Sigaba 62
Sembulo lesaniketwa ngaJoseph Smith umPhrofethi, elusentseni lweMfula iMissouri eChariton, eMissouri, mhlaka 13 ngeNgci, ngemnyaka we-1831. Ngalelilanga umPhrofethi nelicembu lakhe, labebasendleleni yabo baphuma e-Independence baya eKirtland, bahlangana nebabonisi labehlukene labebasendleleni yabo leya eveni laseZion, futsi emvakwekubingelelana ngekujabula, waniketwa lesi sembulo.
1–3, Bufakazi buyabhalwa ezulwini; 4–9, Babonisi kufanele bahambe bashumayele ngekubona kwabo futsi njengobe bacondziswa nguMoya.
1Â Bukani, niphindze nilalele, O nine babonisi belibandla lami, kusho iNkhosi Nkulunkulu wenu, ngisho Jesu Khristu, ummeli wenu, lowati butsakatsaka bemuntfu nekutsi basitwa kanjani labalingwako.
2Â Futsi ngicinisile emehlo ami asetikwalabo labasengakayi eveni laseZion; ngaloko-ke lenitfunywe kona kusengakagcwaliseki.
3Â Noko, nibusisiswe, ngoba bufakazi lenibufakazile bubhaliwe ezulwini kute tingilosi tibubuke; futsi tiyanijabulela, netono tenu titsetselelwe.
4Â Manje chubekani neluhambo lwenu. Butsanani eveni laseZion; nibambe umhlangano futsi nijabule kanyekanye, niletse sidlo seNkhosi kuLosetikwako Konkhe.
5Â Emvakwaloko ningabuya kutawufakaza, yebo, nonkhe ndzawonye, noma ngababili, njengobe kubonakala kukuhle kini; kuphela yetsembekani, nimemetele tindzaba letimnandzi kubantfu basemhlabeni, noma emkhatsini wemabandla alababi.
6Â Bukani, mine, iNkhosi, nginiletse ndzawonye kute setsembiso sigcwaliseke, kute labetsembekile emkhatsini wenu bagcinwe baphindze bajabule kanyekanye eveni laseMissouri. Mine, iNkhosi, ngiyabetsembisa labetsembekile futsi angeke ngiwacale emanga.
7Â Mine, iNkhosi, ngitimisele, uma kukhona emkhatsini enu lofisa kugibela emahhashi, noma iminyuzi, noma tincola, uyawusitfola lesi sibusiso, uma asitfola ngesandla seNkhosi, ngenhlitiyo lebongako etintfweni tonkhe.
8Â Leti tintfo tisele ngani kutsi nitente ngekubona kwenu nangekucondziswa nguMoya.
9Â Bukani, umbuso ngewenu. Futsi bukani niphindze nibone, nginalabatsembekile njalo. Kunjalo nje. Amen.