Sigaba 123
Lokufanele kwentiwe ngulabaNgcwele ngalokuphatselene nalabo lababahluphako, njengoba kwabhalwa nguJoseph Smith umPhrofethi ngesikhatsi asiboshwa ejele laseLiberty, eMissouri. Lesi sigaba siyincenye letsatfwe encwadzini layibhalela liBandla mhlaka 20 iNdlovulenkhulu, 1839 (buka sihloko sesigaba 121).
1–6, LabaNgcwele kufanele bagcogcwe baphindze bakhiphe umbiko ngekuhlupheka nekuhlushwa kwabo; 7–10, Umoya lofanako nalowo lowamisa tinkholelo letingemanga nguwo futsi loholela ekuhlushweni kwalabaNgcwele; 11–17, Labaningi emkhatsini wato tonkhe tinkholo basatawulemukela liciniso.
1 Ngetulu kwaloko, sihlose kuphakamisa ngekucabangela kwenu kufaneleka kwabo bonkhe labangcwele kugcogca lwati lwawo onkhe emaciniso, kanye nekuhlupheka nekuhlukunyetwa lokubekwa etikwabo bantfu baleSifundza.
2 Nayo yonkhe imphahla kanye nelinani lemonakalo labawutfolile, kulimala ngekwesitfunti nangekwemtimba, kanye nangekwemphahla;
3 Kanye nemabito abo bonkhe bantfu lababe nesandla ekucindzetelweni kwabo, nangabe bangawatfola futsi bawabone.
4 Futsi mhlawumbe likomodi lingakhetfwa kute litfole leti tintfo, nekutsi litsatse lokushiwoko nalokufungelwe; liphindze ligcogce imibhalo lehlambalatako lesabalalisiwe;
5 Nayo yonkhe leyo lesemaphephandzabeni, nasetincwadzini telwati lolunhlobonhlobo, nayo yonkhe imilandvo lehlambalatako lekhishiwe, nalesabhalwa, nekutsi ibhalwa bobani, livete lonkhe luchungechunge lwetehlakalo tebusathane netento letimbi netekubulala letenteke kulabantfu—
6 Kute singayikhipheli kuphela emhlabeni wonkhe, kodvwa siyetfule phambi kwebaholi bembuso lophetse kubo bonkhe bubi bayo lobesabekako, njengemetamo yekugcina leyalelwe kitsi nguBabe wetfu loseZulwini, ngaphambi kwekutsi sikwati kucela ngalokugcwele nangalokuphelele leso setsembiso lesiyawumbita endzaweni yakhe labhace kuyo; futsi kute sive sonkhe sisale singenataba ngaphambi kwekutsi atfumele emandla engalo yakhe lenemandla.
7 Loku kungumsebenti lobalulekile lekufanele siwentele Nkulunkulu, tingilosi, lesiyawumiswa nato, nekutsi siwentele tsine, bafati betfu nebantfwana betfu, labentiwe kutsi bakhotsame ngelusizi, nekudzabuka, nekukhatsateka, ngaphansi kwesandla lesibi kakhulu sekubulala, sebudlova, nekucindzetelwa, lesisekelwa, futsi sikhutsatwa siphindze siphakanyiswa ngumtselela walowo moya lowacinisa tinkholelo tabobabe, labatfole emanga, etinhlitiyweni tebantfwana, futsi logcwalise umhlaba ngekudideka, futsi bewusolo ukhula ngemandla, manje losowusisusa sabo bonkhe bubi, futsi umhlaba wonkhe ububula ngaphansi kwesisindvo sebubi bawo lobukhulu.
8 Ulijoko lensimbi, usibopho lesicinile; ubozankosi bangempela, netinketane, netibopho, futsi netintsambo tesihogo.
9 Ngako-ke kungumsebenti lobalulekile lekufanele siwente, hhayi kuwentela bafati nebantfwana betfu kuphela, kodwa siwentele bafelokati netintsandzane, bayeni babo naboyise lababulewe ngaphansi kwesandla sawo sensimbi;
10 Leto tento letimbi netekuhlambalata letanele kwenta sihogo sitfutfumale, futsi sihlale sishacekile siphindze siphaphatsekile, futsi netandla tadeveli lucobo tivevetele tiphindze tichachatele.
11 Futsi kungumsebenti lobalulekile lokufanele siwentele situkulwane lesikhulako, nabo bonkhe labahlantekile enhlitiyweni—
12 Ngoba basebaningi namanje emhlabeni emkhatsini wato tonkhe tinkholo, emacembu, nemabandla, labavaleke emehlo ngebucili bebantfu, labanemacebo ekudukisa, futsi labavimbelekile kutfola liciniso ngoba bangati kutsi batawulitfola kuphi—
13 Ngako-ke, kufanele sente konkhe lokusemandleni kuveta tonkhe tintfo letifihlakele tebumnyama, ngekutati kwetfu; futsi tiyembulwa ngempela kusuka ezulwini—
14 Ngako-ke loku kufanele kwentiwe ngalokukhulu kukhutsala.
15 Akubete umuntfu lotsatsa loku njengetintfo letingakabaluleki, ngoba kuningi lokutako, ngalokuphatselene nalabangcwele, lokuncike kuleti tintfo.
16 Niyati, bomnaketfu, kutsi umkhumbi lomkhulu usitwa kakhulu liphini lelincane ngesikhatsi sesiphepho, ngekutsi ugcinwe uchutjwa ngumoya nemagagasi.
17 Ngako-ke, bomnaketfu labatsandzeka kakhulu, asente tonkhe tintfo lesinemandla ekutenta ngenjabulo; emvakwaloko sime sithule, ngesiciniseko lesikhulu, kute sibone insindziso yaNkulunkulu, nekutsi ingalo yakhe yembulwe.