Sigaba 25
Sembulo lesaniketwa ngaJoseph Smith umPhrofethi, eHarmony, ePennssylvania, kuKholwane ngemnyaka we-1830. (buka sihloko sesigaba 24). Lesembulo siveta intsandvo yeNkhosi ku-Emma Smith, umfati wemPhrofethi.
1–6, Emma Smith, make lokhetsiwe, ubitelwa kusita nekudvudvuta umyeni wakhe; 7–11, Uphindze ubitelwa kubhala, kuchaza ngalokugcwele imibhalo lengcwele, nekukhetsa emaculo; 12–14, Liculo lalabalungile lingumthandazo eNkhosini; 15–16, Imigomo yekutfobela kulesembulo lesi isebenta kubo bonkhe bantfu.
1Â Lalela livi leNkhosi Nkulunkulu wakho, ngesikhatsi ngikhuluma nawe, Emma Smith, ndvodzakati yami; ngoba ngicinisile ngitsi kuwe, bonkhe labo labemukela livangeli lami bangemadvodzana nemadvodzakati embusweni wami.
2Â Sembulo ngikunika sona mayelana nentsandvo yami; futsi uma wetsembekile uphindze uhamba etindleleni tebucotfo phambi kwami, ngitawulondvolota imphilo yakho, uyawutfola lifa eSiyoni.
3Â Buka, tono takho ticolelwe, futsi ungumake lokhetsiwe, lengimbitile.
4Â Ungavungami ngenca yetintfo longakatiboni, ngoba tisegodliwe kuwe nasemhlabeni, lokukuhlakanipha kimi ngesikhatsi lesitako.
5Â Futsi umsebenti welubito lwakho kuyawuba kudvudvuta inceku yami, Joseph Smith, lomNcane, umyeni wakho, etinhluphekweni takhe, ngemavi endvudvuto, ngemoya webumnene.
6Â Futsi uyawuhamba naye ngesikhatsi sekuhamba kwakhe, ube ngumbhali wakhe, uma kute lotawumbhalela, kute ngitfumele inceku yami, Oliver Cowdery, noma ngukuphi lapho ngitawumtfumela khona.
7Â Futsi uyawubekwa ngaphansi kwesandla sakhe kute uchaze ngalokugcwele imibhalo lengcwele, nekukhutsata libandla, njengobe uyawukwembulelwa nguMoya wami.
8Â Ngoba uyawubeka tandla takhe etikwakho, uphiwe Moya loNgcwele, nesikhatsi sakho uyawusinikela ekubhaleni, nasekufundzeni lokunyenti.
9Â Futsi akudzingeki wesabe, ngoba umyeni wakho uyawukwesekela ebandleni; ngoba lubito lwakhe kusita bona, kute tonkhe tintfo tembulwe kubo, noma yini lengiyifisako, ngekwelukholo lwabo.
10Â Futsi ngicinisile ngitsi kuwe uyawubeka eceleni tintfo talomhlaba, ufune tintfo temhlaba loncono.
11Â Futsi uyawuphindze uniketwe umsebenti, wekukhetsa emaculo langcwele, njengobe uyawukwembulelwa, loko lokutsandzekako kimi, kute agcinwe ebandleni lami.
12Â Ngoba umphefumulo wami uyajabula ngeliculo lenhlitiyo; yebo, liculo lalabalungile lingumthandazo kimi, futsi liyawugcwaliswa ngesibusiso etikwabo.
13Â Ngaloko-ke, jabula enhlitiyweni yakho utfokote, ubambelele etivumelwaneni lowutentile.
14Â Chubeka ube nemoya webumnene, ucaphele kutikhukhumeta. Vumela umphefumulo wakho ujabule ngemyeni wakho, neludvumo loluyawukuta kuye.
15Â Gcina imiyaleto yami njalo, futsi umchele wekulunga uyawutfola. Ngaphandle kwekutsi ukwente loku, lapho ngikhona angeke ute.
16Â Futsi ngicinisile ngicinisile, ngitsi kuwe, leli livi lami kubo bonkhe. Amen.