Sigaba 132
Sembulo lesaniketwa ngaJoseph Smith umPhrofethi, eNauvoo, e-Illinois, lesabhalwa mhlaka 12 Kholwane 1843, lesiphatselene nesivumelwano lesisha nesaphakadze, kanye nekuba phakadze kwesivumelwano semshado, kanjalo nemgomo wemshado wesitsembu. Nanome lesembulo sabhalwa nga 1843, bufakazi bukhombisa kutsi leminye imigomo lekhona kulesi sembulo beyatiwa ngumPhrofethi kusukela ngemnyaka wa 1831. Buka Timemetelo lesiseMtsetfweni 1.
1–6, Kuphakanyiswa kuzuzwa ngesivumelwano lesisha nesaphakadze; 7–14, Imigomo nemibandzela yaleso sivumelwano iyachazwa; 15–20, Umshado wesilestiyali nekuchubeka kwemndeni kuvumela bantfu kutsi bakwati kuba bonkulunkulu; 21–25, Indlela lencane nalengumtjuntju iholela ekuphileni lokuphakadze; 26–27, Umtsetfo uyaniketwa lophatselene nekuhlambalata Moya loNgcwele; 28–39, Tetsembiso tekwandza nekuphakanyiswa kwaphakadze tentiwa kubaphrofethi nakulabaNgcwele kuto tonkhe tikhatsi temhlaba; 40–47, Joseph Smith uniketwa emandla ekubopha nekuhlanganisa emhlabeni nasezulwini; 48–50, INkhosi icinisekisa kuye kuphakanyiswa kwakhe; 51–57, Emma Smith uyaletwa kutsi atsembeke aphindze abe neliciniso; 58–66, Imitsetfo lelawula umshado wesitsembu iyachazwa.
1 Ngicinisile, naku lokushiwo yiNkhosi kuwe nceku yami Joseph, kutsi nangabe ubutile esandleni sami kwati nekucondza kutsi mine, iNkhosi, ngatitsetselela kanjani tinceku tami Abrahama, Isaka, naJakobe, kanjalo naMosi, naDavide, naSolomoni, tinceku tami, ngalokuphatselene nemgomo nemfundziso yekuba nesitsembu netingani—
2 Buka, ubone, ngiyiNkhosi Nkulunkulu wakho, futsi ngitawukuphendvula ngalokuphatselene naloludzaba.
3 Ngako-ke, lungisa inhlitiyo yakho kute utfole uphindze utfobele imiyaleto lengitawukunika yona; ngoba bonkhe labo labambulelwe lomtsetfo kufanele bawutfobele.
4 Ngoba buka, ngembula kini sivumelwano lesisha nesaphakadze; futsi uma ningasigcini leso sivumelwano, nitawulahlwa; ngoba kute longalahla lesi sivumelwano bese uvunyelwa kungena ebukhosini bami.
5 Ngoba bonkhe labafuna kutfola sibusiso etandleni tami bayawugcina umtsetfo lowamiselwa leso sibusiso, nemibandzela wawo, njengoba kwasungulwa kusukela umhlaba ungakasekelwa.
6 Ngalokuphatselene nesivumelwano lesisha nesaphakadze, samiselwa kuphelela konkhe kwenkhatimulo yami; futsi loyo lotfola konkhe kuphelela kwayo kufanele awugcine lomtsetfo, noma uyawulahlwa, kusho iNkhosi Nkulunkulu.
7 Futsi ngicinisile ngitsi kini, imibandzela yalomtsetfo ngulena: Tonkhe tivumelwano, kuvumelana, kubopha, tibopho, tifungo, tetsembiso, kwenta, kuhlanganiswa, kuhlangana, noma lokulindzelwe, lokungentiwanga futsi kwangeniswa kwaphindze kwaboshwa nguMoya loNgcwele wesetsembiso, nguloyo logcotjiwe, manje naphakadze, futsi loko lokungcwele kakhulu, ngesembulo nangemyaleto waloyo logcotjiwe wami, lengimbekile emhlabeni kutsi abe nalamandla ( futsi ngibeke inceku yami Joseph kutsi abe nalamandla ngemalanga ekugcina, futsi akukate kube khona ngaphandle kwamunye emhlabeni ngesikhatsi lokuniketwe kuye lamandla netikhiya talobu buphristi), akusebenti noma akunamandla ngesikhatsi sekuvuka kwalabafile noma ngemuva kwako; ngoba tonkhe tivumelwano letingakentelwa lenhloso tiyaphela uma bantfu sebafile.
8 Bukani, indlu yami yindlu lehlelekile, kusho iNkhosi Nkulunkulu, futsi akusiyo indlu yesiphitsiphitsi.
9 Ngingawemukela yini umnikelo, kusho iNkhosi, longakentiwa egameni lami na?
10 Noma ngingakwemukela yini etandleni tenu loko lengingakakumisi na?
11 Futsi nginganimisela yini, kusho iNkhosi, ngaphandle kwekutsi kube ngekwemtsetfo, ngisho njengoba Mine naBabe sawubeka, umhlaba usengakadalwa na?
12 NgiyiNkhosi Nkulunkulu wenu; futsi ngininika lomlayeto—kutsi kute umuntfu loyawukuta kuBabe ngaphandle kwami noma ngelivi lami, lelingumtsetfo wami, kusho iNkhosi.
13 Futsi konkhe lokusemhlabeni, noma ngabe kumiswe bantfu, yimibuso, noma babusi, noma ngemandla, noma tintfo letatiwako, noma ngabe kuyini, lokungakamiswa ngimi noma livi lami, kusho iNkhosi, kuyawulahlwa phansi, futsi angeke kuchubeke nekuba khona emvakwekufa kwebantfu, noma ngesikhatsi sekuvuka noma ngemuva kwako, kusho iNkhosi Nkulunkulu wenu.
14 Ngoba konkhe lokuchubeka nekuba khona kumiswe ngimi; futsi konkhe lokungakamiswa ngimi kuyawuphazamiseka futsi kubhujiswe.
15 Ngako-ke, uma indvodza itsatsa umfati emhlabeni, futsi ingamtsatsi ngalokumiswe ngimi noma ngelivi lami, futsi ivumelana naye isesemhlabeni futsi naye enta sivumelwano naye, sivumelwano sabo nemshado wabo awukavumeleki uma sebafile, noma sebangasekho emhlabeni; ngako-ke, kute umtsetfo lobahlanganisile uma bangasekho emhlabeni.
16 Ngako-ke, uma bangasekho emhlabeni abashadi futsi abendziswa; kodvwa bakhetfwa njengetingilosi ezulwini, tingilosi leto letitinceku letisitako, kusita labo labafanelwe ngulengenawulinganiswa, neyaphakadze inkhatimulo.
17 Ngoba leti tingilosi atiwugcinanga umtsetfo wami; ngako-ke, angeke tandziselwe situkulwane, kodvwa tihlala ngekuhlukana futsi ngatinye, tingaphakanyisiwe, etimeni tato tekusindziswa, kute kube phakadze; futsi kusukela ngaleso sikhatsi atibi bonkulunkulu, kodvwa tiba tingilosi taNkulunkulu phakadze naphakadze.
18 Ngetulu kwaloko, ngicinisile ngitsi kini, uma indvodza itsatsa umfati, yenta sivumelwano naye samanje naphakadze, uma leso sivumelwano singentiwa ngalokumiswe ngimi noma ngelivi lami, lokungumtsetfo wami, futsi singamiswanga nguMoya loNgcwele wesetsembiso, ngaloyo lengimgcobile ngaphindze ngamnika lamandla, leso sivumelwano asikavumeleki futsi asinamandla lahlanganisako uma sebangasekho emhlabeni, ngoba abakahlanganiswa ngimi, kusho iNkhosi, noma livi lami; uma sebangasekho emhlabeni angeke semukelwe lapho, ngoba tingilosi nabonkulunkulu babekiwe lapho, labangeke bakhone kwendlula kubo; ngako-ke angeke bakwati kuyitfola njengelifa inkhatimulo yami; ngoba indlu yami yindlu lehlelekile, kusho iNkhosi Nkulunkulu.
19 Ngetulu kwaloko, ngicinisile ngitsi kini, uma indvodza itsatsa umfati ngelivi lami, lelingumtsetfo wami, nangesivumelwano lesisha nesaphakadze, futsi kumiswe kubo nguMoya loNgcwele wesetsembiso, nguloyo logcotjiwe, lengibeke kuye lamandla netikhiya talobu buphristi; futsi kuyawutsiwa kubo—Niyawuphuma ngekuvuka kwekucala; futsi uma kungemuva kwekuvuka kwekucala, ekuvukeni lokulandzelako; futsi niyawutfola njengelifa tihlalo tebukhosi, imibuso, babusi, nemandla, kubusa, konkhe kuphakama nekujula—emvakwaloko kuyawubhalwa eNcwadzini yeKuphila yeliWundlu, kutsi ayiyikucitsa ingati lengenacala ngekubulala, futsi uma nihlala kuso sivumelwano sami, ningayicitsi ingati lengenacala ngekubulala, kuyawukwentiwa kubo konkhe inceku yami lekubeke etikwabo, manje nakulo lonkhe liphakadze; futsi kuyawuba nemandla lahlanganisako uma sebangekho emhlabeni; futsi bayawendlula phambi kwetingilosi, nabonkulunkulu, lababekwe lapho, baye ekuphakanyisweni nasebukhosini babo kuto tonkhe tintfo, njengoba bekubekiwe etinhloko tabo, lobo bukhosi lobuyawuba kuphelela nekuchubeka kwentalelwane phakadze naphakadze.
20 Ngaleso sikhatsi bayawuba bonkulunkulu, ngoba abasenasiphetfo; ngako-ke bayawuphila phakadze naphakadze, ngoba bayachubeka; ngaleso sikhatsi bayawuba ngetulu kwako konkhe, ngoba tonkhe tintfo tilawulwa ngibo. Ngaleso sikhatsi bayawuba bonkulunkulu, ngoba banawo onkhe emandla, futsi netingilosi tilawulwa ngibo.
21 Ngicinisile, ngicinisile, ngitsi kini, ngaphandle kwekutsi nigcine umtsetfo wami angeke nifinyelele kulobu bukhosi.
22 Ngoba lincane lisango, nendlela ingumtjuntju leholela ekuphakanyisweni nasekuchubekeni kwetimphilo; futsi bambalwa labayitfolako, ngoba aningemukeli emhlabeni futsi aningati.
23 Kodvwa uma ningemukela emhlabeni, uma kunjalo niyawungati, futsi niyawutfola kuphakanyiswa kwenu; kute lapho ngikhona nani nibekhona futsi.
24 Kuphila lokuphakadze nguloku—kwati Nkulunkulu longuye yedvwa lohlakaniphile neweliciniso, naJesu Khristu, lamtfumile. Nginguye. Ngako-ke wemukeleni, umtsetfo wami.
25 Libanti lisango, nendlela ibanti leya ekufeni; futsi baningi labangena ngalo, ngoba abangemukeli, futsi abawugcini umtsetfo wami.
26 Ngicinisile, ngicinisile, ngitsi kini, uma indvodza itsatsa umfati ngekwelivi lami, futsi bahlanganiswa nguMoya loNgcwele wesetsembiso, ngekwesimiso sami, futsi uma yona noma yena ayawukwenta noma ngusiphi sono noma siphambeko sesivumelwano lesisha nesaphakadze sanoma nguluphi luhlobo, nato tonkhe tinhlobo tekuhlambalata, futsi bangayicitsi ingati lengenacala ngekubulala, noko bayawuphuma ekuvukeni kwekucala, bangene ekuphakanyisweni kwabo; kodvwa bayawubhujiswa enyameni, banikelwe ekuhlushweni nguSathane kute kube lilanga lekuhlengwa, kusho iNkhosi Nkulunkulu.
27 Kuhlambalata Moya loNgcwele, lokungeke kwatsetselelwa kulomhlaba noma kulotako, kwentiwa kutsi nichitse ingati lengenacala ngekubulala, futsi nivumelana ngekubulawa kwami, emvakwekube senemukele sivumelwano sami lesisha nesaphakadze, kusho iNkhosi Nkulunkulu; futsi loyo longawugcini lomtsetfo akayuze angene enkhatimulweni yami, kodvwa uyawulahlwa, kusho iNkhosi.
28 NgiyiNkhosi Nkulunkulu wakho, futsi ngitawukunika umtsetfo webuPhristi lobuNgcwele bami, njengoba wabekwa ngimi naBabe umhlaba usengakadalwa.
29 Abrahama wemukela tonkhe tintfo, noma yini layemukela, ngesembulo nangemyaleto, ngelivi lami, kusho iNkhosi, futsi sewungenile ekuphakanyisweni kwakhe uhleti esihlalweni sakhe sebukhosi.
30 Abrahama wemukela tetsembiso ngalokuphatselene nentalelwane yakhe, nangalokuphatselene nesitukulwane sakhe—wena lowusitukulwane sakhe, wena nceku yami Joseph—lebekufanele sichubeke uma nje sisesemhlabeni; futsi ngalokuphatselene na-Abrahama nentalelwane yakhe, kufanele ichubeke emhlabeni lotako; kufanele ichubeke njengetinkhanyeti letingabaleki kulomhlaba nakulolotako; noma, uma beningetama kusibala sihlabatsi elugwini lwelwandle beningeke nakwati kuyibala.
31 Lesi setsembiso senu nani, ngoba nibesitukulwane sa-Abrahama, futsi lesetsembiso sentiwa ku-Abrahama; futsi ngalomtsetfo imisebenti yaBabe iyachubeka, latikhatimulise ngayo.
32 Ngako-ke, hambani, nente imisebenti ya-Abrahama; yemukelani umtsetfo wami niyawusindziswa.
33 Kodvwa uma ningawemukeli umtsetfo wami angeke nisitfole setsembiso saBabe, lasenta ku-Abrahama.
34 Nkulunkulu wamyaleta Abrahama, futsi Sara waniketa Abrahama Hagari kutsi abe ngumkakhe. Wakwentelani loko na? Ngoba loku kwakungumtsetfo; futsi kuHagari kwavela bantfu labaningi. Ngako-ke, loku, kwakugcwalisa, tetsembiso, emkhatsini waletinye tintfo.
35 Ngako-ke, ngabe Abrahama bekabekwe licala na? Ngicinisile ngitsi kini, Cha; ngoba mine, iNkhosi, ngangikuyaletile loko.
36 Abrahama wayaletwa kutsi anikele ngendvodzana yakhe Isaka; noko, bekubhaliwe kutsi: Ungabulali. Kodvwa, Abrahama, akalanga, futsi kwatsatfwa njengekulunga kwakhe.
37 Abrahama waniketwa tingani, tamtalela bantfwana; futsi kwatsatfwa njengekulunga kwakhe, ngoba waniketwa tona, wagcina umtsetfo wami; kanjalo na-Isaka naJakobe abentanga lutfo lolunye ngaphandle kwaloko labebayaletwe ngako; futsi ngoba abentanga lutfo lolunye ngaphandle kwaloko labebayaletwe ngako, sebangenile ekuphakanyisweni kwabo, ngekwetitsembiso, futsi bahleli etihlalweni tebukhosi, abasito tingilosi kodvwa babonkulunkulu.
38 NaDavide waniketwa bafati labaningi netingani, kanjalo naSolomoni naMosi tinceku tami, kanjalo njengalabaningi betinceku tami, kusukela ekucaleni kwendalo kute kube ngulesi sikhatsi; futsi abonanga ngalutfo ngaphandle kwaleto tintfo labangatinikwanga ngimi.
39 Bafati netingani taDavide waniketwa tona ngimi, ngesandla saNathani, inceku yami, nalabanye bebaphrofethi labebanetikhiya talamandla; futsi akonanga lutfo kimi ngalokuphatselene naleti tintfo ngaphandle kwendzaba ya-Uriya nemkakhe; ngako-ke sewuwile ekuphakanyisweni kwakhe, watfola nesabelo sakhe; futsi angeke asabatfola eveni lelitako, ngoba sengibanikete lomunye, kusho iNkhosi.
40 NgiyiNkhosi Nkulunkulu wakho, futsi ngakunika, nceku yami Joseph, sikhundla, futsi ngibuyisela tonkhe tintfo. Cela loko lokufisako, uyawuniketwa kona ngekwelivi lami.
41 Futsi njengoba ubutile ngalokuphatselene nekuphinga, ngicinisile, ngicinisile, ngitsi kuwe, uma indvodza itfola umfati ngesivumelwano lesisha nesaphakadze, uma aba nalenye indvodza, ngibe ngingamniketanga leyondvodza ngekugcotjwa lokungcwele, sewuphingile futsi utawubhujiswa.
42 Uma angekho esivumelwaneni lesisha nesaphakadze, futsi abe nalenye indvodza, sewuphingile.
43 Uma umyeni wakhe aba nalomunye wesifazane, abe abengaphansi kwesifungo, usephulile sifungo sakhe futsi sewuphingile.
44 Futsi uma angakaphingi, kodvwa angenacala futsi angakasephuli sifungo sakhe, akwati loko, ngakwembula kuwe loku, nceku yami Joseph, uma kunjalo uyawuba nemandla, ngemandla ebuPhristi bami lobuNgcwele, ekumtsatsa lowesifazane umnike wesilisa longakate aphinge kodvwa lobekatsembekile; ngoba uyawukwentiwa umbusi etikwalabaningi.
45 Ngoba nginikete kuwe tikhiya nemandla ebuphristi, ngako lengibuyisela tonkhe tintfo, futsi ngembule kuwe tonkhe tintfo ngesikhatsi lesifanele.
46 Futsi ngicinisile, ngicinisile, ngitsi kuwe, noma yini loyihlanganisako emhlabeni iyawuhlanganiswa nasezulwini; futsi noma ngabe yini loyibophako emhlabeni, egameni lami nangelivi lami, kusho iNkhosi, iyawuboshwa ingunaphakadze emazulwini; futsi nome ngubani lowutisusako tono takhe emhlabeni tiyawususwa ingunaphakadze emazulwini; kantsi futsi nome ngubani lotigcinako tono takhe emhlabeni tiyawugcinwa nasezulwini.
47 Ngetulu kwaloko, ngicinisile ngitsi, nome ngubani lombusisako ngitawumbusisa, kantsi nome ngubani lomcalekisako ngitawumcalekisa, kusho iNkhosi; ngoba mine, iNkhosi, nginguNkulunkulu wakho.
48 Ngetulu kwaloko, ngicinisile ngitsi kuwe, nceku yami Joseph, nome yini loyiphako emhlabeni, kunome ngubani lomnikelako emshadweni emhlabeni, ngelivi lami nangemtsetfo wami, uyawehlelwa tibusiso hhayi ticalekiso, nangemandla ami, kusho iNkhosi, futsi angeke abekwe licala emhlabeni nasezulwini.
49 Ngoba ngiyiNKhosi Nkulunkulu wakho, futsi ngitawuba nawe kute kube sekupheleni kwemhlaba, nakulo lonkhe liphakadze, ngoba ngicinisile sengibeka etikwakho kuphakanyiswa kwakho, ngikulungisela sihlalo sebukhosi embusweni waBabe, edvute na-Abrahama uyihlo.
50 Buka, ngikubonile kutinikela kwakho, futsi ngitawutsetselela tonkhe tono takho; ngikubonile kutinikela kwakho ekulaleleni loko lengikutjele kona. Ngako-ke hamba, ngitakulungisela indlela yekuphepha, njengoba ngawemukela umnikelo wa-Abrahama wendvodzana yakhe Isaka.
51 Ngicinisile, ngitsi kuwe: Nginika umyaleto kuyo incekukati yami, Emma Smith, umkakho, lengikunike yena, kutsi atitsibe angakwemukeli loko lengikuyale kutsi umnike kona; ngoba ngakwenta loko, kusho iNkhosi, kunivivinya nonkhe, njengoba ngenta ku-Abrahama, kute ngifune umnikelo lophuma etandleni tenu, ngesivumelwano nangemhlatjelo.
52 Futsi incekukati yami, Emma Smith ayemukele bonkhe labo labanikwe inceku yami Joseph, labamsulwa nalabahlantekile ngekwelicansi phambi kwami; futsi labo labangasiko msulwa, kodvwa batse bamsulwa, bayawubhujiswa, kusho iNkhosi Nkulunkulu.
53 Ngoba ngiyiNkhosi Nkulunkulu wenu, futsi kufanele nilitfobele livi lami; ngininika nenceku yami Joseph kutsi uyawukwentiwa umbusi etikwetintfo tonkhe letiningi; ngoba wetsembekile etintfweni letimbalwa, futsi kusukela nyalo kuya phambili ngitawumcinisa.
54 Futsi ngiyaleta incekukati yami, Emma Smith, kutsi ahlale anamatsele encekwini yami Joseph, hhayi kulomunye. Kodvwa uma angeke awulalele lomyaleto uyawubhujiswa, kusho iNkhosi; ngoba ngiyiNkhosi Nkulunkulu wakho, futsi ngitawumbhubhisa uma angawulaleli umtsetfo wami.
55 Kodvwa uma angeke awulalele lomlayeto, uma kunjalo inceku yami Joseph kufanele imentele tonkhe tintfo, ngisho njengoba ishito; futsi ngitawumbusisa ngiphindze ngimandzisele futsi ngimuphe ngalokuphindvwe kalikhulu kulomhlaba, boyise, nabomake, nabomnakabo, nabodzadzewabo, imiti nemihlaba, bafati nebantfwana nemichele yekuphila lokuphakadze emaveni laphakadze.
56 Ngetulu kwaloko, ngicinisile ngitsi, incekukati yami ayitsetselele inceku yami Joseph Smith tiphambeko tayo, uma kunjalo naye uyawutsetselelwa tiphambeko takhe, laphambuke ngato kimi; futsi mine, iNkhosi Nkulunkulu wakho, ngitawumbusisa, ngimandzisele, futsi ngente inhlitiyo yakhe ijabule.
57 Ngetulu kwaloko, ngitsi, inceku yami Joseph akangayitsengisi imphahla yakhe, funa sitsa site simbhubhise; ngoba Sathane ufuna kubhubhisa; ngoba ngiyiNkhosi Nkulunkulu wakho, yena uyinceku yami; futsi buka, ubone, nginaye, njengoba ngangina-Abrahama, uyihlo, ngisho nasekuphakanyisweni nasenkhatimulweni yakhe.
58 Manje, ngalokuphatselene nemtsetfo webuphristi, tiningi tintfo leticondzene nawo.
59 Ngicinisile, uma umuntfu abitwa nguBabe, njenga-Aroni, ngeliphimbo lami lucobo, nangeliphimbo laloyo longitfumile, lengimuphe tikhiya temandla alobu buphristi, uma enta nome ngabe yini egameni lami, nangekwemtsetfo wami nangekwelivi lami, angeke one, futsi ngiyawutsi akanacala.
60 Ngako-ke, akubete umuntfu, logceka inceku yami Joseph; ngoba ngiyawutsi akanacala; ngoba uyawukwenta lokutinikela lengikudzingako etandleni takhe ngetiphambeko takhe, kusho iNkhosi Nkulunkulu wenu.
61 Ngetulu kwaloko, ngalokuphatselene nemtsetfo webuphristi—uma kukhona indvodza letsatsa intfombi lemsulwa, futsi lefisa kutsatsa lenye, yekucala iyivumele, uma itsatsa wesibili, futsi batintfombi letimsulwa, bangakavumelani nalenye indvodza, uma kunjalo ayinacala; ayiphingi ngoba baniketwe yona; ngoba ayiphingi ngaloko lokungekwayo lokungesiko kwalomunye.
62 Futsi uma inetintfombi letimsulwa letilishumi letiniketwe yona ngalomtsetfo, ayiphingi, ngoba tayo, tiniketwe yona; ngako-ke ayinacala.
63 Kodvwa uma yinye noma lenye kuletintfombi letilishumi, emvakwekwendza, iyawuba nalenye indvodza, seyiphingile, futsi iyawubhujiswa; ngoba tiniketwe yona kutsi tandzise tigcwalise umhlaba, ngekwemyaleto wami, nekufeza setsembiso lesaniketwa nguBabe umhlaba ungakasekelwa, kute baphakanyiswe emhlabeni lotako, kute batale imimoya yebantfu; ngoba kuloku umsebenti waBabe uyachubeka kute akhatimuliswe.
64 Ngetulu kwaloko, ngicinisile, ngicinisile, ngitsi kini, uma kukhona indvodza lenemfati lephetse tikhiya talamandla, futsi lemfundzisa umtsetfo webuphristi bami, ngalokuphatselene naleti tintfo, uma kunjalo lowesifazane kufanele akholelwe kuye aphindze amsekele, noma uyawubhujiswa, kusho iNkhosi Nkulunkulu wakho; ngoba ngiyawumbhubhisa; ngoba ngitawulidvumisa libito lami kubo bonkhe labemukela baphindze balalele umtsetfo wami.
65 Ngako-ke, kuyawuba semtsetfweni kimi, uma lowesifazane angawemukeli lomtsetfo, kutsi wesilisa atfole tonkhe tintfo mine, iNkhosi Nkulunkulu wakhe, lengiyawumnika tona, ngoba lowesifazane akatange akholelwe futsi amsekele lowesilisa ngekwelivi lami; uma kunjalo lowesifazane uba soni; bese lowesilisa uyakhululwa emtsetfweni waSara, lowasekela Abrahama ngekwemtsetfo ngesikhatsi ngiyaleta Abrahama kutsi atsatse Hagari kutsi abe ngumkakhe.
66 Manje, ngalokuphatselene nalomtsetfo, ngicinisile, ngicinisile, ngitsi kuwe, ngitawukwembulela lokunye, emvakwaloku; ngako-ke, akukwenetise loku kwamanje. Buka, ngingu-Alfa na-Omega. Amen.