Sigaba 117
Sembulo lesaniketwa ngaJoseph Smith umPhrofethi, eFar West, eMissouri, mhlaka 8, Kholwane, 1838, mayelana nemisebenti yaWilliam Marks, Newel K. Whitney, na-Oliver Granger lebekufanele bayente ngekushesha.
1–9, Tinceku teNkhosi akukafaneli tifise tintfo temhlaba, ngoba “iyini imphahla eNkhosini na?”; 10–16, Kufanele bashiye kuba netingcondvo letimfisha, futsi iminikelo yabo iyawuba ngcwele eNkhosini.
1 Ngicinisile naku lokushiwo yiNkhosi encekwini yami William Marks, kanjalo nasencekwini yami Newel K. Whitney, abacedzele umsebenti wabo ngekushesha bahambe eveni laseKirtland, ngaphambi kwekutsi mine, iNkhosi, ngiphindze ngitfumele lichwa emhlabeni.
2 Abavuke, basukume, baphindze bahambe, bangahlali, ngoba mine, iNkhosi, ngiyakuyaleta loku.
3 Ngako-ke, uma bahlala angeke kube kuhle kubo.
4 Abaphendvuke etonweni tabo, nakuto tonkhe tifiso tabo temhobholo, phambi kwami, kusho iNkhosi; ngoba iyini imphahla kimi na? kusho iNkhosi.
5 Imphahla yaseKirtland ayidayiswe kute kubhadalwe tikweleti, kusho iNkhosi. Abahambe, kusho iNkhosi, futsi noma ngayini lesalako, ayisale etandleni tenu, kusho iNkhosi.
6 Ngoba ngite yini tinyoni telizulu, netinhlati telwandle, netilwane tasetintsabeni na? Angiwudalanga yini umhlaba na? Angikasiphatsi yini siphetfo sawo onkhe emabutfo etive temhlaba na?
7 Ngako-ke, angeke yini ngente tindzawo letilihlane tihlume tiphindze tichakaze, tikhicite kakhulu na? kusho iNkhosi.
8 Kute yini indzawo leyenele etintsabeni ta-Adamu-ondi-Ahman, nasematsafeni ase-Olaha Shinehah, noma live Adamu labekahlala kulo, kutsi ningate nifise loku lokulitfonsi, niyekele leto tintfo letibaluleke kakhulu na?
9 Ngako-ke, wotani lapha eveni lebantfu bami, ngisho iSiyoni.
10 Inceku yami William Marks ayetsembeke etintfweni letincane, futsi iyawuba ngumbusi etikwalokuningi. Ayengamele emkhatsini webantfu bami edolobheni laseFar West, futsi ayibusiswe ngetibusiso tebantfu bami.
11 Inceku yami Newel K. Whitney ayibe nemahloni ngelicembu lemaNikholawu nato tonkhe tinengiso tabo letifihlekile, nako konkhe kuba nengcondvo lemfisha kwakhe phambi kwami, kusho iNkhosi, ete eveni lase-Adamu-ondi-Ahman, abe ngumbhishobhi kubantfu bami, kusho iNkhosi, hhayi ngeligama kodvwa ngetento, kusho iNKhosi.
12 Ngetulu kwaloko, ngitsi kini, ngiyayikhumbula inceku yami Oliver Granger; buka, ngicinisile ngitsi kuyo libito layo liyawukhunjulwa njengalelingcwele titukulwane ngetitukulwane, phakadze naphakadze, kusho iNkhosi.
13 Ngako-ke, ayelekelele ngukukhutsala kute kukhululwe Bumengameli bekuCala beliBandla lami, kusho iNkhosi; futsi uma iwa iyawuvuka futsi, ngoba umnikelo wayo uyawubangcwele kakhulu kimi kunenzuzo yayo, kusho iNkhosi.
14 Ngako-ke, ayite lapha ngekushesha, eveni laseSiyoni; futsi ngesikhatsi lesifanele iyawukwentiwa umhwebi egameni lami, kusho iNkhosi, kute kuzuze bantfu bami.
15 Ngako-ke akubete umuntfu lodzelela inceku yami Oliver Granger, kodvwa tibusiso tebantfu bami atibe kuye phakadze naphakadze.
16 Ngetulu kwaloko, ngicinisile ngitsi kini, tinceku tami tonkhe letiseveni laseKirtland atiyikhumbule iNkhosi Nkulunkulu wato, kanjalo nendlu yami, kutsi tiyigcine ingcwele, futsi ticitse nalabantjintja timali ngesikhatsi sami lesifanele, kusho iNkhosi. Kunjalo nje. Amen.