Sigaba 48
Sembulo lesaniketwa ngaJoseph Smith umPhrofethi, eKirtland, e-Ohio, mhlaka 10 ngeNdlovulenkhulu, ngemnyaka we-1831. UmPhrofethi bekabutile eNkhosini ngenchubo ekutfoleni imihlaba yekuhlala labaNgcwele. Lolu bekuludzaba lolubalulekile ngenca yekusuka kwemalunga eliBandla emphumalanga neMelika, kulalela umyaleto weNkhosi wekutsi kufanele babutsane e-Ohio (buka tigaba 37:1–3; 45:64).
1–3, LabaNgcwele labase-Ohio kufanele babelane imihlaba yabo nabomnakabo; 4–6, LabaNgcwele kufanele batsenge imihlaba, bakhe emadolobha, futsi balandzele seluleko sebaholi babo labengamele.
1 Kubalulekile kutsi nihlale kwamanje etindzaweni tenu lenihlala kuto, njengobe kuyawuhambisana netimo tenu.
2 Futsi nangabe ninemihlaba, niyawupha incenye kubomnakenu labasemphumalanga;
3 Futsi nangabe ningenayo imihlaba, abatsenge kwamanje etifundzeni letisedvute, njengobe kubonakala kukuhle kubo, ngoba kubalulekile kutsi babe netindzawo tekuhlala kwamanje.
4 Kubalulekile kutsi nonge yonkhe imali leningakhona kuyonga, nekutsi nitfole konkhe leningakhona kukutfola ngekulunga, kute ngekuhamba kwesikhatsi nikhone kutsenga imihlaba letawuba lifa, ngisho nalelidolobha.
5 Lendzawo akukafaneli yembulwe kwamanje; kodvwa emvakwekufika kwabomnakenu labasuka emphumalanga kufanele kubekhona emadvodza latsite latawukhetfwa, futsi atawukwatiswa lendzawo, noma kuwo iyawukwembulwa.
6 Futsi ayawukhetfwa kute atsenge imihlaba, acale abeke sisekelo selidolobha, ngaleso sikhatsi niyawucala kubutsana ndzawonye nemindeni yenu, wonkhe umuntfu ngekwemndeni wakhe, ngekwetimo takhe, nangekukhetfwa kwakhe bumengameli nembhishobhi welibandla, ngekwemitsetfo nemiyaleto leniyitfolile, nalenisetawuyitfola emvakwaloku. Kunjalo nje. Amen.