Sigaba 108
Sembulo lesaniketwa nguJoseph Smith umPhrofethi, eKirtland, e-Ohio, mhlaka 26 iNgongoni, 1835. Lesi sigaba satfolakala ngenca yesicelo saLyman Sherman, lobekabekwe ngaphambilini waba nguwalabangemashumi lasikhombisa nalobekete kumPhrofethi anesicelo sesembulo kute ente kwatiwe ngalokwakufanele akwente.
1–3, Lyman Sherman utsetselelwa tono takhe; 4–5, kufanele abalwe nebabonisi lababaholi beliBandla; 6–8, Ubitelwa kutsi ashumayele livangeli nekutsi acinise bomnakabo lahola nabo.
1 Ngicinisile naku lokushiwo yiNkhosi kuwe, nceku yami Lyman: Tono takho ticolelwe, ngoba ulilalele livi lami ngekuta lapha namuhla ekuseni kutawutfola seluleko koloyo lengimkhetsile.
2 Ngako-ke, umphefumulo wakho awuphumule mayelana nekuma kwakho ngekwamoya, futsi ungabe usamelana nelivi lami.
3 Futsi sukuma ucaphelisise kusukela manje ekugcineni tifungo takho, lowutentile nalowutentako, futsi uyawubusiswa ngetibusiso letinkhulu kakhulu.
4 Lindza ngekubeketela kute kubitwe umhlangano lonesizotsa wetinceku tami, ngaleso sikhatsi uyawukhunjulwa njengencenye yebabonissi bami bekucala, uphindze utfole lilungelo ngekubekwa nabo bonkhe babonisi lengibakhetsile.
5 Buka, lesi setsembiso saBabe kuwe uma uchubeka nekwetsembeka.
6 Futsi siyawugcwaliseka kuwe ngalelo langa uyawuba nelilungelo lekushumayela livangeli noma ngukuphi lapho ngiyawukutfumela khona, kusukela ngaleso sikhatsi.
7 Ngako-ke, cinisa bomnakenu kuyo yonkhe imphilo yakho, kuyo yonkhe imithandazo yakho, kuko konkhe kukhutsata kwakho, nakuko konkhe kwenta kwakho.
8 Buka, ubone, nginawe kute ngitawukubusisa nekukukhulula ingunaphakadze. Amen.