Sigaba 98
Sembulo lesaniketwa ngaJoseph Smith umPhrofethi, eKirtland, e-Ohio, mhlaka 6 iNgci, 1833. Lesi sembulo seta ngenca yekuhlushwa kwalabaNgcwele eMissouri. Linani lelandzako lemalunga eliBandla labekatinte eMissouri lakhatsata letinye tifiki, besatjiswa kwandza kwesibalo salabaNgcwele, nemtselela labebanawo kutembangave netemnotfo, nangekwehluka kwabo ngekwemasiko nangekwenkholo. NgaKholwane 1833, sicuku sebantfu labanemsindvo sabhubhisa takhiwo teliBandla, tabhoca emalunga lamabili eliBandla ngelitiyela saphindze sabahloma tinsiba, sase sitsi labaNgcwele abaphume eSifundzeni saseJackson. Noma letinye tindzaba tetinkinga eMissouri tasetifikile ngalokungangabateki kumPhrofethi eKirtland (libanga lelingemakhulu layimfica budze), bumatima besimo bebungateka kuye ngesembulo kuphela ngalelilanga.
1–3, Tinhlupheko talabaNgcwele titawuba nenzuzo kubo; 4–8, LabaNgcwele kufanele basekele umtsetfo sisekelo welive; 9–10, Bantfu labacotfo, labahlakaniphile, nalabalungile kufanele basekelwe kumbuso lophetse welive; 11–15, Labo labadzela timphilo tabo ngenca yemsebenti weNkhosi bayawuba nekuphila lokuphakadze; 16–18, Lahlani imphi nimemetele kuthula; 19–22, LabaNgcwele eKirtland bayekhutwa futsi bayayaletwa kutsi baphendvuke; 23–32, INkhosi yembula imitsetfo Yayo lephatselene nekuhlushwa nebumatima lobetfweswe bantfu Bayo; 33–38, Imphi ivumelekile kuphela uma iNkhosi iyaleta ngayo; 39–48, LabaNgcwele kufanele batsetselele titsa tabo, lokutawutsi, uma tiphendvuka, nato titawuphunyuka emphindziselweni yeNkhosi.
1 Ngicinisile ngitsi kini bahlobo bami, ningesabi, tinhlitiyo tenu atidvudvuteke; yebo, tfokotani njalo, futsi kuko konkhe bongani;
2 Tsembani ngekubeketela eNkhosini, ngoba imithandazo yenu ingenile etindlebeni teNkhosi Sebawothi, futsi ibhaliwe ngeluphawu nangebufakazi—iNkhosi ifungile futsi yamemetela kutsi iyawuniketwa.
3 Ngako-ke, iniketa lesi setsembiso kini, ngesivumelwano lesingagucuki sekutsi iyawufezeka; nekutsi konkhe lenihlushwe ngako kuyawusebentelana kube ngulokuhle kini, kuletse ludvumo egameni lami, kusho iNkhosi.
4 Manje, ngicinisile ngitsi kini ngalokuphatselene nemitsetfo yelive, kuyintsandvo yami kutsi bantfu bami bagcine tonkhe tintfo noma ngabe yini lengibayaleta yona.
5 Futsi lowo mtsetfo welive lohambisana nemtsetfo sisekelo, losekela umgomo wenkhululeko ekugcineni emalungelo, wabo bonkhe bantfu, futsi ulungile phambi kwami.
6 Ngako-ke, mine, iNkhosi, anginibeki licala, nabomnakenu belibandla lami, ekusekeleni lowo mtsetfo longumtsetfo sisekelo welive;
7 Futsi ngalokuphatselene nemtsetfo lowentiwe ngumuntfu, noma ngayini leyendlula loku, kuvela kulomubi.
8 Mine, iNkhosi Nkulunkulu, ngiyanikhulula, ngako-ke nikhululekile ngempela; futsi nemtsetfo nawo uyanikhulula.
9 Noko, uma kubusa bantfu lababi bantfu bayakhala.
10 Ngaloko-ke, bantfu labacotfo nalabahlakaniphile kufanele bafunwe ngekukhutsala, futsi bantfu labalungile nalabahlakaniphile kufanele nicinisekise kutsi niyabasekela; kungenjalo noma ngayini leyendlula loku ivela kulomubi.
11 Futsi ngininika umyaleto, wekutsi nishiye konkhe lokubi nibambelele kuko konkhe lokuhle, kute niphile ngawo onkhe emavi laphuma emlonyeni waNkulunkulu.
12 Ngoba utawuniketa labetsembekile umugca etikwemugca, umyalo etikwemyalo, futsi ngitawunivivinya ngiphindze nginilinge ngaloku.
13 Futsi loyo lodzela imphilo yakhe emsebentini wami, ngenca yelibito lami, uyawuyitfola futsi, ngisho kuphila lokuphakadze.
14 Ngako-ke ningatesabi titsa tenu, ngoba ngincumile enhlitiyweni yami, kusho iNkhosi, kutsi ngitawunivivinya kuto tonkhe tintfo, kubuka kutsi nitawuhlala yini esivumelwaneni sami, kute kube sekufeni, kute nitfolakale ningulabafanele.
15 Ngoba uma ningeke nihlale esivumelwaneni sami anikangifaneli.
16 Ngako-ke, lahlani imphi nimemetele kuthula, futsi nifune ngekukhutsala kuguculela tinhlitiyo tebantfwana kuboyise, netinhlitiyo taboyise kubantfwana;
17 Kanjalo, netinhlitiyo temaJuda kubaphrofethi, nebaphrofethi kumaJuda; funa ngite ngitewushaya umhlaba wonkhe ngesicalekiso, nebantfu bonkhe bashe phambi kwami.
18 Tinhlitiyo tenu atingakhatsateki; ngoba ekhaya laBabe kunetindlu letiningi, futsi senginilungiselele indzawo; futsi lapho Babe nami sikhonakhona, niyawuba khona nani.
19 Bukani, mine, iNkhosi, angitfokoti ngalabaningi labasebandleni eKirtland;
20 Ngoba abatishiyi tono tabo, netindlela tabo tebubi, kutikhukhumeta kwetinhlitiyo tabo, nekukhanuka kwabo, nato tonkhe tintfo tabo letinengekile, bagcine emavi ekuhlakanipha newekuphila lokuphakadze lengibanike wona.
21 Ngicinisile ngitsi kini, mine, iNkhosi, ngitawubajezisa futsi ngitawukwenta noma ngayini lengifuna kuyenta, uma bangaphendvuki futsi bagcine tonkhe tintfo lengitisho kubo.
22 Ngetulu kwaloko ngitsi kini, uma netama kwenta noma ngayini lenginiyalete yona, mine, iNkhosi, ngitawuncandza lonkhe lulaka nentfukutselo kusuke kini, futsi emasango esihogo angeke abuse ngekumelana nani.
23 Manje, sengikhuluma nani ngalokuphatselene nemindeni yenu—uma bantfu banishaya, noma bashaya imindeni yenu, kanye, futsi nikwetfwala ngekubeketela ningabetfuki, noma nifune kutiphindziselela, niyawunikwa umvuzo;
24 Kodvwa uma ningakwetfwali ngekubeketela, kuyawutsatfwa njengesilinganiso lesilungile lesifanele.
25 Ngetulu kwaloko, uma sitsa senu sinishaya kwesibili, nine ningasetfuki sitsa senu, kodvwa nikutfwale ngekubeketela, umvuzo wenu uyawuphindvwa ngalokulikhulu.
26 Ngetulu kwaloko, uma sinishaya kwesitsatfu, futsi nikwetfwala ngekubeketela, umvuzo wenu uyawuphindvwa kane;
27 Futsi lobu bufakazi lobutsatfu buyawumelana nesitsa senu uma singaphendvuki, fitsi angeke bucinywe.
28 Manje, ngicinisile ngitsi kini, uma leso sitsa siyawuphunyula imphindziselo yami, kute singaletfwa ekwehlulelweni phambi kwami, uma kunjalo niyawukwenta siciniseko sekutsi niyasicwayisa egameni lami, kute singabe sisanihlasela futsi, noma imindeni yenu, ngisho bantfwana bebantfwabenu besitukulwane sesitsatfu nesesine.
29 Emvakwaloko, uma sinihlasela nine noma bantfwana benu, noma bantfwana bebantfwabenu besitukulwane sesitsatfu nesesine, sitsa senu ngisinikela etandleni tenu;
30 Futsi uma nitawuba nebubele, uyawunikwa umvuzo ngekulunga kwakho; kanjalo nebantfwana bakho nebantfwana bebantfwabakho besitukulwane sesitsatfu nesesine.
31 Noko, sitsa sakho sisetandleni takho; futsi uma usinika umvuzo ngemisebenti yaso uyawuba ngulongenacala; uma sifuna imphilo yakho, nemphilo yakho isebungotini ngaso, sitsa sakho sisetandleni takho, futsi uyawuba ngulongenacala.
32 Bukani, lona ngumtsetfo lengiwunikete inceku yami Nefi, naboyihlo, Josefa, Jakobe, Isaka, na-Abrahama, nabo bonkhe baphrofethi nebaphostoli bami basemandvulo.
33 Ngetulu kwaloko, lona ngumtsetfo lengawuniketa bantfu bami basemandvulo, wekutsi bangayi emphini ngekumelana nanoma ngusiphi sive, imindeni, tilimi, noma bantfu, ngaphandle uma mine, iNkhosi, ngibayaletile.
34 Futsi uma kukhona sive, lulwimi, noma bantfu labamemetela imphi ngekumelana nabo, kufanele baphakamise kucala sibonakaliso sekuthula kulabo bantfu, sive, noma lulwimi.
35 Futsi uma labo bantfu bangakwemukeli kuthula, kungaba kwesibili noma kwesitsatfu, kufanele baletse lobu bufakazi phambi kweNkhosi;
36 Emvakwaloko mine, iNkhosi, ngitawubaniketa umyaleto, futsi ngitawubatfola bamsulwa ekulweni naleso sive, lulwimi, noma bantfu.
37 Futsi mine, iNkhosi, ngitawukulwa timphi tabo, netimphi tebantfwana babo, nebantfwana bebantfwababo, bate batiphindziselele kuto tonkhe titsa tabo, esitukulwaneni sesitsatfu nesesine.
38 Bukani, lesi sibonele kubo bonkhe bantfu, kusho iNkhosi Nkulunkulu wenu, kute nitfolwe nimsulwa phambi kwami.
39 Ngetulu kwaloko, ngicinisile ngitsi kini, uma sitsa sakho lesikuhlasela kwekucala, siphendvuka siphindze site kuwe sicela intsetselelo kuwe, ubositsetselela, futsi ungakugcini loko njengebufakazi bakho kuso—
40 Kanjalo futsi kwesibili nekwesitsatfu; futsi njengekuphendvuka njalo kwesitsa sakho ekoneni kwaso lesikone ngako, uyawusitsetselela, kute kube ngemahlandla langemashumi lasikhombisa laphindvwe kasikhombisa.
41 Futsi uma sikona singaphendvuki kwekucala, noko uyawusitsetselela.
42 Uma sikona kwesibili, futsi singaphendvuki, noko uyawusitsetselela.
43 Uma sikona kwesitsatfu, futsi singaphendvuki, kanjalo uyawusitsetselela.
44 Kodvwa uma sikona kwesine ungasitsetseleli, kodvwa uyawuletsa lobu bufakazi phambi kweNkhosi; futsi angeke bucinywe site siphendvuke siphindze sikukhokhele ngalokuphindvwe kane kuto tonkhe tintfo lesikone ngato.
45 Uma sikwenta loku, uyawusitsetselela ngayo yonkhe inhlitiyo yakho; kodvwa uma singakwenti loku, mine, iNkhosi, ngitawukuphindziselela esitseni sakho ngalokuphindvwe ngelikhulu;
46 Kanjalo nasebantfwaneni baso, nasebantfwaneni bebantfwababo bonkhe labo labangitondzako, esitukulwaneni sesitsatfu nesesine.
47 Kodvwa uma bantfwana bayawuphendvuka, noma bantfwana bebantfwana, baphendvukele eNkhosini Nkulunkulu wabo, ngetinhlitiyo tabo tonkhe nangemandla abo onkhe, ngengcondvo, nangemfutfo wabo, babuyisele ngalokuphindvwe kane ngato tonkhe tono tabo labanone ngato, noma boyise labone ngato, noma boyise baboyise, emvakwaloko intfukutselo yakho kufanele iphele.
48 Futsi imphindziselo angeke iphindze ite kubo, kusho iNkhosi Nkulunkulu wakho, futsi netono tabo angeke tisaphindze tiletfwe njengebufakazi phambi kweNkhosi ngekumelana nabo. Amen.