi ngubaphi labantfu Isaya labekacondzise kubo na?
8 Bekacondzise kulabo Nkulunkulu lekufanele ababite ngemalanga ekugcina, lekufanele baphatse emandla ebuphristi kubuyisa futsi iSiyoni, nekuhlengwa kwa-Israyeli; futsi kwembatsa emandla akhe kwembatsa ligunya lebuphristi, iSiyoni, lenelilungelo ngekwekutalwa; nekubuyela kulawo mandla lamhlahlekele.
9 Yini lekufanele siyicondze ngekutikhulula kweSiyoni etinketaneni letisentsanyeni yakhe; evesini lesibili na?
10 Kufanele sicondze kutsi insali lesakatiwe iyakhutsatwa kutsi ibuyele eNkhosini labawe kuyo; lokuyotsi uma bakwenta, setsembiso seNkhosi kutsi itawukhuluma nabo, noma ibanike sembulo. Buka livesi lesitfupha, lesikhombisa, nelesiphohlongo. Tinketane letisentsanyeni yayo titicalekiso taNkulunkulu kuyo, noma insali yaka-Israyeli esimeni sabo sekusakatwa emkhatsini webeTive.