Sigaba 125
Sembulo lesaniketwa ngaJoseph Smith umPhrofethi, eNauvoo, e-Illinois, ngeNdlovulenkhulu 1841, ngalokuphatselene nalabaNgcwele labebasendzaweni yase-Iowa.
1–4, LabaNgcwele kufanele bakhe emadolobha baphindze babutsane kuto tinkhonkhwane taseSiyoni.
1 Yini intsandvo yeNkhosi ngalokuphatselene nalabangcwele eNdzaweni yase-Iowa na?
2 Ngicinisile, naku lokushiwo yiNKhosi, ngitsi kini, uma labo labatibita ngelibito lami futsi labetama kuba ngulabangcwele bami, uma batawukwenta intsandvo yami baphindze bagcine imiyaleto yami ngalokuphatselene nabo, ababutsane ndzawonye etindzaweni lengitawubakhetsela tona ngenceku yami Joseph, bakhe nemadolobha egameni lami, kute balungiselele loko lokubekelwe sikhatsi lesitako.
3 Abakhe lidolobha egameni lami emhlabeni lobukene nelidolobha laseNauvoo, balibite ngekutsi yiZarahemla.
4 Futsi bonkhe labaphuma emphumalanga, nasenshonalanga, nasenyakatfo, naseningizimu, labanesifiso sekuhlala kulo, ababe nelifa labo lapho, kanjalo nasedolobheni laseNashville, noma edolobheni laseNauvoo, nakuto tonkhe tikhonkhwane lengitikhetsile, kusho iNkhosi.