Sigaba 102
Emaminitsi ekuhlelwa kwemkhandlu lomkhulu wekucala weliBandla, eKirtland, e-Ohio, mhlaka 17 iNdlovulenkhulu, 1834. Emaminitsi ekucala abhalwa Babonisi Oliver Cowdery na Orson Hyde. UmPhrofethi wawabuyeketa lamaminitsi ngelilanga lelilandzelako, lokwatsi ngakusasa lamaminitsi lalungisiwe emukelwa ngelivi linye ngumkhandlu lomkhulu njenge “ nchubo nemtsetfosisekelo wemkhandlu lomkhulu” weliBandla. Emavesi 30 kuya ku 32, laphatselene nemKhandlu webaPhostoli labaliShumi nakuBili, engetwa ngemnyaka wa 1835 ngekuyaletwa nguJoseph Smith ngesikhatsi lesi sigaba silungiselelwa kutsi sishicilelwe encwadzini yeMfundziso neTivumelwano.
1–8, Umkhandlu lomkhulu uyakhetfwa kute ucatulule tinkinga letibalulekile letivela eBandleni; 9–18, Inchubo yekuteka emacala iyaniketwa; 19–23, Mengameli wemkhandlu ukhipha sincumo; 24–34, Inchubo yekwendlulisa emacala ibekwa ebaleni.
1 Ngalelilanga umkhandlu wabo bonkhe baphristi labakhulu labangemashumi lamabili nakune wahlangana endlini yaJoseph Smith, lomNcane, ngesembulo, wachubeka nekuhlela umkhandlu lomkhulu welibandla laKhristu, lowawutawufaka ekhatsi baphristi labakhulu labalishumi nakubili, namunye noma batsatfu bomengameli njengoba kudzingekile.
2 Umkhandlu lomkhulu wakhetfwa ngesembulo kute ucatulule tinkinga letibalulekile lebetingavela ebandleni, lebetingeke ticatululwe libandla noma ngumkhandlu wembhishobhi kute kuneliseke labatsintsekako.
3 Joseph Smith, lomNcane, Sidney Rigdon naFrederick G. Williams bavunywa njengabomengameli ngelivi lemkhandlu; kwase kutsi Joseph Smith, lomDzala, John Smith, Joseph Coe, John Johnson, Martin Harris, John S. Carter, Jared Carter, Oliver Cowdery, Samuel H. Smith, Orson Hyde, Sylvester Smith, naLuke Johnson, baphristi labakhulu, bakhetfwa kutsi babe ngumkhandlu lotawuhlala ukhona welibandla, ngelivi linye lemkhandlu.
4 Lamalunga emkhandlu labalwe ngenhla abese ayabutwa kutsi ayakwemukela yini kubekwa kwawo na, nekutsi atawusebenta kuleso sikhundla ngekwemtsetfo wasezulwini na, lokwatsi kuloko bonkhe baphendvula kutsi bayakwemukela kubekwa kwabo, nekutsi batawuhlala etikhundleni tabo ngekwemusa waNkulunkulu labaphiwe wona.
5 Linani lebelakha umkhandlu, lelavota egameni lelibandla futsi lavotela libandla ekukhetseni lamalunga emkhandlu labalwe ngenhla lalingemashumi lamane nakutsatfu, lokwakungulaba: baphristi labakhulu labayimfica, babonisi labalishumi nesikhombisa, baphristi labane, nemalunga lalishumi nakutsatfu.
6 Kwavotelwa kutsi: umkhandlu lomkhulu angeke ube nemandla ekwenta tintfo ngaphandle kwemalunga emkhandlu lasikhombisa labalwe ngenhla, noma ngaphandle kwalababalandzelako labakhetfwe ngendlela lefanele.
7 Laba labasikhombisa bayawuba nemandla ekukhetsa labanye baphristi labakhulu, labangababona kutsi bafanelekile futsi bangakwati kusebenta endzaweni yalawo malunga emkhandlu langekho.
8 Kwavotelwa kutsi: noma kunini uma kuvela sikhala ngekufa, kususwa esikhundleni ngenca yesiphambeko, noma kususwa eminceleni yekuphatfwa kwelibandla, kwanoma ngumuphi wemalunga emkhandlu kulaba lababalwe ngenhla, siyawugcwaliswa ngekukhetfwa lokwentiwa ngumengameli noma bomengameli, futsi kuvunyelwe ngelivi lemkhandlu wabo bonkhe baphristi labakhulu, lohlangene ngaleso sizatfu, kwenta tintfo egameni lelibandla.
9 Mengameli welibandla, lophindze abe ngumengameli wemkhandlu, ukhetfwa ngesembulo, futsi avunywe ekuphatseni kwakhe ngelivi lelibandla.
10 Futsi kungekwesitfunti sesikhundla sakhe kutsi engamele lomkhandlu welibandla; futsi kulilungelo lakhe kwelekelelwa ngulabanye bomengameli lababili, labakhetfwe ngendlela lefana naleyo naye lucobo lakhetfwe ngayo.
11 Futsi uma kwenteka kubakhona munye longekho noma lababili kulabakhetsiwe kumsita, unemandla ekwengamela umkhandlu ngaphandle kwemsiti; noma uma kwenteka kutsi yena lucobo abengekho, laba labanye bomengameli banemandla ekwengamela esikhundleni sakhe, bobabili noma munye wabo.
12 Noma kunini lapho umkhandlu lomkhulu welibandla laKhristu uhlelwa ngendlela lefanele, ngekwesifanekiso lesingenhla, kuyawuba ngumsebenti wemalunga emkhandlu lalishumi nakubili kushaya inkatho ngetinombolo, futsi ngayo kutfolakale kutsi ngubani kulaba labalishumi nakubili lotawukhuluma kucala, kucala ngenombolo yekucala kanjalo ngekulandzelana kuya kuyelishumi nakubili.
13 Noma kunini lapho umkhandlu uhlangana kudzingidza noma nguluphi ludzaba, lamalunga emkhandlu lalishumi nakubili uyawuncuma kutsi lelicala lilukhuni noma cha; uma lingasilo lelilukhuni, emalunga emkhandlu lamabili kuphela ayawukhuluma ngalo, ngekwendlela lebhalwe ngenhla.
14 Kodvwa uma kucatjangwa kutsi lilukhuni, kuyawukhetfwa lamane; futsi uma lilukhuni kakhulu, lasitfupha; kodvwa akuyukwenteka kutsi kukhetfwe langetulu kwalasitfupha kutsi akhulume.
15 Lobekwa licala, kuko konkhe, unelilungelo lencenye yinye yemkhandlu, kuvimbela kwedzelelwa noma kwehlulela ngalokungakafaneli.
16 Futsi emalunga emkhandlu lakhetfwe kutsi akhulume phambi kwemkhandlu kufanele etfule ludzaba, emvakwekubuketa bufakazi, njengoba bunjalo phambi kwemkhandlu; futsi wonkhe umuntfu kufanele akhulume ngebucotfo nangekulunga.
17 Lawo malunga emkhandlu ladvonsa tinombolo letilinganako, letingu, 2, 4, 6, 8, 10, na 12, ngiwo lokufanele amele lotfweswe licala, futsi bavikele kwedzelelwa nekwehlulela ngalokungakafaneli.
18 Ngaso sonkhe sikhatsi ummangali nemmangalelwa banelilungelo lekutikhulumela phambi kwemkhandlu, emvakwekulalelwa kwebufakazi nemalunga emkhandlu lakhetsiwe kutsi akhulume ecaleni sekacedzile kuphawula kwawo.
19 Emvakwekulalelwa kwebufakazi, emalunga emkhandlu, ummangali nemmangalelwa sebakhulumile, mengameli kufanele anikete sincumo ngekulicondza kwakhe licala, bese ucela emalunga emkhandlu alabalishumi nakubili kutsi avumele lokufanako ngelivoti lawo.
20 Kodvwa uma emalunga emkhandlu lasele, langakate akhulume, noma ngumuphi wawo, emvakwekulalelwa kwebufakazi kanye nekucela ngekungakhetsi, atfola liphutsa ngesincumo semengameli, angakuveta loko, futsi licala liyawuphindze lilalelwe.
21 Futsi uma, emvakwekuphindza lilalelwe ngekucophelela, kuvetwa noma nguluphi lolunye lwati lolwengetiwe ecaleni, sincumo siyawushintjwa njengoba kufanele.
22 Kodvwa uma lungekho lolunye lwati lolwengetiwe loluniketiwe, sincumo sekucala siyawukuma, liningi lemkhandlu libe nemandla ekuncuma lokufanako.
23 Uma kunebumatima mayelana nemfundziso noma umgomo, uma kute lokwenele lokubhaliwe kwenta licala licace emicondvweni yemkhandlu, mengameli angabuta futsi atfole intsandvo yeNkhosi ngesembulo.
24 Baphristi labakhulu, uma bakhashane, banemandla ekubita nekuhlela umkhandlu ngendlela leshiwo ngenhla, kucatulula tinkinga, uma labatsintsekako noma munye wabo akucela loko.
25 Futsi lomkhandlu loshiwo webaphristi labakhulu uyawuba nemandla ekukhetsa munye wabo kwengamela lowomkhandlu kwesikhashane.
26 Kuyawuba ngumsebenti wemkhandlu loshiwo kwendlulisa, masinyane, ikhophi yalokuchubekile, nebufakazi lobuphekeletela sincumo sabo, emkhandlwini lomkhulu lapho kukhona khona Bumengameli bekuCala beliBandla.
27 Uma labatsintsekako noma lomunye walaba anganeliseki ngesincumo salowo mkhandlu loshiwo, bangalendlulisela emkhandlwini lomkhulu lapho kukhona khona Bumengameli bekuCala beliBandla, futsi liphindvwe lilalelwe, lelo cala liyawube selichutjwa lapho, ngekwesifanekiso sekucala lesibhaliwe, kube shengatsi akukate kutsatfwe sincumo.
28 Lomkhandlu webaphristi labakhulu labakhashane kufanele ubitwe kuphela uma kunetinkinga letilukhuni kakhulu telibandla; futsi kute inkinga lelula lenesizatfu lesanele sekubita lowomkhandlu.
29 Baphristi labakhulu labahambako noma labahlala khashane banemandla ekusho kutsi kunesidzingo yini sekubita lowomkhandlu noma cha.
30 Kunemehluko emkhatsini wemkhandlu lomkhulu noma baphristi labakhulu labahambako labakhashane, nemkhandlu lomkhulu webaphristi labahambako lofaka ekhatsi baphostoli labalishumi nakubili, etincumeni tabo.
31 Esincumeni salaba bekucala kungaba nekwendluliswa kwelicala; kodvwa esincumeni salaba lokugcinwe ngabo kute.
32 Laba lokugcinwe ngabo bangabutwa kuphela ngulabaneligunya lelikhulu ebandleni lonkhe uma baphambuka.
33 Kwavunyelwana kutsi: mengameli noma bomengameli lapho kukhona khona Bumengameli bekuCala beliBandla bayawuba nemandla ekuncuma kutsi licala lelinjalo, lelendlulisiwe, ngekulunga lifanele liphindvwe lilalelwe, emvakwekucwaninga kwendluliswa nebufakazi nalokushiwo lokuphekeletela ludzaba.
34 Emalunga emkhandlu lalishumi nakubili emvakwaloko abese achubeka nekushaya inkatho noma kuvota, kucinisekisa kutsi ngubani lokwakufanele akhulume kucala, futsi umphumela kwaba ngulaba: 1, Oliver Cowdery; 2, Joseph Coe; 3, Samuel H. Smith; 4, Luke Johnson; 5, John S. Carter; 6, Sylvester Smith; 7, John Johnson; 8, Orson Hyde; 9, Jared Carter; 10, Joseph Smith, lomDzala; 11, John Smith; 12, Martin Harris.Emvakwemthandazo umhlangano wavalwa.
Oliver Cowdery,
Orson Hyde,
Bomabhalane