Sigaba 97
Sembulo lesaniketwa ngaJoseph Smith umPhrofethi, eKirtland, e-Ohio, mhlaka 2 iNgci, 1833. Lesi sembulo siphatselene ikakhulukati netindzaba talabaNgcwele eSiyoni, eSifundzeni iJackson, eMissouri, kuphendvula kubuta kwemPhrofethi eNkhosini kute atfole lwati. Emalunga eliBandla eMissouri ngalesi sikhatsi abekangephansi kwekuhlushwa lokukhulu futsi, mhlaka 23 Kholwane, 1833, aphocelelwa kusayina sivumelwano sekushiya Sifundza iJackson.
1–2, Labaningi balabaNgcwele eSiyoni (eSifundzeni iJackson, eMissouri) babusisiwe ngekutsembeka kwabo; 3–5, Parley P. Pratt uyanconywa ngemsebenti wakhe esikolweni eSiyoni; 6–9, Labo labagcina tivumelwano tabo bemukelwa yiNkhosi; 10–17, Indlu kufanele yakhiwe eSiyoni lapho labahlantekile enhlitiyweni batawumbona Nkulunkulu; 18–21, ISiyoni ngulabahlatekile enhlitiyweni; 22–28, ISiyoni itawuphunyula esijezisweni seNkhosi uma yetsembekile.
1 Ngicinisile, ngitsi kini bahlobo bami, ngikhuluma kini ngelivi lami, ngisho livi laMoya wami, kute nginikhombise intsandvo yami ngabomnakenu labaseveni laseSiyoni, labaningi babo labatitfobe ngekweliciniso futsi bafuna ngekukhutsala kutsi bafundze kuhlakanipha nekutfola liciniso.
2 Ngicinisile, ngicinisile ngitsi kini, babusisiwe labanjalo, ngoba bayawukutfola loko; ngoba mine, iNkhosi, ngikhombisa umusa kubo bonkhe labamnene, nakubo bonkhe lengikhetsa kubakhombisa umusa, kute ngibe ngulongenacala uma ngibaletsa ekwehlulelweni.
3 Bukani, ngitsi kini, mayelana nesikolwa eSiyoni, mine, iNkhosi, ngitfokotile kakhulu kutsi kube khona sikolwa eSiyoni, kanjalo nangenceku yami Parley P. Pratt, ngoba ihlala ikimi.
4 Futsi nangabe ichubeka ihlala kimi iyawuchubeka nekwengamela sikolwa eveni laseSiyoni ngite ngiyinike leminye imiyaleto.
5 Futsi ngitawuyibusisa ngetibusiso letiningi, ekuchazeni kabanti yonkhe imibhalo lengcwele netimfihlo kute kwakheke sikolwa, nelibandla eSiyoni.
6 Futsi kulabasele besikolwa, mine, iNkhosi, ngitimisele kukhombisa umusa; noko, kunalabo lokufanele bajeziswe, nemisebenti yabo iyawukwembulwa.
7 Lizembe libekiwe etimphandzeni tetihlahla; futsi sonkhe sihlahla lesingatseli titselo letinhle siyawujutjwa sifakwe emlilweni. Mine, iNkhosi, sengikukhulumile.
8 Ngicinisile ngitsi kini, bonkhe emkhatsini wabo labatiko kutsi tinhlitiyo tabo ticotfo, futsi tidzabukile, nemimoya yabo yephukile, futsi nalabo emkhatsini wabo labatimisele kugcina tivumelwano tabo ngemhlatjelo—yebo, wonkhe umhlatjelo mine, iNkhosi, lengiyawuyaleta—bemukelekile kimi.
9 Ngoba mine, iNkhosi, ngiyawubenta batsele njengesihlahla lesitsela kakhulu lesihlanyelwe emhlabatsini lovundzile, ngasemtfonjeni locwebile, lesikhipha sitselo lesiligugu kakhulu.
10 Ngicinisile ngitsi kini, kuyintsandvo yami kutsi indlu kufanele yakhelwe mine eveni laseSiyoni, njengesifanekiso lengininike sona.
11 Yebo, ayakhiwe ngekushesha, ngekwelishumi kwebantfu bami.
12 Bukani, loku ngekwelishumi futsi kungumhlatjelo mine, iNkhosi, lengiwudzingako etandleni tabo, kute kwakhelwe mine indlu kute kusindziswe iSiyoni—
13 Kube yindzawo yekubonga yabo bonkhe labangcwele, futsi kube yindzawo yekufundzisa bonkhe labo lababitelwe emsebentini webufundisi kulo lonkhe lubito netikhundla tabo letehlukahlukene.
14 Kute bapheleliswe ekucondzeni bufundisi babo, ekufundziseni, emtsetfweni, nasemfundzisweni, kuto tonkhe tintfo letiphatselene nembuso waNkulunkulu emhlabeni, tikhiya talowo mbuso letiniketwe nine.
15 Futsi nangabe bantfu bami bangakhela indlu yami egameni leNkhosi, futsi bangavumeli lutfo lolungakahlanteki lungene kuyo, kute ingangcoliswa, inkhatimulo yami iyawuhlala etikwayo;
16 Yebo, nebukhona bami buyawuba lapho, ngoba ngiyawungena kuyo, futsi bonkhe labahlantekile enhlitiyweni bayawungena kuyo kuyawumbona Nkulunkulu.
17 Kodvwa uma ingcolisiwe angeke ngingene kuyo, futsi nenkhatimulo yami angeke ibekhona lapho; ngoba angeke ngingene emathempelini langcolile.
18 Manje, bukani, uma iSiyoni yenta leti tintfo iyawuphumelela, itandzise futsi ikhatimule kakhulu, ibe yinkhulu kakhulu, futsi yesabeke kakhulu.
19 Netive temhlaba tiyawuyatisa, titsi: Ngempela iSiyoni lidolobha laNkulunkulu wetfu, futsi ngempela iSiyoni angeke iwe, angeke isuswe endzaweni yayo, ngoba Nkulunkulu ulapho, nesandla seNkhosi silapho;
20 Futsi ifungile ngemandla ebukhulu bayo kutsi ibe yinsindziso yayo nembhoshongo wayo lophakeme.
21 Ngako-ke, ngicinisile, naku lokushiwo yiNkhosi, iSiyoni ayijabule, ngoba lena yiSiyoni—labahlantekile enhlitiyweni; ngako-ke ayijabule, kungulapho lababi bayawulila.
22 Ngoba bukani, nibone, kuphindzisela kuta masinyane kulababi njengesivunguvungu; futsi ngubani loyawuphunyula kuko na?
23 Sijeziso seNkhosi siyawukwendlula ebusuku nasemini, futsi lombiko waso uyawukhatsata bonkhe bantfu; yebo, angeke simiswe kute kubuye iNkhosi.
24 Ngoba intfukutselo yeNkhosi iyokheleka ngekumelana netinengiso tabo nakuyo yonkhe imisebenti yabo yebubi.
25 Noko, iSiyoni iyawuphunyula uma yetama kwenta tonkhe tintfo noma ngabe yini lengiyiyalete ngayo.
26 Kodvwa uma ingatami kwenta noma ngabe yini lengiyiyalete ngayo, ngitawuyivakashela ngekwemisebenti yayo yonkhe, ngenhlupheko lematima, ngesifo lesingumashayabhuce, ngelubhubhane, ngenkemba, ngekuphindzisela, ngemlilo locotfulako.
27 Noko, akukhulunywe kanye etindlebeni tayo, kutsi mine, iNkhosi, sengiwemukele umnikelo wayo; futsi uma ingeke isona futsi kute nakunye kwaleti tintfo lokuyawuyehlela;
28 Futsi ngitawuyibusisa ngetibusiso, ngiphindzaphindze tibusiso letiningi etikwayo, nasetikwetitukulwane tayo phakadze naphakadze, kusho iNkhosi Nkulunkulu wenu. Amen.