Sigaba 77
Sembulo lesaniketwa Joseph Smith umPhrofethi, eHiram, e-Ohio, cishe ngeNdlovulenkhulu 1832. Umlandvo waJoseph Smith utsi “Ngalokuphatselene nekuhunyushwa kwemiBhalo leNgcwele, ngatfola lenchazelo lelandzelako yeSembulo saJohane.”
1–4, Tilwane tinemimoya futsi titawuhlala enjabulweni yaphakadze; 5–7, Lomhlaba ukhona sikhatsi seminyaka letinkhulungwane letisikhombisa; 8–10, Tingilosi letehlukahlukene tibuyisela livangeli futsi tisebenta emhlabeni; 11, Kubekwa luphawu kwalabatinkhulungwane letilikhulu nemashumi lamane nakune; 12–14, Khristu utawukuta ekucaleni kweminyaka letinkhulungwane letisikhombisa; 15, Baphrofethi lababili batawuvuselwa sive semaJuda.
1 Umbuto: Luyini lwandle lwengilazi lakhuluma ngalo Johane, esehlukweni sesine, evesini lesitfupha leSembulo na?Imphendvulo: Ngumhlaba, esimeni sawo sekungcweliswa, sekungabhubhi, nesaphakadze.
2 Umbuto: Yini lekufanele siyicondze ngetilwane letine, lokukhulunywe ngato evesini lelifanako na?Imphendvulo: Tiyinkhulumo lengumfanekiso, letisetjentiswa nguMembuli, Johane, uma achaza lizulu, ipharadisi yaNkulunkulu, kujabula kwebantfu, nekwetilwane, nalokuhamba ngesisu, nekwetinyoni temoya; loko lokungekwamoya lokufana naloko lokungekwemhlaba; naloko lokungekwemhlaba lokufana naloko lokungekwamoya; nemoya wemuntfu lofana nesicu sakhe semtimba, ngalokufanako nemoya wesilwane, nako konkhe lokudaliwe lokudalwe nguNkulunkulu.
3 Umbuto: Ngabe letilwane letine timele tilwane letitsite, noma timele tinhlobo tato noma tigaba tato na?Imphendvulo: Timele tilwane letine letitsite, letakhonjiswa Johane, kumela inkhatimulo yetinhlobo tetidalwa ngekulandzelana kwato noma indzawo yendalo letimiselwe yona, ekujabuleleni intfokoto yato yaphakadze.
4 Umbuto: Yini lekufanele siyicondze ngemehlo netimphiko, tilwane letatinako na?Imphendvulo: Emehlo ato amelele kukhanya nelwati, lokusho kutsi, tigcwele lwati; kantsi timphiko tato timelele emandla, kuhamba, kwenta, njalonjalo.
5 Umbuto: Yini lekufanele siyicondze ngebabonisi labangemashumi lamabili nakune, lakhuluma ngabo Johane?Imphendvulo: Kufanele sicondze kutsi lababonisi Johane lababona, bekubabonisi labebatsembekile emsebentini wekushumayela futsi labesebafa; labebabemabandla lasikhombisa, futsi ngaleso sikhatsi bebasepharadisi yaNkulunkulu.
6 Umbuto: Yini lekufanele siyicondze ngencwadzi layibona Johane, leyayinanyatseliswe ngemuva ngetimphawu letisikhombisa na?Imphendvulo: Kufanele sicondze kutsi icuketse intsandvo leyembuliwe, timfihlakalo, nemisebenti yaNkulunkulu; letintfo letifihliwe tekuphatsa kwakhe ngalokuphatselene nalomhlaba ngesikhatsi seminyaka letinkhulungwane letisikhombisa tekuchubeka kwawo, noma kuba khona kwawo kwesikhashana.
7 Umbuto: Yini lekufanele siyicondze ngetimphawu letisikhombisa leyayinanyatseliswe ngato na?Imphendvulo: Kufanele sicondze kutsi luphawu lwekucala lucuketse letintfo teminyaka letinkhulungwane yekucala, kantsi lwesibili lucuketse tintfo teminyaka letinkhulungwane yesibili, kanjalo kute kube nguyesikhombisa.
8 Umbuto: Yini lekufanele siyicondze ngetingilosi letine, lekukhulunywe ngato esehlukweni sesikhombisa, evesini lekucala leSembulo na?Imphendvulo: Kufanele sicondze kutsi batingilosi letine letitfunyelwe nguNkulunkulu, lokuniketwe kuto emandla kuwo omane emagumbi emhlaba, kusindzisa imphilo nekubulala; laba ngibo labanelivangeli lelingunaphakadze kulishumayela etiveni tonkhe, emindenini, etilimini nakubantfu bonkhe; banemandla ekuvala emazulu kubete sembulo kubantfu, kubophela ekuphileni, noma kuphonsa phansi lababi etindzaweni tebumnyama.
9 Umbuto: Yini lekufanele siyicondze ngengilosi leyenyuka iphuma emphumalanga, esehlukweni sesikhombisa evesini lesibili leSembulo na?Imphendvulo: Kufanele sicondze kutsi lengilosi leyayenyuka iphuma emphumalanga nguleyo leniketwe luphawu lwaNkulunkulu lophilako etikwetive letilishumi nakubili taka-Israyeli; ngaloko-ke, imemetela etingilosini letine letinelivangeli lelingunaphakadze, itsi: Ningawulimati umhlaba, noma lwandle, noma tihlahla, singakatibeki luphawu emabuntini tinceku taNkulunkulu wetfu. Futsi, uma nivuma kukwemukela loku, lona ngu-Eliyasi lobekatawufika kutawugcogca ndzawonye tive taka-Israyeli aphindze abuyisele tonkhe tintfo.
10 Umbuto: Tiyawufezwa ngasiphi sikhatsi letintfo lekukhulunywe ngato kulesehluko na?Imphendvulo: Tiyawufezeka eminyakeni letinkhulungwane letisitfupha, noma ngekuvulwa kweluphawu lwesitfupha.
11 Umbuto: Yini lekufanele siyicondze ngekubekwa luphawu kwetinkhulungwane letilikhulu nemashumi lamane nakune, etiveni tonkhe taka-Israyeli—labatinkhulungwane letilishumi nakubili esiveni ngasinye na?Imphendvulo; Kufanele sicondze kutsi labo lababekwe luphawu babaphristi labakhulu, lababekwe ngekweluhlelo lolungcwele lwaNkulunkulu kuphatsa livangeli lelingunaphakadze; ngoba ngibo labo lababekwe kuto tonkhe tive, imindeni, tilimi, nebantfu, tingilosi lokuniketwe kuto emandla etikwetive temhlaba, kuletsa bonkhe labo labangeta ebandleni leLitubulo.
12 Umbuto: Yini lekufanele siyicondze ngekukhala kwemacilongo, lokushiwo esehlukweni sesiphohlongo seSembulo na?Imphendvulo: Kufanele sicondze kutsi njengoba Nkulunkulu adala umhlaba ngemalanga lasitfupha, futsi ngelilanga lesikhombisa wawucedza umsebenti wakhe, wawungcwelisa, waphindze wabumba umuntfu ngelutfuli lwemhlaba, kanjalo-ke, ekucaleni kweminyaka letinkhulungwane letisikhombisa iNkhosi Nkulunkulu itawungcwelisa umhlaba, ifeze kusindziswa kwemuntfu, yehlulele tonkhe tintfo, futsi ihlenge tonkhe tintfo, ngaphandle kwaloko lengakakubeki ngaphansi kwemandla ayo, ngesikhatsi lapho iyawube seyibophe tonkhe tintfo, kute kube sekugcineni kwetintfo tonkhe; futsi kukhala kwemacilongo etingilosi letisikhombisa kulungiselela nekucedzela umsebenti wayo, ekucaleni kweminyaka letinkhulungwane letisikhombisa—kulungiselela indlela ngaphambi kwesikhatsi sekubuya kwayo.
13 Umbuto: Tiyawufezeka nini tonkhe letintfo, letibhalwe esehlukweni semfica seSembulo na?Imphendvulo: Kufanele tifezeke emvakwekuvulwa kweluphawu lwesikhombisa, ngaphambi kwekubuya kwaKhristu.
14 Umbuto: Yini lekufanele siyicondze ngencwadzi lencane leyadliwa nguJohane, njengoba kushiwo esehlukweni selishumi seSembulo na?Imphendvulo: Kufanele sicondze kutsi bekungumsebenti, nesimiso, sekutsi yena agcogce tive taka-Israyeli; buka, lona ngu-Eliyasi, lokufanene, njengoba kubhaliwe, ete atawubuyisela tonkhe tintfo.
15 Umbuto: Yini lekufanele icondvwe ngabofakazi lababili, esehlukweni selishumi nakunye seSembulo na?Imphendvulo: Baphrofethi lababili lekufanele bavuselwe sive semaJuda emalangeni ekugcina, ngesikhatsi sekubuyiselwa, nekuphrofetha kumaJuda emwakwekugcogcwa kwawo futsi sekakhe lidolobha laseJerusalema eveni laboyise.