Sigaba 138
Umbono lowaniketwa Mengameli Joseph F. Smith eSalt Lake City, e-Utah, mhlaka 3 iMphala, 1918. Enkhulumeni yakhe yekuvula uMhlangano lomKhulu weNcenye yemnyaka wemashumi lasiphohlongo nemfica weliBandla, lowawubanjwe mhlaka 4 iMphala, 1918, Mengameli Smith wamemetela kutsi bekatfole imilayeto lehlukahlukene levela kuNkulunkulu etinyangeni letendlulile. Munye walena, bewuphatselene nekuhambela kweMsindisi emimoyeni yalabafile ngesikhatsi umtimba Wakhe usethuneni, Mengameli Smith lebekawutfole ngayitolo. Wabhalwa ngaleso sikhatsi kulandzela kuvalwa kwalomhlangano. Mhlaka 31 iMphala 1918, waletfwa kubeluleki kuBumengameli bekuCala, uMkhandlu walabaliShumi nakuBili, nakuMphatriyakhi, wemukelwa ngibo bonkhe ngekuvumelana.
1–10, Mengameli Joseph Smith uzindla ngemibhalo yaPhetro nekuhambela kweNkhosi yetfu eveni lemimoya; 11–24, Mengameli Smith ubona labafile labalungile bahlangene epharadisi nenkonzo yaKhristu emkhatsini wabo; 25–37, Ubona kutsi kushunyayelwa kwelivangeli kwakuhlelwe kanjani emkhatsini wemimoya; 38–52, Ubona Adamu, Eva, nalabaningi bebaphrofethi labangcwele eveni lemimoya labebabuka simo sabo njengemimoya ngaphambi kwekuvuswa kwabo njengesigcili; 53–60, Labafile labalungile balesi sikhatsi bayachubeka nemisebenti yabo eveni lemimoya.
1 Mhlaka 3 iMphala, ngemnyaka wemakhulu lalishumi nemfica nelishumi nesiphohlongo, ngahlala egumbini lami ngizindla ngemibhalo lengcwele;
2 Ngicabanga ngemnikelo lomkhulu lohlawulako lowentiwa yiNdvodzana yaNkulunkulu, kute kuhlengwe umhlaba;
3 Nelutsandvo lolukhulu nalolumangalisako lolwakhonjiswa nguBabe neNdvodzana ngekuta kweMhlengi emhlabeni;
4 Kutsi ngenhlawulo yakhe, nangekutfobela imigomo yelivangeli, luntfu lungasindziswa.
5 Ngesikhatsi ngisacabanga ngaloko, ingcondvo yami yabuyela emibhalweni yemphostoli Phetro, leyayibhekiswe kulabangcwele basemandvulo labebasakateke ndzawo tonkhe ePhontusi, Galathiya, Khaphadosiya, nakuletinye tincenye tase-Asiya, lapho livangeli belishunyayelwe khona emvakwekubetselwa kweNkhosi
6 Ngavula liBhayibheli ngafundza sehluko sesitsatfu nesesine sencwadzi yekucala yaPhetro, futsi ngesikhatsi ngisafundza ngaba nekucondza lokukhulu, ngetulu kwaloko lengake ngaba nako ngaphambilini, ngaleti tigaba letilandzelako:
7 “Ngoba naye Khristu wanihluphekela, kwabakanye ngetono, lolungile wafela labangakalungi, kute asimikise kuNkulunkulu, wabulawa ngekwemtimba, kepha wavuswa ngaMoya;
8 Wahamba ngaye loMoya wayawushumayela imimoya yalabebaboshiwe.
9 Ngalesinye sikhatsi lebeyingalaleli, ngesikhatsi Nkulunkulu abalindzele ngekubeketela ngemalanga ekwakhiwa kwemkhumbi waNowa, kuwo labambalwa, lokusho kutsi, labasiphohlongo, bangena basindza emantini.” (1 yaPhetro 3:18–20)
10 “Ngoba nguloko lokwabangela livangeli lishunyayelwe ngisho nakulabafile, khona batawukwehlulelwa njengabo bonkhe bantfu bemhlaba, kodvwa baphile ngaNkulunkulu kumoya.” (1 yaPhetro 4:6.)
11 Ngisazindla ngaleti tintfo letibhaliwe, emehlo ekucondza kwami avuleka, naMoya weNkhosi waba setikwami, ngabona ticuku talabafile, labancane nalabakhulu.
12 Bebabutsene ndzawonye endzaweni yinye ngemacembu langabaleki emimoya yalabalungile, labebatsembekile kubo bufakazi baJesu ngesikhatsi basaphila emhlabeni;
13 Labebente umnikelo lofana nemnikelo lomkhulu weNdvodzana yaNkulunkulu, futsi labebeve tinhlupheko egameni leMhlengi wabo.
14 Bonkhe laba bebashiye lomhlaba, bacinile etsembeni lekuvuka lokuhle kakhulu, ngemusa waNkulunkulu Babe neNdodzana yakhe leTelwe Yodvwa, Jesu Khristu.
15 Ngabona kutsi bebagcwele injabulo nentfokoto, futsi bebatfokota kanyekanye ngenca yekutsi lilanga lekukhululwa kwabo beselusondzele.
16 Bebabutsene balindzele kufika kweNdvodzana yaNkulunkulu eveni lemimoya, kutawumemetela kuhlengwa kwabo kuto tibopho tekufa.
17 Lutfuli lwabo lolulele lwalutawubuyiselwa lube sesimeni lesiphelele, litsambo etsanjeni lalo, nemisipha nenyama etikwematsambo, umoya nemtimba kwakutawuhlanganiswa kungaphindzi kwehlukaniswe, kute bemukele injabulo lephelele.
18 Ngesikhatsi lesi sicuku lesikhulu silindzile futsi sicoca, sijabulela lihora lekukhululwa kwaso kuto tinkentane tekufa, iNdvodzana yaNkulunkulu yavela, imemetela kukhululwa kulababoshiwe labebatsembekile;
19 Futsi lapho washumayela kubo livangeli lelingunaphakadze, imfundziso yekuvuka kanye nekuhlengwa kweluntfu ekuweni, nasetonweni temuntfu ngamunye uma aphendvuka.
20 Kodvwa kulababi akayanga, nasemkhatsini walabangakalungi nalabangaphendvukanga labebatingcolisile basesenyameni, akakhulumanga kubo;
21 Nalabo labahlubuka nabaphika bufakazi netecwayiso tebaphrofethi basemandvulo abatange bayibone inkhatimulo yakhe, noma babubuke buso bakhe.
22 Lapho bebakhonakhona laba, bekubusa bumnyama, kodvwa emkhatsini walabalungile bekukhona kuthula;
23 Futsi labaNgcwele bakujabulela kukhululwa kwabo, baguca ngemadvolo abo bayemukela iNdvodzana yaNkulunkulu njengeMhlengi neMkhululi wabo ekufeni nasetinketaneni tesihogo.
24 Buso babo bakhanya, nenkhatimulo ngenca yebukhona beNkhosi yahlala etikwabo, bahlabela emaculo ekudvumisa egameni lakhe lelingcwele.
25 Ngamangala, ngoba ngangicondza kutsi uMsindzisi wacitsa iminyaka lemitsatfu enkonzweni yakhe emkhatsini wemaJuda nalabo bendlu yaka-Israyeli, etama kubafundzisa livangeli lelingunaphakadze futsi ababitela ekuphendvukeni;
26 Noko, nanoma enta imisebenti yakhe lemikhulu, netimangaliso, nekumemetela liciniso, ngemandla lamakhulu nangeligunya, baba mbalwa labalalela livi lakhe, bajabula nangebukhona bakhe, futsi bemukela insindziso etandleni takhe.
27 Kodvwa inkonzo yakhe emkhatsini walabo labafile yayilinganiselwe esikhatsini lesifisha emkhatsini wekubetselwa nekuvuka kwakhe;
28 Ngatibuta ngimangele ngemavi aPhetro—lapho atsi iNdvodzana yaNkulunkulu yashumayela imimoya leyayiboshiwe, ngalesinye sikhatsi lebeyikadze ingalaleli, ngesikhatsi kubeketela kwaNkulunkulu kubalindzile emalangeni aNowa—futsi nekutsi kwenteka kanjani kutsi ashumayele kuleyo mimoya aphindze ente nemisebenti lefanele emkhatsini wabo ngesikhatsi lesincane kangaka.
29 Futsi ngisatibuta ngimangele, emehlo ami avuleka, nekucondza kwami kwandziswa, ngacondza kutsi iNkhosi ayiyanga yona lucobo lwayo emkhatsini walababi nalabala liciniso, kuyawubafundzisa;
30 Kodvwa buka, emkhatsini walabalungile, wahlela emabutfo akhe, wakhetsa titfunywa, letembatsiswe ngemandla nangeligunya, watitfuma kutsi tihambise kukhanya kwelivangeli tikuyise kulabo labebasebumnyameni, ngisho kuyo yonkhe imimoya yebantfu; futsi lashunyayelwa kanjalo-ke livangeli kulabafile.
31 Futsi letitfunywa lebetikhetsiwe tahamba kuyawushumayela lilanga iNkhosi lebeyitawukhombisa umusa wayo ngalo nekumemetela kukhululeka kwetiboshwa lebetiboshiwe, ngisho nakubo bonkhe labebatawuphendvuka etonweni tabo bemukele livangeli.
32 Lashunyayelwa kanjalo-ke livangeli kulabo labebafe basetonweni tabo, bete lwati leliciniso, noma basetiphambekweni, bangabemukeki baphrofethi.
33 Laba bafundziswa kukholwa kuNkulunkulu, kuphendvuka etonweni, kubhajatiselwa kute kutsetselelwe tono, sipho saMoya loNgcwele ngekubekwa tandla enhloko,
34 Kanye nayo yonkhe leminye imigomo yelivangeli lokwakubalulekile kutsi bayati kute balungele kute behlulelwe njengabo bonkhe bantfu bemhlaba, kodvwa baphile ngaNkulunkulu kumoya.
35 Kwatiswa kanjalo-ke emkhatsini walabafile, labancane nalabakhulu, labalungile nalabetsembekile, kutsi kuhlengwa kuletfwe ngemnikelo weNdvodzana yaNkulunkulu esiphambanweni.
36 Kwatiswa kanjalo-ke kutsi uMhlengi wetfu wacitsa sikhatsi ngesikhatsi ahleti eveni lemimoya, afundzisa futsi alungiselela imimoya letsembekile yebaphrofethi labebafakaze ngaye basesenyameni;
37 Kute bahambise umlayeto wekuhlengwa kubo bonkhe labafile, labekangeke akhone kuya kubo yena lucobo, ngenca yekuhlubuka netiphambeko tabo, kute nabo ngekusetjentelwa tinceku takhe baweve emavi akhe.
38 Emkhatsini walabakhulu nalabanemandla labebabutsene kulelibandla lelikhulu lalabalungile bekukhona Babe Adamu, lomDzala wetiNsuku nababe wabo bonkhe,
39 Namake wetfu lohlonishwa kakhulu Eva, nalabaningi bemadvodzakati akhe letsembekile labekaphile ngetikhatsi letendlulile futsi labekakhonta Nkulunkulu weliciniso nalophilako.
40 Abela, lowafela lukholo wekucala, bekalapho, nemnakabo Sethi, lomunye walabanemandla, nalobekafana ncamashi neyise, Adamu.
41 Nowa, lowanika secwayiso ngazamcolo; Shemi, umphristi lomkhulu lowatiwako; Abrahama, uyise walabatsembekile; bo-Isaka, Jakobe, naMosi, sishayamtsetfo lesikhulu saka-Israyeli.
42 Na-Isaya, lowamemetela ngesiphrofetho kutsi uMhlengi wagcotjwa kute abophe labo labanetinhlitiyo letidzabukile, kumemetela kukhululwa kwalabatfunjiwe, nekukhulula lababoshiwe, nabo bebakhona.
43 Ngetulu kwaloko, Hezekeli, lowakhonjiswa embonweni sigodzi lesikhulu sematsambo lomile, lebekufanele embatsiwe ngenyama, kute aphume futsi ekuvukeni kwalabafile, sekabantfu labaphilako;
44 Danyela, lowabona kungakenteki futsi waphrofetha ngekwakhiwa kwembuso waNkulunkulu ngemalanga ekugcina, lowawungeke uphindze ubhujiswe noma uniketwe labanye bantfu;
45 Eliyasi, lobekanaMosi eNtsabeni yeKuguculwa;
46 NaMalakhi, umphrofethi lowafakaza ngekubuya kwa-Eliya—Moroni lakhuluma ngaye naye kumPhrofethi Joseph Smith, amemetela kutsi kufanele afike ngaphambi kwekucala kwelilanga lelikhulu nalelesabekako leNkhosi—nabo bebalapho.
47 UmPhrofethi Eliya bekatawuhlanyela etinhlitiyweni tebantfwana tetsembiso letentiwa kuboyise,
48 Lokubonisa ngaphambili umsebenti lomkhulu lokufanele wentiwe emathempelini eNkhosi ngeluhlelo lwekwengamela lekuphelela kwetikhatsi, kute kuhlengwe labafile, nekuboshelelwa kwebantfwana kubatali babo, funa umhlaba wonkhe ushaywe ngesicalekiso uphindze ubhujiswe ekubuyeni kwakhe.
49 Bonkhe laba nalabanye labaningi, ngisho nebaphrofethi labebahlala emkhatsini wemaNefi futsi bafakaza ngekubuya kweNdvodzana yaNkulunkulu, bebahlangene kulombutsano lomkhulu balindzele kukhululwa kwabo,
50 Ngoba labafile bebabuke kungabi khona sikhatsi lesidze kwemimoya yabo emitimbeni yabo njengebugcili.
51 Laba iNkhosi yabafundzisa, yaphindze yabanika emandla ekuvuka, emvakwekuvuka kwayo kulabafile, kutsi bangene embusweni weYise, kute lapho betfweswe umchele wekungabhubhi nekuphila lokuphakadze,
52 Futsi bachubeke emisebentini yabo kusuka ngaleso sikhatsi kuya phambili njengoba bebatsenjiswe yiNkhosi, babe bahlanganyeli kuto tonkhe tibusiso letatigcinelwe labo labamtsandzako.
53 UmPhrofethi Joseph Smith, nababe, Hyrum Smith, Brigham Young, John Taylor, Wilford Woodruff, naleminye imimoya lekhetsiwe leyayigcinelwe kutsi italwe sikhatsi sesifike ngalokuphelele kubamba lichaza ekubekweni kwetisekelo temsebenti lomkhulu wetikhatsi tekugcina,
54 Lokufaka ekhatsi kwakhiwa kwemathempeli nekwentiwa kwetimiso kuwo kute kuhlengwe labafile, nabo futsi bebaseveni lemimoya.
55 Ngabona kutsi bebasemkhatsini walabo labanebuntfu nalabakhulu lebebakhetsiwe ekucaleni kutsi babe babusi eBandleni laNkulunkulu.
56 Ngisho basengakatalwa, bona, nalabanye labaningi, batfola tifundvo tabo tekucala eveni lemimoya futsi balungiselelwa kutsi bete ngesikhatsi lesifanele seNkhosi kutawusebenta esivinini sayo kute kusindziswe imiphefumulo yebantfu.
57 Ngabona kutsi babonisi labetsembekile baloluhlelo lwekwengamela, uma bahamba emhlabeni, bayachubeka nemisebenti yabo yekushumayela livangeli lekuphendvuka nekuhlengwa, ngemnikelo weNdvodzana leTelwe Yodvwa yaNkulunkulu, emkhatsini walabo labasebumnyameni futsi labangaphansi kwebugcili besono eveni lelikhulu lemimoya yalabafile.
58 Labafile labaphendvukako batawuhlengwa, ngekutfobela timiso tendlu yaNkulunkulu,
59 Futsi emvakwekube sebakhiphe inhlawulo yetiphambeko tabo, baphindze bahlantwa babamsulwa, bayawutfola umvuzo ngekwemisebenti yabo, ngoba batindlalifa tensindziso.
60 Wembulwa kanjalo-ke umbono wekuhlengwa kwalabafile kimi, ngiyafakaza, futsi ngiyati kutsi lombhalo uliciniso, ngesibusiso seNkhosi neMsindzisi wetfu, Jesu Khristu, kunjalo nje. Amen.