1 Lalelani, O babonisi belibandla lami, nibeke indlebe evini lami, nitfole lwati kimi ngentsandvo yami ngani, kanye nangedzawo lenginitfumele kuyo.

2 Ngoba ngicinisile ngitsi kini, ubusisiwe loyo logcina imiyaleto yami, ekuphileni noma ekufeni; naloyo lowetsembekile etinhluphekweni, inzuzo yakhe yinkhulu embusweni wasezulwini.

3 Angeke nikwati kubona ngemehlo enu enyama, kwamanje, lisu laNkulunkulu wenu mayelana naleto tintfo letitawukuta emvakwalesi sikhatsi, nenkhatimulo letawulandzela emvakwelusizi lolukhulu.

4 Ngoba emvakwelusizi lolukhulu kuta tibusiso. Ngaloko-ke lilanga liyeta lapho niyawetfweswa umchele wenkhatimulo lenkhulu; lihora lisengakefiki, kodvwa selidvutane.

5 Khumbulani loku, lenganitjela kona ngaphambilini, kute nikubeke etinhlitiyweni, nemukele naloko lokutawulandzela.

6 Bukani, ngicinisile ngitsi kini, ngalesi sizatfu nginitfumile—kute nilalele, futsi netinhlitiyo tenu tilungele kufakaza ngetintfo letitawukuta;

7 Ngetulu kwaloko kute nihlonishwe ekubekeni sisekelo, nasekufakazeni ngalendzawo iSiyoni yaNkulunkulu letawukuma kuyo.

8 Nekutsi lidzili lalokukhuluphele lilungiselwe labamphofu; yebo, lidzili lalokukhuluphele, leliwayini lelimnandzi lelihlutwe kahle, kute umhlaba wati kutsi imilomo yebaphrofethi angeke yehluleke.

9 Yebo, sidlo sakusihlwa sendlu yeNkhosi, lesilungiswe kahle, lokutawumenywa kuso tonkhe tive.

10 Kwekucala, ticebi netifundziswa, labahlakaniphile nalabaphakeme bayawumenywa;

11 Emvakwaloko kuyawukuta lilanga lemandla ami; bese kutsi labamphofu, nalabangakhoni kuhamba, nalabangaboni, nalabangeva, bangene emshadweni weliWundlu, badle sidlo sakusihlwa seNkhosi, lesilungiselelwe lilanga lelikhulu lelitako.

12 Bukani, mine, iNkhosi, sengikukhulumile loku.

13 Kute bufakazi buphume eSiyoni, yebo, buphume emlonyeni welidolobha lelilifa laNkulunkulu—

14 Yebo, ngalesi sizatfu nginitfumele lapha, futsi ngakhetsa inceku yami Edward Partridge, ngambekela umsebenti wakhe wekufundzisa livangeli kulelive.

15 Kodvwa uma angaphendvuki etonweni takhe, tekungakholwa nekuphumphutseka kwenhlitiyo, akacaphele funa awe.

16 Bukani umsebenti wakhe wekufundzisa livangeli uniketwe yena, futsi angeke aphindze aniketwe.

17 Futsi loyo lome kulomsebenti wekufundzisa livangeli ukhetfwe kutsi abe ngumehluleli ka-Israyeli, njengobe bekunjalo etikhatsini tasemandvulo, kwabela tindzawo letilifa laNkulunkulu ebantfwaneni bakhe;

18 Nekwehlulela bantfu bakhe ngebufakazi balabalungile, nangekwelekelelwa beluleki bakhe, ngalokuphatselene nemitsetfo yembuso leniketwe baphrofethi baNkulunkulu.

19 Ngoba ngicinisile ngitsi kini, umtsetfo wami uyawugcinwa kulelive.

20 Akubebete umuntfu locabanga kutsi ungumbusi; kodvwa Nkulunkulu akabuse loyo lowehlulelako, ngalokuphatselene neteluleko tentsandvo yakhe, noma, ngalamanye emagama, lowelulekako noma lohlala esihlalweni sekwehlulela.

21 Akubebete umuntfu lowephula imitsetfo yelive, ngoba loyo logcina imitsetfo yaNkulunkulu ute sidzingo sekwephula imitsetfo yelive.

22 Ngaloko-ke, tfobelani emandla ebabusi labakhona, ate abuse loyo lokungelakhe lilungelo lekubusa, futsi abeke tonkhe titsa ngaphansi kwetinyawo takhe.

23 Bukani, lemitsetfo leniyitfolile esandleni sami yimitsetfo yelibandla, futsi nitawuyiphatsa ngalendlela. Bukani, naku kuhlakanipha.

24 Manje, njengobe ngikhulumile ngenceku yami Edward Partridge, lendzawo yindzawo yakhe yekuhlala, nalabo lakabakhetsile njengebeluleki bakhe; ngetulu kwaloko yindzawo yaloyo lengimukhetsele kubuketa indlu yami yengcebo;

25 Ngalo-ke, abaletse imindeni yabo kulendzawo, njengobe batawelulekana bona baphindze belulekwe ngimi.

26 Ngoba bukani, akukuhle kutsi ngiyalete kuko konkhe; ngoba loyo lophocelelwako kuko konkhe, nguye loyo lolivila futsi akasiyo inceku lehlakaniphile; ngaloko-ke akawutfoli umvuzo.

27 Ngicinisile ngitsi, bantfu kufanele bahlanganyele ngekulangatelela ekwenteni lokuhle, futsi bente tintfo letinyenti ngekutsandza kwabo, bente nekulunga lokunyenti;

28 Ngoba emandla akubo, ngawo labakwatiko kutikhetsela. Futsi nangabe bantfu benta lokuhle angeke nanini balahlekelwe ngumvuzo wabo.

29 Kodvwa loyo longenti lutfo ate ayaletwe, emukele umyaleto ngenhlitiyo lengabatako, awugcine ngebuvila, nguye loyo loyawulahlwa.

30 Ngingubani mine lengenta umuntfu, kusho iNkhosi, longayukumbeka licala longayitfobeli imiyaleto yami na?

31 Ngingubani mine, kusho iNkhosi, lotsembisile kodvwa ngangafezi na?

32 Ngiyayaleta bantfu bangatfobeli; ngiyahocisa futsi bangatitfoli tibusiso.

33 Bese batsi etinhlitiyweni tabo: Lona akusiwo umsebenti weNkhosi, ngoba tetsembiso tayo atikagcwaliswa. Kodvwa maye kulabo, ngoba umvuzo wabo uhlala ubhace ngaphansi, awuveli ngetulu.

34 Manje sengininika leminye imiyalo mayelana nalendzawo.

35 Kukuhlakanipha kimi kutsi inceku yami Martin Harris ibe sibonelo ebandleni, ekubekeni timali tayo phambi kwembhishobhi welibandla.

36 Ngetulu kwaloko, lona ngumtsetfo wami kuwo wonkhe umuntfu lota kulendzawo kutawutfola lifa; futsi uyawukwenta ngemali yakhe njengekusho kwemtsetfo.

37 Futsi kukuhlakanipha kutsi kube netindzawo letitsengwako e-Independence, lekuyawuba yindzawo yendlu yengcebo, kanjalo nendlu yekukhicita.

38 Leminye imiyalo mayelana nenceku yami Martin Harris iyawuniketwa yena nguMoya, kute atfole lifa lakhe njengobe kubonakala kukuhle kuye;

39 Futsi akaphendvuke etonweni takhe, ngoba ufuna ludvumo lwemhlaba.

40 Ngetulu kwaloko inceku yami William W. Phelps ayime esikhundleni lengiyikhetsele kuso, futsi itfole lifa layo kulendzawo.

41 Futsi kudzingekile kutsi iphendvuke, ngoba mine, iNkhosi, angitfokoti kakhulu ngayo, ngoba ifuna kwendlula labanye, futsi ayisiyo mnene ngalokwanele phambi kwami.

42 Bukani, loyo lophendvukile etonweni takhe, nguye loyo lotsetselelwako, futsi mine, iNkhosi angiphindzi ngitikhumbule.

43 Ngaloku nitawukwati kutsi uma umuntfu aphendvuka etonweni takhe—bukani, utawutivuma bese uyatishiya.

44 Manje, ngicinisile, ngitsi ngalokuphatselene nebabonisi belibandla lami labasele, sikhatsi sisengakefiki, futsi angeke sifike iminyaka leminyeti, kutsi bona batfole lifa labo kulendzawo, ngaphandle uma bakulangatelela ngemthandazo wekukholwa, kuphela njengobe batawukhetselwa lona yiNkhosi.

45 Ngoba, bukani, batawubadvungulula labantfu ndzawonye kusukela emikhawulweni yemhlaba.

46 Ngaloko-ke, butsanani ndzawonye; futsi labo labangakabekwa kutsi bahlale kulendzawo, abashumayele livangeli etifundzeni letisedvute; emvakwaloko babuyele emakhaya abo.

47 Abafundzise endleleni, bafakaze ngeliciniso kuto tonkhe tindzawo, babite ticebi, labaphakeme nalabaphansi, nalabamphofu kutsi baphendvuke.

48 Abakhe emabandla, nangabe bantfu basemhlabeni batawuphendvuka.

49 Futsi akube nesitfunywa lesikhetfwe ngelivi lelibandla, ebandleni lase-Ohio, kwemukela timali kute kutsengwe tindzawo eZion.

50 Nginika inceku yami Sidney Rigdon umyaleto, wekutsi itawubhala inchazelo yendzawo yaseZion, nembhalo ngentsandvo yaNkulunkulu, njengobe iyawukwatiswa nguMoya kuye;

51 Futsi incwadzi nencwadzi lenika imvume, leyiyowetfulwa kuwo onkhe emabandla kute atfole timali, letitawubekwa kumbhishobhi, etandleni takhe noma tesitfunywa, njengobe kubonakala kukuhle kuye noma njengobe ayawuyala, kutsenga tindzawo telifa lebantfwana baNkulunkulu.

52 Ngoba, bukani, ngicinisile ngitsi kini, iNkhosi ifisa kutsi bafundzi nebantfwana bebantfu bavule tinhlitiyo tabo, kute batsenge sonkhe lesi sifundza selive, ngekushesha uma sikhatsi sivuma.

53 Bukani, naku kuhlakanipha. Abente loku kungenjalo angeke balitfole lelifa, ngaphandle kwekucitseka kwengati.

54 Ngetulu kwaloko, nangabe kunendzawo letfolakele, akube netisebenti talo lonkhe luhlobo letitfunyelwa kulendzawo, kusebentela labangcwele baNkulunkulu.

55 Tonkhe leti tintfo atentiwe ngeluhlelo; nemalungelo aletindzawo akatiswe tikhatsi ngetikhatsi, ngumbhishobhi noma sitfunywa selibandla.

56 Futsi umsebenti wekubutsana awungentiwa ngekushesha, nangekubaleka, kodvwa awentiwe njengekuyalwa babonisi belibandla emihlanganweni, ngekwelwati labalutfola tikhatsi ngetikhatsi.

57 Inceku yami Sidney Rigdon ayiyinikele iphindze iyingcwelise lendzawo, nelibala lelithempeli, eNkhosini.

58 Futsi akubitwe umhlangano; emvakwaloko tinceku tami Sidney Rigdon naJoseph Smith, lomNcane, atibuye, kanjalo na-Oliver Cowdery akabuye nabo, kufeza umsebenti losele lengibamisele wona endzaweni yabo, nalosele njengobe kuyawuncuma imihlangano.

59 Futsi akubebete umuntfu lobuyako kulendzawo ngaphandle kwekutsi afakaze endleleni, ngaloko lakwatiko futsi lakukholwa ngekweliciniso.

60 Loko lokuniketwe Ziba Peterson akutsatfwe kuye; eme njengelilunga ebandleni, asebente ngetandla takhe, nabomnakabo, ate atfotjiswe ngalokwanele ngato tonkhe tono takhe; ngoba akativumi, futsi ucabanga kutifihla.

61 Babonisi labasele balelibandla, labeta kulendzawo, labanye babo lababusiswe kakhulu nangalokwendlulele, nabo ababambe umhlangano kuyo lendzawo.

62 Inceku yami Edward Partridge ayichube umhlangano lotawubanjwa ngibo.

63 Nabo futsi ababuye, bashumayele livangeli endleleni, bafakaze ngetintfo letembulwa kubo.

64 Ngoba, ngicinisile, umsindvo kufanele uphume kulendzawo uye kuwo wonkhe umhlaba, nasetincenyeni letikhashane temhlaba—livangeli kufanele lishunyayelwe kuto tonkhe tidalwa, netibonakaliso tibalandzele labo labakholwako.

65 Futsi bukani iNdvodzana yeMuntfu iyeta. Amen.