1 Livi neNtsandvo yeNkhosi ngalokuphatselene neNkambu yaka-Israyeli eluhambeni lwabo loluya enshonalanga:

2 Bonkhe bantfu beliBandla laJesu Khristu lalabaNgcwele beTinsuku Tekugcina, nalabo labahamba nabo, abahlelwe ngemacembu, ngesivumelwano nangesetsembiso sekugcina yonkhe imiyaleto nemitsetfo yeNkhosi Nkulunkulu wetfu.

3 Lamacembu akahlelwe ngetindvuna talabangemakhulu, tindvuna talabangemashumi lasihlanu, netindvuna talabangemashumi, kube khona nemengameli nebeluleki bakhe lababili labatawuhola lawo macembu, ngaphansi kwekucondziswa baPhostoli labaliShumi nakuBili.

4 Futsi lesi kuyawuba sivumelwano setfu—kutsi siyawuhamba ngekwetimiso tonkhe teNkhosi.

5 Licembu ngalinye alitilungiselele ngato tonkhe tilwane letitawudvonsa, tincola, imiphako, tembatfo, naletinye tidzingo teluhambo, labangakwati kutitfola.

6 Uma emacembu sekahleliwe akahambe ngemandla awo, kulungiselela labo labatawusala.

7 Licembu ngalinye, netindvuna nabomengameli bawo, abancume kutsi bangaki labatawuhamba ngentfwasahlobo lelandzelako; emvakwaloko bakhetse sibalo lesanele semadvodza lanemandla nalanelwati, latawutsatsa tilwane letidvonsako, tinhlanyelo, netintfo tekulima, bahambe njengemahlahlandlela kulungiselela kuyawuhlanyela tilimo tasentfwasahlobo.

8 Licembu ngalinye alibe nesibalo lesilinganako, ngekwesabelo semphahla yalo, kutsatsa labamphofu, bafelokati, labangenababe, nemindeni yalabo labaye ebutfweni, kute kukhala kwebafelokati nalabangenabobabe kungakhuphukeli etindlebeni teNkhosi ngekumelana nalaba bantfu.

9 Licembu ngalinye alilungise tindlu, nemasimi ekuhlanyela lokuyinhlavu, bakwentele labo labatawusala ngemuva kulesikhatsi; futsi loku kuyintsandvo yeNkhosi mayelana nebantfu bayo.

10 Wonkhe umuntfu akasebentise onkhe emandla akhe nemphahla kususa labantfu baye endzaweni lapho iNkhosi iyawukhomba khona sikhonkhwane seSiyoni.

11 Futsi uma nikwenta loku ngenhlitiyo lehlantekile, ngako konkhe kwetsembeka, niyawubusiswa; niyawubusiswa emihlambini yenu yetimvu, nasemihlambini yenu yetinkhomo, nasemasimini enu, nasetindlini tenu, nasemindenini yenu.

12 Tinceku tami Ezra T. Benson na-Erastus Snow abahlele licembu.

13 Netinceku tami Orson Pratt naWilford Woodruff abahlele licembu.

14 Kanjalo, netinceku tami Amasa Lyman naGeorge A. Smith abahlele licembu.

15 Babeke bomengameli, netindvuna talabangemakhulu, talabangemashumi lasihlanu, nalabangemashumi.

16 Bese tinceku tami letikhetsiwe tihambe tiyawufundzisa loku, lokuyintsandvo yami, kulabangcwele, kute balungiselele kuhamba baye eveni lekuthula.

17 Hambani nente njengobe nginitjelile, ningatesabi titsa tenu; ngoba angeke tibe nemandla ekumisa umsebenti wami.

18 ISiyoni iyawuhlengwa ngesikhatsi sami lesifanele.

19 Futsi uma kukhona umuntfu loyawufuna kutiphakamisa, angasifuni seluleko sami, angeke abe nemandla, futsi bulima bakhe buyawubonakaliswa.

20 Yifuneni iNkhosi; nigcine tonkhe tetsembiso tenu lomunye kulomunye; ningakufisi loko lokukwemnakenu.

21 Tisuseni ebubini bekuphatsa libito leNkhosi ngelite, ngoba ngiyiNkhosi Nkulunkulu wenu, ngisho Nkulunkulu wabokhokho benu, Nkulunkulu wabo-Abrahama, na-Isaka, naJakobe.

22 Nginguye lowahola bantfwana baka-Israyeli baphuma eveni laseGibhithe; futsi umkhono wami weluliwe emalangeni ekugcina, kusindzisa bantfu bami Israyeli.

23 Yekelani kuphikisana lomunye nalomunye; yekelani kukhuluma lokubi lomunye ngalomunye.

24 Yekelani kudzakwa; emavi enu akakhe lomunye kulomunye.

25 Uma uboleka lokungekwamakhelwane wakho, kufanele ukubuyisele loko lowukubolekile; uma ungakhoni kukubuyisela yani kuye masinyane umtjele makhelwane wakho, funa akulahle ngelicala.

26 Uma utfola loko lokulahlekele makhelwane wakho, mfune ngekukhutsala ute ukubuyisele kuye futsi.

27 Khutsala ekugcineni loko lonako, kute ube ngumphatsi lohlakaniphile; ngoba kusipho samahhala seNkhosi Nkulunkulu wakho, futsi wena ungumphatsi wakhe.

28 Uma ujabulile, dvumisa iNkhosi ngekuhlabela, ngemculo, ngekugidza, nangemthandazo wekudvumisa nekubonga.

29 Uma udzabukile, bita iNkhosi Nkulunkulu wakho ngemthandazo, kute imiphefumulo yenu ijabule.

30 Ningatesabi titsa tenu, ngoba tisetandleni tami futsi ngitawukwenta intsandvo yami ngato.

31 Bantfu bami kufanele bavivinywe etintfweni tonkhe, kute balungele kwemukela inkhatimulo lengibabekele yona, ngisho inkhatimulo yeSiyoni; futsi loyo longeke akubeketelele kujeziswa akawufaneli umbuso wami.

32 Loyo longati akafundze kuhlakanipha ngekutitfoba nangekubita libito leNkhosi Nkulunkulu wakhe, kute emehlo akhe avuleke kute abone, netindlebe takhe tivuleke kute eve;

33 Ngoba Moya wami utfunyelwe emhlabeni kukhanyisela labatitfobile nalabadzabukile, nekubalahla ngelicala labangamesabi Nkulunkulu.

34 Bomnakenu abakanemukeli nebufakazi benu, ngisho nesive sinicoshile;

35 Manje kuta lilanga lesehlakalo, ngisho emalanga elusizi, njengewesifazane lobelekako; futsi lusizi lwabo luyawuba lukhulu ngaphandle uma baphendvuka ngekushesha, yebo, ngekushesha lokukhulu.

36 Ngoba babulala baphrofethi, nalabo bebatfunywe kubo; futsi bacitse ingati lengenacala, lekhalako phansi emhlabatsini ngekumelana nabo.

37 Ngako-ke, ningamangali ngaleti tintfo, ngoba nisengakabi ngulabahlantekile; angeke nikwati kumelana nenkhatimulo yami; kodvwa niyawuyibona uma netsembekile ekugcineni onkhe emavi ami lengininikete wona, kusuka emalangeni a-Adamu kuya ku-Abrahama, kusuka ku-Abrahama kuya kuMosi, kusuka kuMosi kuya kuJesu nebaphostoli bakhe, nekusuka kuJesu nebaphostoli bakhe kuya kuJoseph Smith, lengimbite ngetingilosi tami, tinceku tami letifundzisako, nangelivi lami lucobo lelisuka ezulwini, kutsi aletse umsebenti wami;

38 Sisekelo leso lasibeka, futsi watsembeka; ngase ngiyamtsatsa ngimletsa kimi.

39 Labanyenti bamangele ngekufa kwakhe; kodvwa bekudzingekile kutsi acinisekise bufakazi bakhe ngengati yakhe, kute advunyiswe bese lababi balahlwa ngelicala.

40 Anginisindzisanga yini etitseni tenu, ngendlela yekutsi ngishiye bufakazi belibito lami na?

41 Ngako-ke, manje, lalelani, O nine bantfu belibandla lami; nani babonisi lalelani kanyekanye; niwutfolile umbuso wami.

42 Khutsalani ekugcineni imiyaleto yami yonkhe, funa kwehlulela kwami kwehlele etikwenu, nekukholwa kwenu kwehluleke, netitsa tenu tijabule ngani. Ngako-ke, angembuli lutfo lolunye kwamanje. Amen futsi Amen.