1 Ngicinisile ngitsi kini, mayelana nabomnakenu labeve buhlungu, bahlushwa, baphindze bakhishwa eveni lelilifa labo—

2 Mine, iNkhosi, ngitivumele tinhlupheko teta kubo, labahlushwe ngato, ngenca yetimphambeko tabo;

3 Noko ngitawubenta babe bami, futsi bayawuba ngebami ngalelo langa lengiyawukuta ngalo kutawulungisa bantfu bami labaligugu.

4 Ngako-ke, kufanele bajeziswe baphindze bavivinywe, njenga-Abrahama, lowayaletwa kutsi anikele ngendvodzana yakhe leyodvwa labekanayo.

5 Ngoba bonkhe labo labangeke bacinisele ekuyalweni, kodvwa bangiphike, ngeke bangcweliswe.

6 Bukani, ngitsi kini, bekunekuphikisana, nencabano, nemona, nemibango, netifiso tenkhanuko netekulangatelela emkhatsini wabo; ngako-ke ngaleti tintfo bangcolisa emafa abo.

7 Bebaphuta kulalela livi leNkhosi Nkulunkulu wabo; ngako-ke, iNkhosi Nkulunkulu wabo iyaphuta kulalela imithandazo yabo, kubaphendvula ngelilanga labo lenhlupheko.

8 Ngelilanga labo lekuthula basibukela phansi seluleko sami; kodvwa, ngelilanga labo lenhlupheko, ngenca yetidzingo betama kungifuna.

9 Ngicinisile ngitsi kini, nanoma bonile, inhlityo yami igcwele luvelo kubo. Angeke ngibalahle ngalokuphelele; futsi ngelilanga lelulaka ngitawukhumbula kuba nebubele.

10 Ngifungile, futsi simemetelo sesiphumile ngemyaleto waphambilini lengininike wona, kutsi ngitawuwisela inkemba yentfukutselo yami kute kuzuze bantfu bami; futsi njengobe ngishito, kuyawukwenteka.

11 Intfukutselo yami itawutfululelwa masinyane ngaphandle kwesilinganiso etikwetive tonkhe; futsi loku ngitawukwenta lapho sitja sebubi babo sesigcwele.

12 Futsi ngalelo langa bonkhe labatfolwa etikwembhoshongo wekulindza, noma ngalamanye emagama, onkhe ema-Israyeli ami, uyawusindziswa.

13 Futsi labo labasakatekile bayawugcogcwa.

14 Futsi bonkhe labo labakhalile bayawudvudvutwa.

15 Futsi bonkhe labo labanikele ngetimphilo tabo ngenca yelibito lami bayawukwetfweswa umchele.

16 Ngako-ke, tinhlitiyo tenu atidvudvuteke ngalokuphatselene neSiyoni; ngoba bonkhe bantfu basetandleni tami; Bindzani futsi nati kutsi nginguNkulunkulu.

17 ISiyoni angeke isuswe endzaweni yayo, nanoma bantfwana bayo basakatekile.

18 Labo labasele, futsi labahlantekile enhlitiyweni, bayawubuya, batfole emafa abo, bona nebantfwana babo, ngemaculo enjabulo yaphakadze, kutawukwakha tindzawo letitindzala taseZion.

19 Futsi tonkhe leti tintfo titawukwenteka kute kugcwaliseke loko lokwabhalwa baphrofethi.

20 Futsi, bukani, kute lenye indzawo lekhetsiwe ngaphandle kwaleyo lengiyikhetsile, futsi akuyubakhona lenye indzawo lekhetfwako ngaphandle kwaleyo lengiyikhetsile, yemsebenti wekugcogca labangcwele bami—

21 Kute kufike lilanga lapho ingatfolakali indzawo yabo, futsi emvakwaloko nginaletinye tindzawo lengitawubakhetsela tona, futsi tiyawubitwa ngetikhonkhwane, kwandzisa noma kucinisa iSiyoni.

22 Bukani, kuyintsandvo yami, kutsi bonkhe lababita libito lami, nalabangikhontako ngekwelivangeli lami lelingunaphakadze, kufanele babutsane ndzawonye, beme etindzaweni letingcwele;

23 Futsi balungiselele sembulo lesitawukuta, lapho indvwangu yekumbonya lithempeli lami, ethendeni lami, lefihla umhlaba, iyawususwa, bese bonkhe bantfu bayawungibona kanyekanye.

24 Futsi konkhe lokungcolile, bantfu, noma tilwane tesiganga, noma tinyoni telizulu, noma tinhlanti taselwandle, lokuphila emhlabeni, kuyawubhujiswa;

25 Futsi naloko kwemvelo lokutisekelo temkhatsi kuyawuncibilika ngekushisa lokukhulu; futsi tonkhe tintfo tiyawuba tinsha, kute lwati lwami nenkhatimulo kubekhona emhlabeni wonkhe.

26 Futsi ngalelo langa butsa emkhatsini webantfu, nebutsa emkhatsini wetilwane, yebo, butsa bato tonkhe tidalwa, buyawuphela phambi kwebuso bami.

27 Ngalelo langa noma ngayini umuntfu layawuyicela, uyawuphiwa.

28 Ngalelo langa Sathane angeke abe nemandla ekulinga namunye umuntfu.

29 Futsi kuyawubabete lusizi ngoba kute kufa.

30 Ngalelo langa umntfwana angeke afe ate abe mdzala; nemphilo yakhe iyawuba njengeminyaka yesihlahla;

31 Futsi uma afa angeke alale, lokusho kutsi emhlabatsini, kodvwa uyawuguculwa ngekuphatima kweliso, bese uyahlwitfwa, futsi kuphumula kwakhe kuyawuba yintfokoto.

32 Yebo, ngicinisile ngitsi kini, ngalelo langa mhla iNkhosi ibuya, iyawukwembula tonkhe tintfo—

33 Tintfo lesetendlulile, naletifihlakele lebetingatiwa ngumuntfu, tintfo temhlaba, lowentiwa ngato, kanye nenhloso nesiphetfo sawo—

34 Tintfo letiligugu kakhulu, tintfo letingetulu, netintfo letingephansi, tintfo letisemhlabeni, nasetikwemhlaba, kanye nasezulwini.

35 Futsi bonkhe labo labahlushwa ngenca yelibito lami, babeketela ngelukholo, nanoma badzela kuphila kwabo ngenca yami noko bayawuyitfola yonkhe lenkhatimulo.

36 Ngaloko-ke, ningesabi kute kube sekufeni; ngoba kulomhlaba kutfokota kwenu akukapheleli, kodvwa kimi kutfokota kwenu kuphelele.

37 Ngako-ke, ningatikhatsati ngemtimba, noma imphilo yemtimba; kodvwa tikhatsateni ngemphefumulo, nangekuphila kwemphefumulo.

38 Futsi funani buso beNkhosi njalo, kute ngekubeketela nizuze imiphefumulo yenu, futsi niyawuba nekuphila lokuphakadze.

39 Uma bantfu babitelwa evangelini lami lelingunaphakadze, futsi benta sivumelwano ngesivumelwano saphakadze, babalwa njengaswayi wemhlaba nenzuzo kubantfu;

40 Babitwa kutsi babe yinzuzo kubantfu; ngako-ke, uma lolo swayi lwemhlaba selulahlekelwe bunandzi balo, buka, kusukela ngaleso sikhatsi lusuke selungenamsebenti walutfo kodvwa kutsi lulahlwe ngephandle lunyatselwe ngaphansi kwetinyawo tebantfu.

41 Bukani, naku kuhlakanipha mayelana nebantfwana baseSiyoni, ngisho labanyenti, kodvwa hhayi bonkhe; batfolwa batoni, ngako-ke kufanele bajeziswe—

42 Loyo lotiphakamisako uyawutfotjiswa, bese loyo lotitfobako uyawuphakanyiswa.

43 Manje, ngitawunikhombisa umfanekiso, kute nati intsandvo yami mayelana nekubuyiselwa kweSiyoni.

44 Indvodza letsite lehloniphekile beyinendzawo letsite yemhlaba, lebeyiyinhle kakhulu; yase itsi etincekwini tayo; Hambani niye esivinini sami, kulendzawo yemhlaba lenhle kakhulu, nihlanyele tihlahla temincumo letilishumi nakubili;

45 Nibeke balindzi ndzawo tonkhe, nakhe umbhoshongo, kute umuntfu akhone kubuka live ndzawo tonkhe, abe ngumlindzi embhoshongweni, kute tihlahla tami temincumo tingephulwa uma kufika sitsa sitawukweba nekutidlela titselo tesivini sami.

46 Manje, tinceku tendvodza lehloniphekile tahamba tenta njengobe inkhosi yato beyiyaletile, tahlanyela tihlahla temincumo, takha lutsango ndzawo tonkhe, tabeka balindzi, tacala nekwakha umbhoshongo.

47 Futsi tatsi tisabeka sisekelo sawo, tacala tatsi lomunye kulomunye: Inkhosi iwudzingelani lombhoshongo na?

48 Tabutana sikhatsi lesidze, tatsi lomunye kulomunye: Iwudzingelani inkhosi lombhoshongo, kube kusikhatsi sekuthula na?

49 Akukameli yini lemali ifakwe kubemabhange na? Ngoba kute sidzingo saleti tintfo.

50 Futsi ngesikhatsi tiphikisana lomunye nalomunye tacala kuvilapha, tangayilaleli imiyaleto yenkhosi yato.

51 Futsi sitsa sefika ebusuku, sephula lutsango; tinceku tendvodza lehloniphekile tavuka futsi tesaba tase tiyabaleka; nesitsa sabhubhisa umsebenti wato, saphula netihlahla temincumo.

52 Manje, bukani, indvodza lehloniphekile, inkhosi yesivini, yabita tinceku tayo, yatsi kuto, Kungani! yini imbangela yalobubi lobungaka na?

53 Bekungakafaneli yini nente njengobe nginiyaletile, futsi—emvakwekuhlanyela sivini, nakha lutsango ndzawo tonkhe, nabeka nebalindzi etikwetindvonga talo—naphindze nakha umbhoshongo, nabeka nabogadzi etikwembhoshongo, futsi nasigadza sivini sami, nangete nalala, funa sitsa sinihlasele na?

54 Bukani, umlindzi etikwembhoshongo ngabe usibonile sitsa ngesikhatsi sisesekhashane; futsi ngabe nikhonile kutilungiselela nekusivimba singabulali lutsango lwaso, futsi ngabe nisisindzisile sivini sami esandleni sembhubhisi.

55 Futsi inkhosi yesivini yatsi kuyinye yetinceku tayo: Hamba ugcogcele ndzawonye tinceku tami letisele, utsatse lonkhe libutfo lendlu yami, lokungemachawe ami, emajaha ami, nalabo lesebaneminyaka lesemkhatsini emkhatsini wato tonkhe tinceku tami, labangemabutfo endlu yami, ngaphandle kwalabo lengibakhetse kutsi basale;

56 Nihambe masinyane niye kulomhlaba wesivini sami, nibuyise sivini sami; ngoba ngesami; ngisitsenge ngemali.

57 Ngako-ke, hambani masinyane niye kulomhlaba wami; nibulale tindvonga tetitsa tami; niwise imibhoshongo yato, nisakate nebalindzi bato.

58 Futsi nangabe bagcogcana ndzawonye ngekumelana nani, ngiphindziseleleni etitseni tami, kute masinyane ngite nalabasele bendlu yami siyitsatse lendzawo ibe ngeyetfu.

59 Futsi inceku yatsi enkhosini yayo: Tiyawukwenteka nini leti tintfo na?

60 Yatsi encekwini yayo: Noma kunini nangitsandza; hambani masinyane, nente konkhe lenginiyalete ngako;

61 Futsi loku kuyawuba yimvume yami nesibusiso kuwe—umphatsi lowetsembekile nalohlakaniphile emkhatsini wendlu yami, umbusi embusweni wami.

62 Futsi inceku yayo yahamba masinyane, yenta konkhe lebeyiyaletwe yinkhosi yayo; emvakwemalanga lamanyenti tonkhe tintfo tafezeka.

63 Ngetulu kwaloko, ngicinisile ngitsi kini, ngitawunikhombisa kuhlakanipha kimi ngalokuphatselene nawo onkhe emabandla, nangabe batimisele kuholwa ngendlela lengiyo nalefanele kufeza kusindziswa kwabo—

64 Kute umsebenti wekugcogcwa ndzawonye kwalabangcwele bami uchubeke, kute ngibakhele egameni lami etikwetindzawo letingcwele; ngoba sikhatsi sesivuno sesifikile, futsi livi lami kufanele lifezeke.

65 Ngako-ke, kufanele ngigcogcele ndzawonye bantfu bami, ngekwemfanekiso wemabele nelukhula, kute lamabele agcinwe etincolobaneni kute abe nekuphila lokuphakadze, etfweswe umchele ngenkhatimulo yesilestiyali, uma sengita embusweni waBabe kute nginike umvuzo kuloyo naloyo muntfu ngesento sakhe;

66 Bese kutsi lukhula lona luboshwa lube tincumbi, netibopho talo tentiwe ticine, kute lushiswe ngemlilo longacimeki.

67 Ngako-ke, nginika umyaleto kuwo onkhe emabandla, kutsi achubeke nekubutsana ndzawonye etindzaweni lengitikhetsile.

68 Noko, njengobe ngishito kini ngemyaleto waphambilini, kugcogcana kwenu akungabi ngulokuphutfumako, noma kube ngekubaleka; kodvwa tonkhe tintfo atilungiswe kucala.

69 Futsi kute tonkhe tintfo tilungiswe kucala, gcinani umyaleto lengiwunikile mayelana naleti tintfo—

70 Lotsi, noma lofundzisa kutsi, tsengani tonkhe tindzawo ngemali, letingakhona kutsengwa ngemali, esifundzeni lesisedvute nelive lengilikhetsele kutsi libe live laseZion, kute kufezwe kucala kwekugcogcwa kwalabangcwele bami;

71 Wonkhe umhlaba longakhona kutsengwa esifundzeni saseJackson, nasetifundzeni letisedvute, nishiye lokusele esandleni sami.

72 Manje, ngicinisile ngitsi kini, onkhe emabandla akabutsele ndzawonye yonkhe imali yawo, leti tintfo atenteke ngesikhatsi lesifanele, kodvwa hhayi ngekushesha; futsi netame kutsi tonkhe tintfo tilungiswe kucala.

73 Futsi emadvodza lahloniphekile akakhetfwe, ngisho emadvodza lahlakaniphile, niwatfumele kuyawutsenga lemihlaba.

74 Futsi emabandla lasemaveni lasemphumalanga, uma sekakhiwe, uma angalalela lomyalo angatsenga imihlaba futsi abutsane ndzawonye kuyo, ngaleyo ndlela angacinisekisa iSiyoni.

75 Namanje kukhona lokwanele lokugciniwe, yebo, ngisho inala, kute kubuyiselwe iSiyoni, nekwakha tindzawo tayo letitindzala, tingaphindzi tibhujiswe, uma emabandla, latibita ngelibito lami, atimisele kulalela livi lami.

76 Ngetulu kwaloko ngitsi kini, labo labasakatwe titsa tabo, kuyintsandvo yami kutsi bangachubeka nekuncusa kuncemphetelwa, nekubuyiselwa, ngesandla salabo lababekwe njengebabusi futsi labasemagunyeni etikwenu—

77 Ngekwemitsetfo futsi nangemtsetfosisekelo webantfu, lengivumele kutsi umiswe, futsi lokufanele ugcinelwe emalungelo nekuvikeleka kwabo bonkhe bantfu, ngekwemigomo lelungile nalengcwele;

78 Kute wonkhe umuntfu ente ngekwetimfundziso nemgomo lophatselene nelikusasa, ngekwesincumo selilungelo lekutikhetsela lengimnike sona, kute wonkhe umuntfu atiphendvulele ngetono takhe ngelilanga lekwehlulela.

79 Ngako-ke, akulungi kutsi umuntfu abe sigcili salomunye.

80 Ngalesi sizatfu ngiwumisile uMtsetfosisekelo walelive, ngetandla temadvodza lahlakaniphile lengiwavusele yona kanye lenhloso, futsi ngalibuyisa live ngekucitsa ingati.

81 Manje, ngingabafananisa nani bantfwana baseSiyoni na? Ngitawubafananisa nemfanekiso wewesifazane nemehluleli lolungile, ngoba bantfu kufanele bahlale bathandaza njalo bangakhatsali, lotsi—

82 Bekukhona edolobheni tsite umehluleli lobekangamesabi Nkulunkulu, angangenelani nemuntfu.

83 Futsi bekukhona umfelokati kulelo dolobha lobekasolo afika kuye, atsi: Ngiphindzisele esitseni sami.

84 Futsi kwaba sikhatsi angavumi, kodvwa emvakwesikhatsi watsi enhlitiyweni yakhe: Noma ngingamesabi Nkulunkulu, ngingangenelani nemuntfu, noko ngoba lomfelokati uyangihlupha njalo ngitawumphindziselela, funa angikhatsate ngekufika kwakhe njalonjalo

85 Ngako-ke ngitawubafananisa naloko bantfwana baseSiyoni.

86 Abatincusele etinyaweni temehluleli;

87 Futsi uma angabanaki, abancuse etinyaweni tembusi;

88 Uma nembusi angabanaki, abancuse etinyaweni temengameli;

89 Uma nemengameli angabanaki, ngaleso sikhatsi iNkhosi itawucala kwenta futsi iphume endzaweni yayo yekubhaca, futsi ngentfukutselo yayo ihluphe sive;

90 Futsi ngekungatfokoti kwayo lokukhulu, nangentfukutselo yayo leyesabekako, ngesikhatsi sayo, itawubasusa labo lababi, labangaketsembeki, netisebenti letingakalungi, futsi ibabele incenye yabo emkhatsini webatentisi, nalabangakholwa;

91 Ngisho ebumnyameni lobungephandle, lapho kuyawuba khona kukhala, nesililo, nekugedletela kwematinyo.

92 Ngako-ke, thandazani, kute tindlebe tabo tive kukhala kwenu, kute ngibe nesihawu kubo, kute letintfo tingabehleli.

93 Lengikushito kini kumele kwenteke, kute bonkhe bantfu basale bangenaso sizatfu;

94 Kute bantfu labahlakaniphile nebabusi beve baphindze bati loko labangatange bakucondze;

95 Kute ngichubeke ngente sento sami, sento sami lesingakejwayeleki, futsi ngifeze umsebenti wami, umsebenti wami longakejwayeleki, kute bantfu behlukanise emkhatsini walabalungile nalababi, kusho Nkulunkulu wenu.

96 Ngetulu kwaloko, ngitsi kini, kuphambene nemyaleto wami nentsandvo yami kutsi inceku yami Sidney Gilbert itsengise indlu yami yengcebo, lengiyikhetsele bantfu bami, etandleni tetitsa tami.

97 Loko lengikukhetsile akungangcoliswa titsa tami, ngemvume yalabo labatibita ngelibito lami;

98 Ngoba lesi sono lesibuhlungu nalesibi kakhulu kimi, nakubantfu bami, ngenca yeleto tintfo lengitimemetele futsi letitawukwehlela tive masinyane.

99 Ngako-ke, kuyintsandvo yami kutsi bantfu bami bafune ngekwelilungelo labo, futsi babambelele kuloko lengikukhetsele bona, nanoma bangeke bavunyelwe kuhlala kuko.

100 Noko, angisho kutsi angeke bahlale kuko; ngoba nangabe baletsa titselo nemisebenti lefanele umbuso wami bayawuhlala kuko.

101 Bayawukwakha, futsi lomunye angeke akuzuze loko njengelifa; bayawuhlanyela tivini, futsi bayawukudla titselo tato. Kunjalo nje. Amen.