1 Ngicinisile, naku lokushiwo yiNkhosi kini tinceku tami, ngalokuphatselene nemfanekiso wemabele nelukhula;

2 Bukani, ngicinisile ngitsi, insimi bekungumhlaba, futsi baphostoli bekubahlanyeli benhlanyelo;

3 Futsi emvakwekufa umhluphi lomkhulu welibandla, lihlubuka, ingwadla, ngisho iBhabhulona leyenta tive tonkhe tinatse esitjeni sakhe, etinhlitiyweni tabo sitsa, ngisho Sathane, uhleti kute abuse—bukani uhlanyela lukhula; ngaloko-ke, lukhula lucindzetela emabele futsi lufucela libandla ehlane.

4 Kodvwa bukani, emalangeni ekugcina, ngisho nanyalo lapho iNkhosi seyicala kuveta livi, nelicembe seliyahluma futsi lisetsambile—

5 Bukani, ngicinisile ngitsi kini, tingilosi tiyakhala eNkhosini busuku nemini, letilungele naletilindzele kutfunywa kuyawuvuna emasimini;

6 Kodvwa iNkhosi itsi kuto, ningalusiphuli lukhula licembe lisesetsambile (ngoba ngicinisile lukholo lwenu luseluncane), funa nibulale nemabele futsi.

7 Ngako-ke, yekelani emabele nelukhula kukhule ndzawonye site sivuno sivutfwe kahle; emvakwaloko niyawubutsa kucala emabele elukhuleni, emvakwekubutfwa kwemabele, bukani nibone, lukhula luboshwa tincumbi, nensimi seyisalelwe kushiswa.

8 Ngako-ke, naku lokushiwo yiNkhosi kini, ngani buphristi lobuchubeke ngentalelwane yabokhokho benu—

9 Ngoba nitindlalifa ngalokusemtsetfweni, ngekwenyama, futsi nifihliwe emhlabeni kanye naKhristu kuNkulunkulu—

10 Ngako-ke imphilo yenu nebuphristi buhlala bukhona, futsi kufanele buhlale bukhona ngani nangentalelwane yenu kute kube tikhatsi tekubuyiselwa kwako konkhe lokwakhulunywa ngemilomo yabo bonkhe baphrofethi labangcwele kusukela ekucaleni kwemhlaba.

11 Ngako-ke, nibusisiwe uma nichubeka ngebumnene bami, njengekukhanya kubeTive, futsi nangalobu buphristi, umsindzisi kubantfu bami Israyeli. INkhosi seyikukhulumile. Amen.